YUHANI 14 - Ha`bari Ndjema ya I Maore

Insa ɗe iNdzia iv̄ingao ha Mungu Ɓaɓa

¹ «Musuhafilihe iroho. Namuamini Mungu, muniamini na wami.

² V̄wa makazi mengi nyumbani ha Ɓaɓangu; na djeli kayaka namuna iyo, natsomuambiani. Mana nisendra namutayarisheni ɓandza.

³ Na neka tsendre, tsimutayarishani liɓandza, nitsorudi, nimurengeni na wami, ile pare v̄ahanu nilio, muke wajau.

⁴ Na v̄ahali nendrao, wanyu ujua indzia.»

⁵ Sa ile Tomasi amuambia: «Raɓi, karisujua v̄ahanu wendrao. Ɓasi ha namuna jeje ritsojuao indzia?»

⁶ Insa amuambia: «Wami ɗe indzia, ukweli, na uhayati. Kav̄usi mutru ajao ha Ɓaɓa, neka tsi ha ndzia yangu.

⁷ Na djeli mwakonijua, mwatsomujua wajau Ɓaɓangu. Na rangu v̄anu musumujua, tsena mumuono.»

⁸ Filiɓusa amuambia: «Raɓi, rionese Ɓaɓa, na iyo itsoritosha.»

⁹ Insa amuambia: «Filiɓusa, ina muda mwengi nilio na wanyu, ne kwanijua? Mutru aniona, amuono Ɓaɓa. Ɓas, ha namuna jeje ata urongoao: ‹Rionese Ɓaɓa›?

¹⁰ Kusuamini amba tsa moni ha Ɓaɓa, na Ɓaɓa a moni hangu? Marongozi nimuambiaoni, tsisuyarongoa ha iwami yangu. Ɓaɓa alio moni hangu, waye ɗe afanyao zitrendro zahe.

¹¹ Namuniamini amba tsa moni ha Ɓaɓa, na Ɓaɓa a moni hangu; neka tsi ɗe iyo, namuamini anga ha siɓaɓu ya zitrendro zizo.

¹² Kweli, nisumuambiani ha kweli, monyewe uniamini atsofanya wajau zitrendro nizifanyao, tsena atsofanya ɓole zaidi, mana nisendra ha Ɓaɓa.

¹³ Na yotsi mutsoimiao ha lidzina langu, nitsoifanya, ile pare Ɓaɓa atukuziwe ha uMwana.

¹⁴ Neka musumia shitru ha lidzina langu, nitsoifanya.»

Wahadi wa umujilio wa iRoho Ndzitwaharifu

¹⁵ «Neka musuniv̄endza, mutsotuĩ ãmuri zangu.

¹⁶ Na wami nitsomumia Ɓaɓa amuv̄eni Musaidizi wangina, ake dahari na wanyu.

¹⁷ Ɗe iRoho ya ukweli amba ulemengu kaushindri waikuɓali, mana kawasuiona, wala kawasuijua. Ɓadi wanyu musumujua, mana waye asuɓaki na wanyu, amwesa atsoka moni hanyu.

¹⁸ Tsitsomulishani yatima, nitsomurudiani.

¹⁹ Muda mushashi ɗe waɓaki, na ulemengu kautsoniona tsena, ɓadi wanyu mutsoniona. Iv̄o nilio hayi, wanyu wajau mutsoka hayi.

²⁰ Suku iyo mutsojua amba tsa moni ha Ɓaɓangu, na wanyu mwa moni hangu, tsena wami tsa moni hanyu.

²¹ Mutru aliona ziãmuri zangu amwesa asuzituĩ, uwo ɗe aniv̄endzao; na uwo aniv̄endzao, atsov̄endzewa na Ɓaɓangu; na wami wajau nitsomuv̄endza, amwesa nitsodziv̄enua haheju.»

²² Sa ile Yudasi, tsi ɗe Iskarioti, amuambia: «Raɓi, ha namuna jeje utsodziv̄enuao hatruju, ɓadi tsi ɗe ha ulemengu?»

²³ Insa amudjiɓu: «Neka mutru asuniv̄endza, atsosika urongozi wangu, tsena Ɓaɓangu atsomuv̄endza; ritsomujilia, amwesa ritsofanya makazi yatru hahe.

²⁴ Uwo kasuniv̄endza, katsosika marongozi yangu. Na urongozi muukiao, tsi wangu, ɓadi wa Ɓaɓa aniv̄eleha.

²⁵ Tsimuambiani trongo zizo iv̄o raha nilio na wanyu.

²⁶ Ɓadi uMusaidizi, ne ɗe iRoho Ndzitwaharifu Ɓaɓa atsomuv̄elehao ha lidzina langu, atsomufundrisani piya zitrongo, na umunahanidzani piya izo namuambiani.

²⁷ Nisumulishiani utrulivu wa roho, nisumuv̄ani utrulivu wangu; tsisumuv̄aniwo mauri ɗe inamuna ulemengu uv̄ao. Roho yanyu isuhafilihe, wala isuke na trisidzo.

²⁸ Mukia amba tsimuambiani: ‹Wami nisendra dzangu, amwesa nitsomurudiani›. Neka musuniv̄endza, mutsofurahi iv̄o nendrao ha Ɓaɓa, mana Ɓaɓa muɓole rahana wami.

²⁹ Na av̄asa tsimuambiani trongo zizo kaɓula izo uhidjiri, pare zamohidjiri, muamini.

³⁰ Tsitsorongoa trongo nyengi tsena na wanyu, mana umutawalizi wa lidunia lini asuja. Waye kasina ushindzi utsokao yotsi ju langu,

³¹ ɓadi ile lidunia lijuwe amba nisumuv̄endza Ɓaɓa, nisurendra ha uɗunga izo Ɓaɓa aniãmurisha. V̄av̄o namuhime, rilawe v̄anu.»