YUHANI 13 - Ha`bari Ndjema ya I Maore

Insa asuhosa yimindru ya maswihaɓa yahe

¹ Na kaɓula ya umusherehio wa Unahanizi wa Mutupio|unahanizi, Insa aka ajua amba uwakati wahe madza uka uwaswili wa ulawa ulemenguni v̄anu, andre ha Ɓaɓa. Na ɓaanda av̄endza watru wahe waka ulemenguni, awav̄endze ata mupaka mwiso.

² Na v̄ale, wakati wa shahula ya mahariɓi, Iɓilisa madza aka atria rohoni ha Yudasi Iskarioti, mwana wa Simoni, ifikira ya umuv̄iria nyuma.

³ Insa akojua amba Ɓaɓa atria piya zitrongo mihononi hahe, amba alawa ha Mungu, amwesa akorudi ha Mungu.

⁴ Ɓas, ahimi hari mwa muɗyio ule, atoa kandzu yahe, arenge shitamba aifungu trengaju.

⁵ Atria maji moni na shiya, amwesa aandrisa uhosa yimindru ya maswihaɓa yahe, na uyiv̄angua ha ishitamba ile aka aifunga trengaju.

⁶ Ɓas awaswili ha Simoni Monye, na waye amuambia: «Wawe Raɓi ɗe unihosao yimindru!»

⁷ Insa amudjiɓu: «Trongo niifanyao kusuielewa av̄asa, ɓadi mbeli oho utsoelewa.»

⁸ Monye amuambia: «Ata hata, kav̄u suku utsonihosao yimindru!» Sa ile Insa amudjiɓu: «Neka tsahuhosa, kusina fungu na wami.»

⁹ Simoni Monye amuambia: «Raɓi, ɓasi v̄av̄o tsi ɗe yimindru tu, ɓadi na yimihono na ishitswa.»

¹⁰ Wakati ule Insa amuambia: «Mutru amohoa ahisa, uɓaki tu ɗe waye uhosa yimindru, mana piya umwili wahe wa murahafu. Na wanyu mwa warahafu, ɓadi tsi piyanyu.»

¹¹ Mana akojua uwo akoja amuv̄iriye nyuma, iyo ɗe imana arongoa: «Tsi piyanyu mulio warahafu.»

¹² Ɓaanda awahosa yimindru, atria kandzu yahe, arudi aketsi, amwesa awaambia: «Saɓu muelewa itrongo namufanyianiyo?

¹³ Musunihira Fundi, na Raɓi, tsena muna haki, mana wami ɗe wizo zile.

¹⁴ Na ha izo, neka tsimuhosoni yimindru, wami Raɓi amma Fundi, imulazimuni wajau muhosane yimindru wanyu na wanyu.

¹⁵ Mana tsimuv̄ani mufano, pare mufanye mauri ɗe iheli namufanyiani.

¹⁶ Kweli, nisumuambiani ha kweli, murumizi tsi muɓole rahana murumisa wahe, wala mutru av̄elehwa tsi muɓole rahana ule amuv̄eleha.

¹⁷ Mwamojua trongo zizo, v̄av̄o mwa rahani neka musuzitria ndziani.

¹⁸ Tsisumurongoani piyanyu; wami ujua wao nawatsahua. Ɓadi ilazimu uMuangishio utsimidzihe amba: ‹Mutru akoɗya dipe v̄umoja na wami, anigaushia.›

¹⁹ Nisumujudzani trongo iyo rangu av̄asa, kaɓula raha kayahidjiri, pare yamohidjiri, muamini amba wami ɗe wami.

²⁰ Kweli, nisumuambiani ha kweli, monyewe urenga mutru namuv̄eleha, uwo asunirenga ɗe wami; na monyewe unirenga, asurenga Uwo aniv̄eleha.»

Insa asujudza amba atsov̄iriwa nyuma

²¹ Ɓaanda arongoa zile, Insa ahafiliha iroho, amwesa ajudza ha dhwahiri: «Kweli, nisumuambiani ha kweli, moja mengoni mwanyu atsoniv̄iria nyuma.»

²² Ɓas, yamaswihaɓa waangaliana wao na wao, kawakojua amba akomurongoa mbani.

²³ Moja hari mwa maswihaɓa yahe alio amba Insa akomuv̄endza ha kusudi, aka aketsi ɓavuni na waye.

²⁴ Simoni Monye amuv̄eleshedzea ãlama amudzise Insa amba uv̄i ɗe amurongoao.

²⁵ Swihaɓa lile amunyamia Insa, amudzisa: «Raɓi, uwo mbani?»

²⁶ Insa amudjiɓu: «Ɗe uwo nitsomuv̄ao likutru ɓaanda nalipatsidza.» Ɓas apatsidza likutru, amuv̄alo Yudasi, mwana wa Simoni Iskarioti.

²⁷ Urenga yahe likutru, na Shetwani amungia kamwe. Ɓas Insa amuambia: «Trongo wendrao uifanye, ifanye ha uharaka.»

²⁸ Kav̄waka ata mutru hari mwa muɗyio ule v̄ale aelewa imana akomuambia trongo ile.

²⁹ Iv̄o Yudasi aka musika-muzeti wa marike, wasalia wakofikiri amba v̄ale Insa akomuambia anunuwe izo zawalazimu ya uMusherehio, au akomuambia av̄e mwana shitru zimasikini.

³⁰ Yudasi ɓaanda arenga likutru la dipe, alawa kamwe. Na v̄ale uku uka ungia.

Insa asuv̄a watru wahe ãmuri pia

³¹ Ɓaanda Yudasi alawa v̄ale, Insa arongoa: «Av̄asav̄anu uMwana wa Mwanadamu|Mwana wa Mwanadamu atukuziwa, na Mungu atukuziwa haheju.

³² Neka utukufu wa Mungu uv̄enulwa ha uMwana, Mungu wajau atsov̄enua utukufu wa uMwana hahe waye Mungu, tsena atsouv̄enua tsi hale.

³³ Wana wangu, raha tsa v̄umoja na wanyu hari mwa wakati mushashi. Mutsonizunguha, na mauri ɗe inamuna naambia Mayahudi amba: ‹V̄ahanu wami nendrao, wanyu kamushindri uja›, nisumuambianiyo wajau av̄asa.

³⁴ Nisumuv̄ani ãmuri pia tsini: Namuv̄endzane wanyu na wanyu. Mauri ɗe inamuna namuv̄endzani, wanyu wajau namuv̄endzane wanyu na wanyu.

³⁵ Ini ɗe inamuna wanadamu piya watsojuao amba wanyu maswihaɓa yangu: neka muna mahaɓa wanyu na wanyu.»

Insa asujudza amba Monye atsomuhara

³⁶ Sa ile Simoni Monye amudzisa: «Raɓi, usendra hav̄i?» Insa amudjiɓu: «V̄ahali nendrao, kushindri niɗunga av̄asa, ɓadi utsoniɗunga mbeli oho.»

³⁷ Monye amuambia: «Raɓi, mana trini tsishindri nahuɗunga av̄asa? Wami tsa tayari ya ufa ha siɓaɓu ya wawe.»

³⁸ Insa adjiɓu: «Amba wa tayari ya ufa ha siɓaɓu ya wami? Kweli, nisuhuambia ha kweli, kukuyi kalitsoyeha kaɓula ya wawe unihara mara traru.»