YUHANI 12 - Ha`bari Ndjema ya I Maore

Mariama asumutria Insa marashi mindruni

¹ Suku sita kaɓula ya Unahanizi wa Mutupio|unahanizi, Insa awaswili Ɓaitihaniya, hule Lazaro akoketsi, ule Insa aka amuregeza hayi ulawa ha uwafu.

² Apishiwa shahula v̄ale; Marta akoyeleshea, na Lazaro aka hari mwa wao wakoɗya v̄umoja na waye.

³ Ɓas, Mariama arenge shiv̄imo ya marashi ya nardo yendza thamani ɓole, kayatsanganisiwa na shitru yangina, ayatria mindruni ha Insa, amwesa ayiv̄angua ha zinyole zahe; na inyumba ika ijaya harufu ya yamarashi.

⁴ Sa ile Yudasi Iskarioti, moja mengoni mwa yamaswihaɓa ya Insa, uwo atsojao amuv̄iriye nyuma, arongoa:

⁵ «Manatrini marashi yanu kayaudziwa ha turuturu thalathamiya za fedha, zav̄olwa zimasikini?»

⁶ Akorongoa trongo ile tsi amba masikini zakomutria shuhuli, ɓadi ɗe iv̄o aka mwidzi, na iv̄o akosika umuzeti wa marike, akorenga zakotrilwa moni.

⁷ Ɓadi Insa arongoa: «Mulishe! Ayahetsi ya isuku ya madziho yangu.

⁸ Masikini, mutsokanazo dahari yanyu, ɓadi wami, kamutsokana wami dahari.»

Mupango wa umuula Lazaro

⁹ Dunia nyengi ya Mayahudi wakati wakia amba Insa aka Ɓaitihaniya, wandre hule, tsi tu ha siɓaɓu ya Insa, ɓadi pare wamuone Lazaro, ule aka amuregeza hayi ulawa ha uwafu.

¹⁰ Na v̄ale yaMatolezi Maɓole ya Masadaka|Mutolezi-Masadaka warenge satua ya umuula Lazaro wajau,

¹¹ mana ha siɓaɓu ya waye Mayahudi mengi yakowalawia ha umuamini Insa.

Insa asungia Yerusalemu na shime

¹² iSuku yaɗunga, idunia ɓole ya watru waka waja hari mwa umusherehio wakia amba Insa akoja Yerusalemu.

¹³ Ɓas, warenge mahuri, wandre wamurenge ha ushelemedza: «Hozana! Naɓarikishihe uwo ajao ha lidzina la Mola, uMufalume wa Israila!»

¹⁴ Insa apara mwana pundra v̄ale, amupandra, mauri ɗe inamuna yaangihwa:

¹⁵ «Usuriye, mwana mushe wa Siyuna! Tsunu, umufalume waho asuja, apandra mwana wa pundra.»

¹⁶ V̄ale raha maswihaɓa yahe kawaka waelewa trongo zile. Ɓadi wakati Insa atukuziwa, v̄ale ɗe wanahana amba trongo zile zika ziangihwa ju lahe, na watru wakomufanyiazo.

¹⁷ iDunia yaka na Insa wakati amuhira Lazaro alawe kaɓurini, iv̄o amuregeza hayi ulawa ha uwafu, wakotoa ushahidi.

¹⁸ Mana watru wengi waja wamupara, ɗe iv̄o wakia amba afanya ãlama ya midjuza iyo.

¹⁹ Ɓas, watru wa ishama ya Mafarisayo waambiana wao na wao: «Musuona? Kav̄u ata trongo mutsoshindrao muifanye. Namuangaliye, idunia imuɗungu!»

Insa asujudza rangu kaɓula ufa yahe

²⁰ V̄uka ɓaãdhwi ya Magiriki hari mwa wale waka wahea waãɓudu wakati wa uMusherehio.

²¹ Wandre wamupara Filiɓusa wa shi Ɓaitisaida hari mwa iGalilaya, wamuambia: «Ɓaɓa, risutsaha rimuone Insa.»

²² Ɓas, Filiɓusa andre amuambia Andreasa, amwesa Andreasa na Filiɓusa wandre wamuambia Insa.

²³ Sa ile Insa awadjiɓu: «Wakati uja wa uMwana wa Mwanadamu|Mwana wa Mwanadamu utukuziwa.

²⁴ Kweli, nisumuambiani ha kweli, neka mbia yapuliha trotroju kayafa, iyo uɓaki mbia moja tu. Ɓadi neka ifu, iyo uv̄inga mavuna mengi.

²⁵ Monyewe uv̄endza uhayati wahe, atsoupoteza, na uwo aengao uhayati wahe ulemenguni v̄anu, atsouvukisha ha uhayati mukamilifu wa daima.

²⁶ Neka mutru asutsaha anirumishiye, naniɗunge; na v̄ahali nilio, v̄av̄o wajau ɗe v̄ahali murumishi wangu atsokao. Neka mutru asunirumishia, Ɓaɓangu atsomuhishimu.

²⁷ Av̄asa roho yangu ihafiliha. Na trini ɗe nitsoirongoao? Amba: ‹Ɓaɓa, ruhusu wakati unu usunipare›? Ɓadi iyo ɗe imana ata nawaswili hari mwa uwakati unu.

²⁸ Ɓaɓa, tukuza lidzina laho!» Sa ile v̄uja ji lalawa pev̄oni, lirongoa: «Tsilitukuza, tsena nitsolitukuza raha.»

²⁹ iDunia yaka v̄ale yakia, yakorongoa amba lilo guguma, na wasalia amba malayika ɗe yalagua na waye.

³⁰ Ɓadi Insa arongoa: «Tsi ha siɓaɓu ya wami ɗe liji lilo lakilihwana, ɓadi ha siɓaɓu ya wanyu.

³¹ Av̄asa ɗe uwakati wa ihukuma ya lidunia lini; av̄asa umutawalizi wa lidunia lini atsolatswa v̄ondze.

³² Na wami wakati itsokao amba tsihedzewa ulawa shiv̄andreju mwa tsi, nitsovura piya wanadamu hanguju.»

³³ Arongoa zile pare ajudze namuna jeje akondrofa.

³⁴ Ɓas, dunia ile imuambia: «Wasi rikia hari mwa iSharia amba Kristi atsoẽshi dahari. Ha namuna jeje ɓasi ata urongoao amba: ‹uMwana wa Mwanadamu alazimu ahedzewe›? uMwana wa Mwanadamu uwo, ɗe uv̄i?»

³⁵ Sa ile Insa awadjiɓu: «iNuru ya na wanyu raha hari mwa mwana muda. Namwendre wakati muliona inuru, pare ishidza isumujiliyeni ɓila ya wanyu udzilindrilia. Mutru andrao shidzani kaji v̄ahanu akaɓilio.

³⁶ Ɓasi v̄anu mulio na inuru, namuamini inuru, pare mufanyihe wana wa nuru.» Ɓaanda arongoa trongo zile Insa alawa, amwesa adzitenge na wao.

Wengi wa Mayahudi kawasumuamini Insa

³⁷ Wala ukana Insa aka afanya ãlama nyengi za midjuza mbeli zawo, kawakomuamini.

³⁸ Ha izo, urongozi unu wajudziwa na mutrume Izaya utsimidziha: «Mwalatru, mbani ɗe aamini ihaɓari yatru raijudza? Na ha mbani ɗe ushindzi wa Mwalatru wav̄enushiwa?»

³⁹ Izaya arongoa tsena imana ata kawashindra waamini:

⁴⁰ «Aulu matso yawo, amwesa awafanya wendza roho mangavu, ile pare matso yawo yasuone, roho zawo zasuelewe, wala wasugaudze roho zawo hangu, nawav̄onesa.»

⁴¹ Izaya arongoa trongo zile mana aono utukufu wahe, amwesa akomurongoa ɗe waye.

⁴² Na v̄ale ata hari mwa yamadhwamana, wengi waja wamuamini, ɓadi ha siɓaɓu ya Mafarisayo kawakoirongoa, ile wasuɓalidziwe iNyumba ya Uswali.

⁴³ Mana wakov̄endza sifa za wanadamu rahana sifa za Mungu.

Urongozi wa Insa ɗe utsohukumuo

⁴⁴ V̄ale Insa arongoa ha nguvu: «Monyewe uniamini, kasuniamini ɗe wami, ɓadi ɗe Uwo aniv̄eleha.

⁴⁵ Na mutru anionao, asuona Uwo aniv̄eleha.

⁴⁶ Tsija mauri nuru ulemenguni v̄anu, pare mutru yotsi aniaminio, asuɓaki shidzani.

⁴⁷ Neka mutru asukia marongozi yangu ne kasuyatuĩ, wami tsi ɗe nimuhukumuo. Mana tsaja amba nihukumu ulemengu, ɓadi nihuyi ulemengu.

⁴⁸ Monyewe unihara amwesa kasukuɓali marongozi yangu, ana hakimu wahe. Urongozi naujudza, ɗe utsomuhukumuo isuku ya mwiso.

⁴⁹ Mana tsalagua ha iwami yangu, ɓadi Ɓaɓa aniv̄eleha aniãmurisha waye yahe izo nalazimu nirongowe na ujudza.

⁵⁰ Na wami nisujua amba ãmuri yahe, ɗe uhayati mukamilifu wa daima. Iyo ɗe imana izo nirongoao, nisuzirongoa mauri ɗe inamuna Ɓaɓa aniambiazo.»