YUHANI 11 - Ha`bari Ndjema ya I Maore

Insa asumuregeza hayi Lazaro

¹ V̄uka mutruɓaɓa akohiriwa Lazaro aka aremwa na uwaɗe. Aka wa shi Ɓaitihaniya, ɗago la Mariama na mwananyahe mutrumushe Marta.

² Mariama uwo ɗe aka amutria Raɓi marashi, amwesa av̄angua mindru yahe ha nyole zahe. Na v̄ale mwananyahe mutruɓaɓa Lazaro ɗe akokodza.

³ Ɓasi washe wananya waili wale wamuv̄eleshedzea Insa haɓari ini: «Raɓi, mwandzani waho asukodza.»

⁴ Ukia yahe haɓari ile, Insa arongoa: «Uwaɗe uwo kautsomuula, ɓadi uja ile uv̄enuwe utukufu wa Mungu, pare uMwana wa Mungu atukuziwe ha indzia yawo.»

⁵ Na Insa akomuv̄endza Marta, na mwananyahe mutrumushe, na Lazaro.

⁶ Ne ukia yahe amba Lazaro akokodza, aɓaki v̄ahali aka muda wa suku mbili raha.

⁷ Ɓaanda ya v̄ale aambia maswihaɓa yahe: «Narirudi Yudeya.»

⁸ Sa ile maswihaɓa yahe yamuambia: «Fundi, tsi hale v̄anu yaMayahudi|Mayahudi yakotsaha yahuvutsiye mawe ɗe utsahao wendre oho raha?»

⁹ Insa adjiɓu: «Hali sa za mutsana tsi kumi na mbili? Neka mutru asendra mutsana, waye kakwala, mana asuona inuru ya lidunia lini.

¹⁰ Ɓadi neka mutru asendra uku, waye ukwala, mana inuru kaisi moni hahe.»

¹¹ Ɓaanda arongoa zile, awaambia: «Mwandzani watru Lazaro asindzia, ɓadi nisendra namumidze.»

¹² Maswihaɓa yahe yamuambia: «Raɓi, neka asindzia, v̄av̄o atsov̄ona.»

¹³ Na Insa akorongoa ɗe ufa wa Lazaro, ɓadi maswihaɓa yahe wakofikiri amba akorongoa trongo ya tsindzi.

¹⁴ Ɓasi Insa awaambia dhwahiri: «Lazaro afu.

¹⁵ Ɓadi ha siɓaɓu ya wanyu tsifurahi iv̄o tsaka oho, pare muamini. Narendre ramupare.»

¹⁶ Ɓas Tomasi, ule akohiriwa Mbiliju, aambia maswihaɓa wanyahe wale: «Narendre wajau, pare rife v̄umoja na waye.»

¹⁷ Amowaswili hule, Insa apara amba Lazaro madza aka kaɓurini hari mwa suku nne.

¹⁸ Ɓaitihaniya ika kariɓu na Yerusalemu, hari mwa ziv̄imo kumi na tsano jauleni.

¹⁹ Na Mayahudi mengi yaka yaja v̄ale, pare watrulidze iroho ya Marta na Mariama ha siɓaɓu ya wafati wa mwananyawo mutruɓaɓa.

²⁰ Wakati Marta akia amba Insa akoja, andre amupara, na Mariama aka aketsi ɗagoni.

²¹ Ɓas, Marta amuambia Insa: «Raɓi, na djeli uka v̄anu, itsoka amba mwananyangu kafa.

²² Ɓadi nisujua amba ata av̄asa, Mungu atsohukuɓalia kula trongo utsomumiaoyo.»

²³ Sa ile Insa amuambia: «Mwananyaho atsoregea hayi.»

²⁴ Marta amudjiɓu: «Tsijua amba atsoregea hayi wakati wa umuregezeo hayi wa isuku ya mwiso.»

²⁵ V̄ale Insa amuambia: «Wami ɗe umuregezeo hayi na uhayati. Monyewe uniamini, atsoẽshi, wala ukana asuja afariki.

²⁶ Na mutru yotsi aẽshio tsena asuniamini, katsofa ata idahari. Hali usuamini trongo iyo?»

²⁷ Amudjiɓu: «Ewa Raɓi. Nisuamini amba wawe ɗe uMutsahuliwa|Mutsahuliwa, uMwana wa Mungu, uwo akolazimu aje ulemenguni.»

²⁸ Ɓaanda arongoa trongo zile, andre amuhiri mwananyahe Mariama, amuambia v̄olev̄ole: «Fundi a v̄anu, asuhuhira.»

²⁹ Amokia trongo ile, Mariama ahimi ha uharaka, andre amupara.

³⁰ Na v̄ale Insa raha kaka angia ɗagoni, ɓadi aka hule Marta aka amupara.

³¹ Mayahudi yaka ha Mariama wamutrulidze iroho, umuona yawo iv̄o ahima ha uharaka alawa, wamuɗungu, wakofikiri amba akwendra kaɓurini andre alile.

³² Mariama uwaswili yahe v̄ahali Insa aka ata amuona, awu mindruni hahe, amuambia: «Raɓi, na djeli uka v̄anu, itsoka amba mwananyangu kafa.»

³³ Wakati Insa amuona amba alili, waye na Mayahudi yale yaka yamuɗunga, aremwa na huzuni iroho, tsena asikitiha.

³⁴ Ɓas, adzisa: «Mumutria hav̄i?» Wamudjiɓu: «Raɓi, ko uone.»

³⁵ Insa alili.

³⁶ Ɓas, Mayahudi yale yarongoa: «Musuona kiasi akomuv̄endza!»

³⁷ Ɓadi wasalia hari mwawo wakorongoa: «Waye aɓua yamatso ya mufa-matso, kakoshindra afanya namuna amba mutru unu asufe?»

³⁸ Ɓas, Insa aremwa na huzuni raha rohoni wakati awaswili kaɓurini|kaɓuri. Lika gumbo latsimbwa hari mwa mulima wa ɓwe, na umulongo uka uɓalwa na ɓwe.

³⁹ Insa arongoa: «Namutowe liɓwe!» Sa ile Marta, mwananyahe wa umufu, amuambia: «Raɓi, madza asunuka. Leo suku ya nne.»

⁴⁰ Insa amudjiɓu: «Afa tsahuambia amba neka usuamini, utsoona utukufu wa Mungu?»

⁴¹ Ɓas, watowo liɓwe. Sa ile Insa adzua yamatso, arongoa: «Ɓaɓa, nisuhuhimidia iv̄o wanivulishia.

⁴² Hanguju nakojua amba ha dahari wawe univulishia. Ɓadi tsilagua ha siɓaɓu ya idunia yanizingidzia, pare waamini amba wawe ɗe waniv̄eleha.»

⁴³ Ɓaanda ahisa urongoa zile, ha ji lendza nguvu arongoa: «Lazaro, ko!»

⁴⁴ Mutru ule aka afa alawa, yimindru na yimihono yika yiv̄ambiwa zitamba, na isura ika ifinikiha na nguo. Ɓas, Insa awaambia: «Namumuɓuliye, mumulishe andre.»

Mayahudi wasupanga wamuule Insa

⁴⁵ V̄ale wengi hari mwa Mayahudi waka waja ha Mariama waona trongo Insa azifanya, wamuamini.

⁴⁶ Ɓadi ɓaãdhwi yawo wandre wapara watru wa ishama ya Mafarisayo, wawaambia trongo zile Insa azifanya.

⁴⁷ Ɓas, yaMatolezi Maɓole ya Masadaka|Mutolezi-Masadaka na yaMafarisayo wahiri uMungulidzano Muɓole|Mungulidzano wa Waɓole. Wawaambia: «Ritsofanya trini? Mana mutru unu asufanya ãlama nyengi za midjuza.

⁴⁸ Neka risumulisha afanye, watru piya watsomuamini, amwesa Maromu|Romu watsoja waangamidze v̄ahanu v̄utwaharifu v̄watru na inishani yatru.»

⁴⁹ Ɓadi moja mengoni mwawo, ne ɗe Kayafasi aka uMuɓole wa yaMatolezi-Masadaka mwaha ule, awaambia: «Wanyu kamusuelewa ata trongo!

⁵⁰ Kamusuelewa amba ya afudhwali hanyuju mutru moja ufa ha ufayidisha uumati, ne inishani piya yasuangamiye.»

⁵¹ Na v̄ale karongoa trongo iyo ha iwaye yahe, ɓadi ɗe iv̄o aka uMuɓole wa yaMatolezi-Masadaka mwaha ule, akorongoa shi mutrume amba Insa akojofa ha ufayidisha inishani,

⁵² wala tsi ɗe inishani yawo tu, ɓadi tsena pare atsanganise piya uwana wa Mungu watsambaliha, wafanyishihe shitru moja.

⁵³ Rangu isuku ile waãzimia wamuule Insa.

⁵⁴ Ɓasi ha izo Insa kakozingidza tsena ha hadhwira ha yaMayahudi, ɓadi alawa v̄ale, andre mukaɓala kariɓu na lipadza, hari mwa ɗago lihiriwao Efraimu. Aɓaki v̄ale na maswihaɓa yahe.

⁵⁵ Na v̄ale umusherehio wa Unahanizi wa Mutupio|unahanizi wa Mayahudi uka kariɓu. Watru wengi wa tsiju v̄ale wahea Yerusalemu kaɓula ya uUnahanizi, ile wadzitwaharishe.

⁵⁶ Ɓas, wakomuzunguha Insa na udzisana moni na iNyumba Ndzitwaharifu: «Musuona jeje? Katsoja hari mwa umusherehio?»

⁵⁷ Na yaMatolezi Maɓole ya Masadaka v̄umoja na yaMafarisayo waka watoa ãmuri amba mutru yotsi atsojuao v̄ahali Insa alio awaambiye, pare wamusike.