YUHANI 10 - Ha`bari Ndjema ya I Maore

Mufano wa mutsunga mwema

¹ «Nisumuambiani ha kweli, mutru kasungia moni na livala la maɓariɓari ha uv̄ira mulongoju, ɓadi ashiao ha uv̄ira v̄ahanu v̄wangina, uwo mwidzi, tsena murav̄izi.

² Ɓadi uwo angiao ha uv̄ira mulongoju, waye ɗe umutsunga wa yamaɓariɓari.

³ Mugogezi-mulongo umuɓulia, na yamaɓariɓari uvulishia ji lahe; waye uhira maɓariɓari yahe ha madzina yawo, uyav̄inga v̄ondze.

⁴ Ɓaanda ahisotoa v̄ondze piya yahe, waye uyakilia mbeli, na yamaɓariɓari umuɗunga, mana yasujua ji lahe.

⁵ Kayatsoɗunga mudjeni, ɓadi yatsomutrala, mana yao kayaji ji la wadjeni.»

⁶ Insa awaambia mufano uwo, ɓadi kawakoelewa izo akowaambiazo.

⁷ Amwesa Insa awaambia raha: «Nisumuambiani ha kweli, wami ɗe umulongo wa yamaɓariɓari.

⁸ Piya wao waja kaɓula ya wami, wao waidzi, tsena warav̄izi. Ɓadi yamaɓariɓari kayawavulishia.

⁹ Wami ɗe umulongo. Mutru angiao ha univ̄ira, uwo atsohuyiwa. Atsongia na ulawa, amwesa atsopara za uɗya.

¹⁰ Mwidzi, waye kaja neka tsi ahiɓe, aule, aangamidze. Wami tsija ile maɓariɓari yakane uhayati, tsena yakanewo ha uwengi.

¹¹ Wami ɗe umutsunga mwema. Mutsunga mwema udzitoa fidia ha siɓaɓu ya maɓariɓari yahe.

¹² Ɓadi mutru aadjiriwa amba waye tsi mutsunga, wala tsi monyewe maɓariɓari yale, amoona amba mbwa nyeha isuja, waye ulisha yamaɓariɓari, ne atrale; na imbwa nyeha uyangilia, na uyatsambadza.

¹³ Mutru ule utrala, mana awadjiriwa, wala yamaɓariɓari kayamutria shuhuli.

¹⁴ Wami ɗe umutsunga mwema. Wami ujua maɓariɓari yangu, na yao unijua,

¹⁵ mauri ɗe inamuna Ɓaɓa anijuao, na wami nimujuao Ɓaɓa. Nisudzitoa fidia ha siɓaɓu ya maɓariɓari yangu.

¹⁶ Tsina raha maɓariɓari yangina, yalio amba tsi ya livala lini. Yao wajau, ilazimu niyav̄inge; yatsovulishia ji langu. V̄av̄o v̄utsoka ɓangwe moja tu, na mutsunga moja tu.

¹⁷ Ɓaɓa univ̄endza, mana nisuv̄a uhayati wangu, ile niurenge tsena.

¹⁸ Kav̄u mutru anitoleawo, ɓadi nisuuv̄a wami monyewe. Tsina ushindzi wa uuv̄a, tsena tsina ushindzi wa uurenga raha. Iyo ɗe iãmuri naipara ha Ɓaɓangu.»

¹⁹ V̄ungia tsena mufarikishano ha yaMayahudi ha siɓaɓu ya marongozi yale.

²⁰ Wengi mengoni mwawo wakorongoa: «Ana shetwani, uwo mwendza masera! Manatrini mumuvulishiao?»

²¹ Ɓadi wangina wakorongoa: «Yao tsi marongozi ya mwendza shetwani. Hali shetwani ushindroɓua matso ya wafa-matso?»

Mayahudi yasumuhara Insa

²² Wakati uka uwaswili wa usherehi uMutamanio wa iNyumba Ndzitwaharifu ɗagoni Yerusalemu. Uka wakati wa ɓaridi.

²³ Na Insa akotembea moni na iNyumba Ndzitwaharifu, uv̄andre uhiriwao Ɓaraza la Sulaimana.

²⁴ Mayahudi yamuzingidzia, yamuambia: «Ata lini utsorilembedzao ziroho? Neka wawe ɗe uMutsahuliwa|Mutsahuliwa, riambiye dhwahiri!»

²⁵ Insa awadjiɓu: «Tsimuambiani, ne kamusuamini. Zitrendro nizifanyao ha lidzina la Ɓaɓangu zisunilawia ushahidi.

²⁶ Ɓadi wanyu kamusuamini, mana kamusi hari mwa maɓariɓari yangu.

²⁷ Maɓariɓari yangu uvulishia ji langu. Wami uyajua, na yao uniɗunga.

²⁸ Nisuwav̄a uhayati mukamilifu wa daima. Kawatsoparwa na uangamifu ata idahari, wala kav̄u mutru atsoniv̄osheaowo muhononi hangu.

²⁹ Ɓaɓangu aniv̄awo, waye muɓole rahana piya, amwesa kav̄u mutru ashindrao awatowe muhononi ha Ɓaɓa.

³⁰ Wami na Ɓaɓa, wasi moja.»

³¹ Sa ile Mayahudi yarenge mawe raha, wakotsaha wamuvutsiyewo.

³² Insa awaambia: «Tsimuonesani zitrendro ndjema nyengi zalawa ha Ɓaɓangu. Ɓas, musuja munivutsiye mawe ha siɓaɓu ya iv̄i?»

³³ Mayahudi yamudjiɓu: «Tsi ha siɓaɓu ya shitrendro ndjema ɗe ritsahao rihuvutsiye mawe, ɓadi ɗe iv̄o wamukufuru Mungu, mana wawe mwanadamu usudzifanya Mungu.»

³⁴ Insa awadjiɓu: «Hali kayaangihwa moni na iSharia yanyu amba Mungu arongoa: ‹Wanyu miungu›?

³⁵ Ɓas, iSharia ihiri watru wav̄eleshedzewa urongozi wa Mungu amba wao miungu, na uMuangishio Mutwaharifu kaushindri uv̄indrusiwa.

³⁶ Na wanyu musurongoa amba uwo Ɓaɓa amutwaharisha, amuv̄eleha ulemenguni, asumukufuru Mungu ha iv̄o narongoa: ‹Wami Mwana wa Mungu›.

³⁷ Neka tsisufanya zitrendro za Ɓaɓangu, v̄av̄o musuniamini.

³⁸ Ɓadi neka nisuzifanya, wala ukana amba kamusuniamini wami, namuamini zitrendro zile, pare mujuwe amwesa muelewe, amba Ɓaɓa a moni hangu, na wami tsa moni ha Ɓaɓa.»

³⁹ Ɓas, v̄ale wakodjereɓu tsena umuzia, ɓadi awalawia mihononi hawo.

⁴⁰ Amwesa Insa alawa, ashia tsena nyambo ya umuro wa Jurdani, v̄ahanu Yahaya|Yahaya Muɓaĩshizi aka aɓaĩsha|uɓaĩsha mara ya handra, aɓaki v̄ale.

⁴¹ Watru wengi wamujilia, wakorongoa: «Yahaya kafanya ata ãlama ya midjuza, ɓadi kula airongoa ju la mutru unu, ika kweli.»

⁴² Na v̄ale wengi wamuamini Insa.