YUDA 1 - Ha`bari Ndjema ya I Maore

¹ Wami Yuda, murumishi wa Insa-Kristi, tsena mwananyahe wa Yakoɓu, nisuangishia wao wahiriwa amma wav̄endzewa wa Mungu ne ɗe Ɓaɓa, tsena wahetsiwa amba wa Insa-Kristi:

² Urehema, utrulivu na uv̄endza nazimuendreleyeni ha uwengi.

Watrangizi misomo ya trambo

³ Wanyu wav̄endzewa, ha iv̄o nakana ushauku muɓole wa umuangishiani yahusu uhuyifu wa shirika watru, tsidziono farudhwi ya umuangishiani pare nimutriyeni ɓari amba muwaniliye uaminifu wajudzwa ha watwaharifu mara moja ha piya.

⁴ Mana v̄udziseledza hari mwanyu ɓaãdhwi ya watru walio amba hukuma yawo iangihwa rangu kaɓula. Wao wakufuru wagaudzao urehema wa Mungu watru ha uufanya shisa ya taɓia mbovu, na umuhara Insa-Kristi, alio weke wahe Fundi watru amma Raɓi.

⁵ Nisutsaha nimunahanidzeni, wala ukana musujua piya zizo, amba Mola ɓaanda ahuyi umati wahe ulawa Miswiri, aja aangamidza wao wakohara uamini.

⁶ ziMalayika kazaka zaɓaki hari mwa idaradja yazo, ɓadi zalawa hazo, asuzilisha ha daima hari mwa silisili moni na ishidza ha ulindrilia iSuku Ɓole ya Hukuma.

⁷ Ɗe inamuna iyo Suduma na Gomora na yamalago madjirani yakofanya mauri yao taɓia za shahawa za peu, ha ufanya maendreleo tsi ya ãswili. Wao wa hari mwa shiv̄ondro ya moro wa dahari, na uwo mufano ha piya.

⁸ Ɓasi ɗe ha inamuna iyo wajau watru wao, ha uora yawo, wasutria utshafi umwili, wasudharau iYezi, na uruhana ziNgutukufu.

⁹ Ne ɗe ata Mikayilu, muɓole wa zimalayika wakati akoshindrana na Iɓilisa ha uwanilia umwili wa Musa, ne kasuɓutu aruhana, ɓadi arongoa: «Mola nahuv̄ondre.»

¹⁰ Ɓadi watru wao wasuruhana izo kawaziji, na izo wazijuao za shiãswili, mauri zinyama kazina ãkili, izo kamwe ɗe ziwaangamidzao.

¹¹ Maondo haoju! Mana waɗungu indzia ya Kayinu; ha siɓaɓu ya mupario, wadzilatsa hari mwa upotevu wa Ɓalahamu, tsena hari mwa mutsutsuho mauri Kurah ɗe wandra wadziangamidza.

¹² Watru wao uka hari mwa miɗyio ya shiunanya yanyu mauri magambe yakwalisao. Wasusterehi v̄umoja na wanyu na udzilisa ɓila trisidzo; wao mauri mavingu kayana vua yav̄ingwao na pev̄o, mauri miri ya mwiso wa kashikazi kayadza mavuna, yafa mara mbili, tsena yarurumulwa.

¹³ Wao mauri maluja yendza nguvu ya ɓahari yatoao povu lendza tsama la ziaĩɓu zawo; wa mauri nyora zendrao mboya zalishiwa ha dahari uɓole wa ishidza.

¹⁴ Ɗe ha wao raha ɗe Henoki, shilembwe ata mara saɓa ya Adamu, ajudza ha marongozi ya shi mutrume ashukidziwa amba: «Tsuwo Mola asuja v̄umoja na watwaharifu mialifu na mialifu wahe,

¹⁵ ile afanye hukuma kinyume na piya wanadamu, na uv̄enulia uwaovu piya zitrendrwa mbovu zawo na piya marongozi ya shilihidzo maãswifu mashirikina wayarongoa kinyume na waye.»

¹⁶ Wao watru wangurumao, waululao na inamuna yawo, tsena wav̄ingwao ha zingushauku zawo wenyewe; hanyo zawo ulagua trongo za zirusi, tsena wao usifu watru ha mupario wawo.

Masariɓu ha maaminifu

¹⁷ Ɓadi wanyu wav̄endzewa, namunahane marongozi yatolwa rangu kaɓula na yaMav̄ingizi-Risala|Mav̄ingizi-Risala ya Raɓi watru Insa-Kristi.

¹⁸ Wakomuambiani amba: «Hari mwa uwakati wa mwiso, v̄utsoka wafudhuli watsendrao ha zingushauku mbovu zawo wenyewe.»

¹⁹ Wao ɗe watriao mitsapushiano, waɗungao taɓia za shiãswili zawo, walio amba kawasina iRoho.

²⁰ Ɓadi wanyu wav̄endzewa, namudziundre hari mwa uaminifu wazidi utwaharifu wanyu, mufanye mamilio ha iRoho Ndzitwaharifu,

²¹ namudzihetsi hari mwa uv̄endza wa Mungu, ha ulindra urehema wa Raɓi watru Insa-Kristi utsoriv̄ingiao uhayati mukamilifu wa daima.

²² Namukane urehema na wao walio hari mwa taradudu;

²³ wangina, namuwahuyi ha uwahanyuwa hari mwa moro; iv̄o na wangina, namukane poreho latsangana na trisidzo, muenge ata na zinguo zatrilwa tsama ha taɓia za shiuɓinadamu zawo.

Sifa za Mungu

²⁴ Ɓasi ha Uwo ashindrao amuziyeni na kula mukwaliso, tsena amuyeleheni mbeli za utukufu wahe ɓila pandra hari mwa furaha,

²⁵ ha Mungu moja-moja, Muhuyifu watru ha ndzia ya Insa-Kristi, Raɓi watru, nav̄uke utukufu, ufalume, ushindzi na yezi, rangu kaɓula ya kula wakati, av̄asa, amma hari mwa piya uwakati! Amina.