YAKOƁU 5 - Ha`bari Ndjema ya I Maore

Mifahamisho ha matadjiri wadhulumuo

¹ Av̄asa yahusu wanyu matadjiri, namulile na ushelemedza ha siɓaɓu ya maondo yajao yamupareni!

² Utadjirifu wanyu uolo, na nguo zanyu ziv̄etsewa na maɓiɓi.

³ iDhahaɓu na ifedha yanyu zingia kutsu. Na kutsu yazo itsolawa ushahidi kinyume na wanyu, itsoɗya yimili yanyu mauri moro. Mudzingulidzia dafine hari mwa zisuku za mwiso.

⁴ Tsini yimiliv̄o kamwayiliv̄a ya watru wa hazi wavuna yimindra yanyu yisushelemedza, na zikeme za wavunizi ziwaswili makioni ha Mola Monyewe Ushindzi.

⁵ Muẽshi shiv̄andreju mwa tsi ha masterehi na mujiv̄idzio. Mudzinyeresa nafusi ha isuku ya utsindzwa.

⁶ Muhukumu na uula mwendza haki, wala kasumulimbiani.

Masariɓu ya mwiso

⁷ Ɓasi wananyangu, namukane suɓira ata umujilio wa Raɓi. Namufikiri tu mulimizi namuna alindrao v̄umoja na suɓira yamavuna yendza faida ya ishiv̄andre ya tsi, rangu vua za handra ata za mwiso.

⁸ Wanyu wajau namukane suɓira, muhodarishe roho zanyu, mana umujilio wa Raɓi ukuruɓia.

⁹ Mwasungurume wanyu na wanyu, wananyangu, pare mwasuhukumulwe. Tsuwo, hakimu ahimi mulongoju.

¹⁰ Hari mwa trongo ya djondo na suɓira wananyangu, namurenge mufano yimitrume yalagua ha lidzina la Mola.

¹¹ Wasi urongoa amba waɓarikishiha wao wastahamili. Mukia amba v̄urongolwa ustahamilifu wa Ayuɓa, tsena muono umwiso Mola amudjaãliawo, kiasi Mola aliona urehema na poreho ha uwengi.

¹² Hususwani wananyangu, mwasulav̄e, tsi na uwingu, wala ishiv̄andre ya tsi, wala ha namuna ya shilav̄io itsokao yotsi yangina. Ɓadi «ewa» yanyu naike ewa, na «ãhã» yanyu ike ãhã, ile mwasupulihe hari mwa hukuma.

Mamilio yendza uaminifu

¹³ Hali v̄wa mutru mengoni mwanyu alio hari mwa djondo? Nafanye mamilio. Hali v̄wa alio hari mwa furaha? Nahedze utende.

¹⁴ Hali v̄wa mutru mengoni mwanyu alio muwaɗe? Nahire uwaɓole wa iDjama Ndziwaminifu wamufanyiye mamilio ha umuv̄aha matra ha lidzina la Raɓi.

¹⁵ Mamilio yendza uaminifu yatsohuyi umuwaɗe, na Mola atsomumidza. Neka afanya madhambi, atsoswamihiwayo.

¹⁶ Ɓasi namukuɓaliane madhambi yanyu wanyu na wanyu, tsena mumiliane Mungu wanyu na wanyu, ile pare muangale. Mumilio-Mungu wa mutuĩvu, uwo na ushindzi muhodari wa urendra.

¹⁷ Eliya aka mwanadamu mauri ɗe wasi. Afanya mamilio ha djitihadi amba v̄wasushuke vua, ɓasi kav̄washuka vua shiv̄andreju mwa tsi muda wa maha miraru na mezi sita.

¹⁸ Amwesa afanya mamilio ha mara yangina, ɓasi uwingu ushukidza vua, na ishiv̄andre ya tsi itowo mavuna yayo.

¹⁹ Wananyangu, neka mutru mengoni mwanyu adziɓausa na ikweli, ɓasi amba wangina amuregeza,

²⁰ namujuwe amba monyewe uregeza muãswifu v̄ahanu alatsiha, atsomuhuyi iroho na ufa, amwesa atsotsonga muzimio wa wengi wa madhambi.