YAKOƁU 4 - Ha`bari Ndjema ya I Maore

Mutru nadziɓause na ngushauku za shidunia

¹ Ulawa hav̄i zikondro, ulawa hav̄i zingumani zikao hari mwanyu? Hali tsi hari mwa zingushauku ziwanao hari mwa ziga zanyu?

² Musutamani ɓadi kamusina. Musuula na uonea uwivu, wala kamusushindra mwapara. Musushindrana na umana. Kamusina mana kamusufanya mamilio.

³ Neka musufanya mamilio, kamusupara mana musumia nnayi, pare mujiv̄idze ngushauku zanyu.

⁴ Wanyu wazindzi halisi! Afa kamusujua amba uwandzani na lidunia, uwo uãduwi na Mungu? Ɓasi mutru atsahao ake mwandzani wa lidunia, waye asudzifanya ãduwi wa Mungu.

⁵ Hali musufikiri amba uMuangishio usurongoa ɓure-ɓure amba: Mungu ana ushauku wa shi uwivu na iroho aiketsisa moni hatru?

⁶ Ɓadi asudjaãlia urehema wazidishiha iv̄o uMuangishio urongoao: «Mungu ukanyusha wao wadzionao, ɓadi waye udjaãlia urehema waekevu.»

⁷ Ɓasi namudzituĩse Mungu, mumukanyushe Iɓilisa, na waye atsomutralani.

⁸ Namumukuruɓiye Mungu, na waye atsomukuruɓiani. Namutwaharishe mihono yanyu, wanyu maãswifu, namurahatse ngumo zanyu, wanyu wendza roho zaãnisiha.

⁹ Namukane huzuni, mukane musiɓa, mulile. Tseso yanyu naigauhe musiɓa, na furaha yanyu igauhe hamu.

¹⁰ Namudzishukidze mbeli za Mola, na waye atsomuhedzani.

Usunamuwe munyaho

¹¹ Mwasusingidziane wananyangu. Mutru asingidziao mwananya wa shi uaminifu au anamuao mwananyahe, asusingidzia iSharia na uinamua. Na neka usunamua iSharia, v̄av̄o kusi mutru aiɗungao, ɓadi wa munamuzi.

¹² V̄wa moja tu ɗe alio Mutolezi-Sharia tsena Munamuzi, ne ɗe Uwo ashindrao ahuyi na uangamidza. Ɓadi wawe, wawe mbani ata unamuao munyaho?

Mwanadamu kashindri ka na yakini na trongo za meso

¹³ Ɓasi wanyu murongoao amba: «Leo au meso ritsendra hari mwa ɗago fulani, riv̄itse mwaha oho, rifanye ɓiashara, ripare faida»,

¹⁴ wakati ulio amba kamusujua uhayati wanyu namuna utsokao meso. Wanyu kuku liheao mara moja, lilawao.

¹⁵ Ɗe ikinyume ilazimu murongowe amba: «Neka Mola av̄endze, ritsoka hayi, amwesa rifanye ini au ile.»

¹⁶ Ɓadi av̄asav̄anu, musudziɓua hari mwa maoneyo yanyu. Kula muoneyo mauri ɗe uwo, uwo movu.

¹⁷ Ɓasi uwo ajuao ndjema yalazimu afanye ne kasuifanya, v̄av̄o asuãswi.