YAKOƁU 3 - Ha`bari Ndjema ya I Maore

Mutru naziye ulimi wahe

¹ Mwasuke wengi wa utsaha amba musomedze, wananyangu, mana musujua amba wasi risomedzao, ritsopara hukuma ndziro zaidi.

² Wasi piyasi ukwala ha namuna nyengi. Neka mutru kasukwala ha urongozi, uwo mutru arahara, ashindrao aziye piya mwili wahe.

³ Ramotria mahazamu moni na ihanyo ya farasi ile irituĩ, v̄av̄o risuendresa wajau piya umwili wayo.

⁴ Namuangaliye wajau zimarikaɓu: wala ukana amba izo ɓole, na amba pev̄o ndziro uzisukuma, izo uendresewa na mwana usukani mutiti, ha uɗunga mav̄endzeleo ya umuv̄ingizi.

⁵ Ɓasi ɗe namuna iyo wajau ulimi, iyo shiga titi hari mwa umwili, ɓadi uwo ushindrodzisifu na trongo ɓole. Namufikiri tu mwana moro namuna ushindrao uvudze shitsaha ha uɓole.

⁶ Na ulimi wajau, uwo moro. Uwo dunia la upeu liliona ɓandza hari mwa ziga za umwili watru. Uwo utria pandra piya umwili, na uvudza piya maendreleo ya maẽsha ya mutru, wakati ulio amba uwo-uwo uvudzwa na umoro wa Djahanama.

⁷ Piya aina za zinyama, rangu nyunyi, zirambao, na zinyama za ɓaharini, ushindra zitsungwe, tsena zitsungwa na umwanadamu,

⁸ ɓadi ulimi, kav̄u mutru ashindrao autsunge. Uwo upeu kautrulia, wajaya sumu liulao.

⁹ Ha uwo, wasi umusifu Mola amma Ɓaɓa, na ha uwo tsena wasi ulaãni wanadamu wafanyiwa mufano wa Mungu.

¹⁰ Ha ihanyo wiyo-wiyo ulawa umusifio na umulaãnio. Wananyangu, kayalazimu yaka namuna iyo.

¹¹ Hali dzitso la maji utoa hari mwa foro wilo-wilo maji ya ɓaridi na maji ya shingo?

¹² Wananyanguni, hali mufigiye ushindra udze zaituni, au muzaɓiɓu udze mafigi? Ɓasi dzitso la maji ya shingo wajau, kalishindri utoa maji manoha.

Hikima ya kweli

¹³ Uv̄i mengoni mwanyu alio mwendza hikima, tsena mwendza ujuzi? Ɓasi mutru uwo nav̄enuwe ha umuendreleo mwema wahe zitrendro zahe, ha umakini v̄umoja na hikima.

¹⁴ Ɓadi neka rohoni hanyu muna uwivu muhali, na taɓia ya udziwanilia, ɓasi mwasudzifahari, wala mwasulaɓe ikweli.

¹⁵ Hikima iyo tsi ɗe ilawao uju, ɓadi ya shiduniani, ya shiuɓinadamu, ya shiushetwani.

¹⁶ Mana v̄ahanu v̄ulio uwivu na taɓia ya udziwanilia, v̄av̄o uka musadjadja na kula aina ya taɓia mbi.

¹⁷ Hikima ya shi uju, iyo uka raɓuzi ndziraharifu, amwesa yendza amani, ndzitrulivu, tsena ndzielevu; iyo ujaya poreho, tsena ukana mavuna mema, ɓila uɓanguzi, wala unafiki.

¹⁸ Na mavuna ya ihaki utsanywa hari mwa amani na matria-amani.