YAKOƁU 2 - Ha`bari Ndjema ya I Maore

Utsahulivu kawalazimu waka

¹ Wananyangu, v̄wasuke uɓanguzi wa sura hari mwa uaminifu wanyu na Raɓi mutukufu watru Insa-Kristi.

² Neka ha mufano v̄usungia mutru v̄ahanu mungulidzanao amba atria pere ya dhahaɓu na vao lendza sheo, amwesa v̄usungia wajau masikini apindra marandro,

³ ɓasi amba musushapiha na ule apindra livao lendza sheo ha umuambia: «Wawe ketsi v̄anu hari mwa ɓandza la sheo lini», wakati ulio amba musuambia masikini ile: «Wawe hima hule», au: «Ketsi mindruni hangu»,

⁴ hali v̄av̄o kamusufanya uɓanguzi wa sura hari mwanyu, kamwafanyiha wanamuzi wendza fikira mbovu?

⁵ Namuvulishiye wananya wa shi uaminifu wav̄endzewa wangu: afa Mungu katsahua wao walio masikini mbeli za ulemengu, amba waka matadjiri hari mwa uaminifu, tsena mawarithi wa utawalizi autolea wahadi ha wao wamuv̄endzao?

⁶ Na wanyu musudharau zimasikini! Matadjiri yao tsi ɗe wamurendraoni nnayi na umuv̄ingani mbeli za mahakama mwa?

⁷ Hali wao tsi ɗe wadhilio liDzina dzuzuri livumbulwao hanyuju?

⁸ Ɓila shaka neka musutsimidza isharia ya shiufalume yalawana na uMuangishio amba: «Utsov̄endza munyaho mauri ɗe iwawe yaho», v̄av̄o musufanya ndjema.

⁹ Ɓadi neka musufanya utsahulivu, v̄av̄o musuãswi, na iSharia isumunamuani amba mwa maãswifu.

¹⁰ Na yotsi aɗungao piya iSharia, ne aja akwala hari mwa trundra moja tu, v̄av̄o afanyiha muãswifu hari mwa ukamilifu wayo.

¹¹ Mana Uwo arongoa: «Kutsofanya zina», arongoa wajau: «Kutsoula». Ɓasi neka kusufanya zina, ɓadi usuula, v̄av̄o ufanyiha muãswifu wa iSharia.

¹² Namulaguwe na urendra shi watru watsohukumulwao ulawana na sharia ya shi unafasi.

¹³ Mana hukuma kaikana poreho ha mutru kasuonesa poreho. Poreho, lilo ushindra hukuma.

Uaminifu kauna zitrendro kaukana faida

¹⁴ Wananyangu, faida trini ha mutru arongoao amba ana uaminifu, ne kasina zitrendro? Hali uaminifu ushindra umuhuyi?

¹⁵ Neka mwananya wa shi uaminifu mutruɓaɓa au mutrumama akosewa na ya upindra au kasina shahula ya umulela,

¹⁶ ɓasi amba moja hari mwanyu asumuambia: «Endra ha usalama, upare joro, amwesa ukure fetre» ɓila umuv̄a izo zalazimu pare aẽshi, itsokana faida trini?

¹⁷ Ɗe ha inamuna iyo na uaminifu: neka kausina zitrendro, uwo ufa dzawo monyewe.

¹⁸ Mukinishiha amba v̄wa atsorongoao: «Wawe una uaminifu, wami tsina zitrendro». Ɓasi nionese uaminifu waho kawaɗungana na zitrendro, na wami ha zitrendro zangu nitsohuonesa uaminifu wangu.

¹⁹ Usuamini amba Mungu moja? Usufanya fetre. Mazetwani uiamini wajau, tsena yasudridrima.

²⁰ Usutsaha udhiɓitifu, wawe shiumbe ndzijinga, amba uaminifu kawaɗungwa na zitrendro, uwo kauna mana?

²¹ Mudzaɗe watru Iɓrahima, afa kapara muhakisho ha siɓaɓu ya zitrendro, amba akotamania umwana wahe Isiaka hari mwa talatala ya masadaka?

²² Usuona v̄anu amba uaminifu uka uɗungwa na zitrendro zahe, na ha ulawana na zitrendro zizo, ɗe uaminifu wakamilishiha.

²³ Ɗe inamuna iyo ɗe urongozi wa uMuangishio unu watsimidziha: «Iɓrahima amuamini Mungu, na iyo itsongesha muhakikisho wahe», amwesa ahirwa mwandzani wa Mungu.

²⁴ Musuona amba ɗe ha ulawana na zitrendro ɗe shiumbe mwanadamu ihakishihao, ɓadi tsi ha uaminifu tu ɓasi.

²⁵ Rahaɓati lisusu kahakishiha wajau ha zitrendro iv̄o akariɓisa marengezi-haɓari, amwesa awaregeza ha uwav̄irisa ndzia yangina?

²⁶ Ɓasi mauri mwili kauna roho ukao amba ufu, ɗe inamuna iyo wajau, uaminifu kawaɗungwa na zitrendro ukao amba ufu.