TITUSA 3 - Ha`bari Ndjema ya I Maore

Masharuti ya muendreleo wa shi uaminifu

¹ Nahanidza watru wadzituĩse ha matawalizi na ha wendza yezi, wastehi, wake tayari ya kula shitrendro ndjema,

² wasutefuwe mutru atsokao yotsi, wake watrulivu, wasuke waguguru, ɓadi wake wema mbeli za piya wanadamu.

³ Mana wasi wajau, mara ya handra rika wajinga, wakaidi, wapotevu, warumwa wa piya zinamuna za ngushauku na za masterehi. Rakoẽshi hari mwa upeu na uwivu, rika wafudhuli, tsena rakoengana.

⁴ Ɓadi wakati uwema wa Mungu Muhuyifu watru na uv̄endza yahe uwanadamu zav̄enuha,

⁵ arihuyi, tsi amba rifanya zitrendro zamujiv̄ia, ɓadi ha urehema wahe monyewe. Arihuyi ha umuhoseo wa umudzalio muv̄ia, na umuregezeo-muv̄ia uv̄ingwao na iRoho Ndzitwaharifu,

⁶ ilio amba arienedzayo ha uwengi ha ndzia ya Insa-Kristi, Muhuyifu watru,

⁷ ile pare rangu rahakishiwa ha urehema wahe, rifanyihe mawarithi, ha itama ya uhayati mukamilifu wa daima.

⁸ Urongozi uwo kweli, amwesa natsov̄endza ushadidishe trongo zizo, ile wao wahetsi uaminifu wawo ha Mungu, wazidi udzishuhulisa ya ufanya zitrendro ndjema. Izo ɗe ndzuzuri, tsena zifayidishao wanadamu.

⁹ Ɓadi ɓauha mashindrano ya shiujinga, zinaswaɓa, ngumani, mifarikishano hari mwa iSharia, mana izo kazina mana wala faida.

¹⁰ Mutru atsongao mifarikishano, murudi mara ya handra, na ya v̄ili, ɓaanda ya v̄av̄o dziɓause na waye.

¹¹ Ujuwe amba mutru mauri ɗe uwo apotea, amwesa asuãswi. Ha izo asudzihukumu waye monyewe.

Malagidzo ya mwiso na masalamu

¹² Wakati nitsohuv̄elesheao Artemasu au Tihikusa, fanya haraka uje unipare Nikopolisa, mana v̄av̄o ɗe v̄ahali naãzimia niv̄itse uwakati wa ɓaridi.

¹³ Fanya djitihadi umusaidiye Zenasu, mutaãlamu wa iSharia, v̄umoja na Aɓulusu, na izo zawalazimu hari mwa umusafara, ile wasukosewe na itsokao yotsi.

¹⁴ Watru watru wajau walazimu wafundrihe udzihetsi ufanya zitrendro ndjema, ile zalazimu zilio mahususu ziparihane, isuke amba kawana mavuna.

¹⁵ Piya walio na wami wasuhusalimu. Salimu wao wariv̄endzao hari mwa uaminifu. Rehema naimuendreleyeni piyanyu.