TITUSA 2 - Ha`bari Ndjema ya I Maore

Trongo zalazimu zisomedzewe watru waaminifu

¹ Ɓadi wawe, somedza izo zalingana na umusomo wa kweli.

² Sariɓia watruɓaɓa wendza maha wake watru wakasidi, wendza hishima, waelevu, wake wahodari hari mwa uaminifu, uv̄endza na suɓira.

³ Watrumama wendza maha wajau, wakane maendreleo yastahiki watwaharifu. Ike amba wao kawatefua, wala wasuke walevi, ɓadi wasomedze zilio ndjema,

⁴ ile wasomedze watruwashe wanahirimu wav̄endze waume wawo na uwana,

⁵ wake waelevu, waraharifu, washahilihe na liɗago lawo, wake wema, wadzituĩse waume wawo, pare urongozi wa Mungu usukufuriwe.

⁶ Tria ɓari wajau wanahirimu watruɓaɓa wake waelevu.

⁷ Hari mwa piya zitrongo, dzihetsi uke mufano hari mwa zitrendro ndjema: musomo waho naurahare, uke mutru wa kusudi,

⁸ mwendza kauli ndjema kaishindraniha, ile uwo alio kinyume ajaye haya, ata asupare mbovu itsokao yotsi arirongoa.

⁹ uWarumwa nawadzituĩse ha wanyewe wawo hari mwa trongo piya, wawajiv̄idze, wasushindrane na wao,

¹⁰ wasuwahiɓiye, ɓadi nawaonese dahari uaminifu mukamilifu, ile wav̄e hishima hari mwa trongo piya umusomo wa Mungu, Muhuyifu watru.

¹¹ Mana irehema ya Mungu iv̄ingao uhuyifu ha piya wanadamu, iv̄enuha.

¹² Iyo urisomedza uhara ushirikina na zingushauku za lidunia lini, na uẽshi wakati wa leo unu ha namuna ndzielevu, ya haki, tsena ya shiĩɓada,

¹³ ha ulindra itama yendza ɓaraka, na umuv̄enulio wa utukufu wa Mungu muɓole watru na Muhuyifu watru, Insa-Kristi.

¹⁴ Adziv̄a waye monyewe ha tanafu yatru, ile arikombowe na piya uovu na utwaharisha ha waye monyewe umati ulio wahe, wendza djitihadi ya zitrendro ndjema.

¹⁵ Ɓasi izo ɗe zalazimu usomedze, utriye ɓari na urudia v̄umoja na yezi ndzikamilifu. V̄usuke ata mutru ahudharau.