MUV̄ENULIO 9 - Ha`bari Ndjema ya I Maore

¹ iMalayika ya tsano ivudzia liɓaragumu. Ɓasi tsiono nyora yapuliha shiv̄andreju mwa tsi ulawa mbinguni. Iv̄olwa umufunguo wa ishisima iwaswilishao Uzimu.

² Iɓua ishisima ya Uzimu, amwesa v̄uhelea mwesi mauri wa moro muɓole. liJua na ihawa zifanyiwa shidza ha umwesi wa ishisima.

³ Moni na umwesi v̄ale, v̄wakolawa maɗatra yakotsambadziha shiv̄andreju mwa tsi. Yav̄olwa ushindzi sawa na ushindzi wa nge za shi shiv̄andreju mwa tsi.

⁴ Yaambilwa yasurendreye mbovu liɗavu la ishiv̄andre ya tsi, ɓila shimea itsokao yotsi, wala muri utsokao yotsi, ɓadi tu ha wanadamu kawasina hari mwa uuso umuhuri wa Mungu.

⁵ Yav̄olwa ruhusa tsi ya uwaula, ɓadi ya uwatresa muda wa mezi mitsano. Na ishikodzo yakowatsongesha, ika mauri shikodzo ya nge neka ireme mutru.

⁶ Hari mwa zisuku zizo, wanadamu watsotsaha ufa, ne kawatsoupara. Watsotamani wafe, na ufa utsowatrala.

⁷ Maɗatra yao yakofana na farasi zatayarishiwa za kondro. Zitswani hayo v̄uka mauri kemba za dhahaɓu, na sura zayo zika mauri sura za wanadamu.

⁸ Yakana nyole mauri nyole za watrumama, na manyo yawo yaka mauri manyo ya simba.

⁹ Zifuɓani hayo v̄uka mauri magwezi ya shuma, na zikeme za maɓawa yayo zika mauri keme za magari ya farasi ha uwengi zendrao mbio kondroni.

¹⁰ Yakana mishia mauri ya nge yendza midzinyo ya sumu, na hari mwa yimishia yayo ɗe v̄waka ushindzi wa udhuru wanadamu hari mwa mezi mitsano.

¹¹ Wana mufalume awatawaliao, ne ɗe imalayika ya Uzimu, ilio amba lidzina layo Shiheɓraniya|Muheɓraniya Aɓadoni, na Shigiriki lidzina Apoliyoni.

¹² liDjondo la handra liv̄iri. Na tsiyo maondo maili yasuja raha ɓaanda ya v̄av̄o.

iMalayika ya sita isuvudzia liɓaragumu layo

¹³ Ɓas, imalayika ya sita ivudzia liɓaragumu layo. V̄ale tsikia ji lalawa hari mwa zinyonga nne za italatala ya masadaka ya dhahaɓu ilio mbeli za Mungu.

¹⁴ Na wilo lakoambia imalayika ya sita ile yakana liɓaragumu: «Ɓulia malayika nne zile zafungwa hari mwa umuro muɓole uhiriwao Efurati.»

¹⁵ Na v̄av̄o zimalayika nne zile zaka zatayarishiwa za isa, na isuku, na umwezi, tsena na umwaha, ziɓuliwa pare ziule lifungu la raru la uwanadamu.

¹⁶ Na iindadi ya madjeshi yaka yapandra farasi ika ipara laki alifu mbili. Tsikia iindadi.

¹⁷ Na hari mwa inida naiona, tsiono zifarasi na uwatru waka wazipandra namuna ini: Zifuɓani hawo wakana magwezi yendza range ya moro, murututu waiva, na dzindzano la shi vu la dzaha. ziZitswa za zifarasi zika mauri zitswa za simba, na hanyoni mwazo v̄wakolawa moro, mwesi, na vu dzindzano.

¹⁸ liFungu la raru la uwanadamu liulawa na maɓa mararu yao: ha umoro, ha umwesi, na ha livu dzindzano zakolawa hanyoni mwa zifarasi.

¹⁹ Mana ushindzi wa zifarasi wa hari mwa zihanyo zazo, na yimishia yazo. yiMishia yazo ufana na nyoha; yina zitswa na ɗe ha wizo ɗe yihodzao.

²⁰ Na uwanadamu wangina walio amba kawaulawa na maɓa yanu, kawandra toɓa na zitrendro za mihono yawo. Kawazia uãɓudu mazetwani na masanamwe ya dhahaɓu, ya fedha, ya shaɓa, ya ɓwe, na ya muri, zitru zilio amba kazishindri ona, ɓila ukia, wala uendra.

²¹ Kawandra toɓa na zitrendro ziangamifu zawo, ɓila ngutsayi zawo, uzindzi wawo, wala nguwidzi zawo.