MUV̄ENULIO 7 - Ha`bari Ndjema ya I Maore

Watru 144 000 watrilwa muhuri wa Mungu

¹ Ɓaanda ya v̄ale, tsiono malayika nne zahima hari mwa zikotso nne za ishiv̄andre ya tsi. Zakozia zipev̄o nne za ishiv̄andre ya tsi, ile v̄wasuke ata pev̄o yavudzia, tsi hari mwa ishiv̄andre ya tsi, tsi ɓaharini, wala ata hari mwa muri moja.

² Amwesa tsiono malayika yangina yakohea uv̄andre wa jua la uhea, tsena ika isiki umuhuri wa Mungu alio hayi. Ashelemedzea ha ji lendza nguvu zimalayika nne zile zaka zaãmurishiwa zifanyiye mbovu ishiv̄andre ya tsi na iɓahari, amba:

³ «Mwasurendreye mbovu ishiv̄andre ya tsi, ɓila iɓahari, wala yimiri, ata mupaka ritriye muhuri usoni mwa warumishi wa Mungu watru.»

⁴ Amwesa tsikia iindadi ya wale watrilwa umuhuri: watru alifu miya wa aruɓaini na nne (144 000) wa piya zingudjama za Israila:

⁵ Hari mwa udjama wa Yuda watru alifu kumi na mbili (12 000) watrilwa umuhuri, hari mwa udjama wa Ruɓen 12 000, hari mwa udjama wa Djadi 12 000,

⁶ hari mwa udjama wa Ashira 12 000, hari mwa udjama wa Nafutali 12 000, hari mwa udjama wa Manasi 12 000,

⁷ hari mwa udjama wa Sameana 12 000, hari mwa udjama wa Lawi 12 000, hari mwa udjama wa Isakari 12 000,

⁸ hari mwa udjama wa Zaɓuluna 12 000, hari mwa udjama wa Yusufu 12 000, na hari mwa udjama wa Ɓenyamini 12 000.

Nida yahusu idunia yapindra nguo ndjeu

⁹ Ɓaanda ya v̄ale, tsiono dunia ha uɓole ilio amba kav̄u ata mutru akoshindra aihasiɓu, ya kula nishani, kula kaɓila, kula umati, na kula luha. Waka wahimi mbeli na ishiri ya ufalume, tsena mbeli na uMwana Ɓariɓari, amwesa waka wapindri nguo ndjeu, wasiki na mahuri mihononi.

¹⁰ Wakoshelemedza ha ji lendza nguvu amba: «Ukombofu, uwo wa Mungu watru aketsi hari mwa ishiri ya ufalume, tsena wa uMwana Ɓariɓari.»

¹¹ Na piya zimalayika zika zihimi uzingidzia ishiri ya ufalume, uwadzaɗe, v̄umoja na ziumbe nne zendza roho zile. Wareme uso wawo v̄otsi mbeli na ishiri ya ufalume na usudjudia Mungu

¹² ha urongoa: «Amina! Sifa, utukufu, hikima, uhimidifu, hishima, ushindzi na nguvu nazimuendreleye Mungu watru mida ha mida. Amina!»

¹³ Ɓas moja hari mwa wadzaɗe wale arenge umurongo, anidzisa: «Wale wapindra zinguo ndjeu, wale watru trini, walawa hav̄i?»

¹⁴ Tsimudjiɓu: «Mutukufu, wawe usujua.» Amwesa aniambia: «Wao ɗe walawao hari mwa lidjondo ɓole. Wafua nguo zawo, wazifanya ndjeu hari mwa idamu ya uMwana Ɓariɓari.

¹⁵ Iyo ɗe imana ata ‹walio mbeli na ishiri ya ufalume ya Mungu, wasumufanyia ĩɓada uku na mutsana moni mwa iNyumba Ndzitwaharifu yahe. Monyewe uketsi hari mwa ishiri ya ufalume atsowav̄ishidza ha umukayo wahe.

¹⁶ Kawatsoona ndza tsena, wala kawatsoona nyora tsena. liJua kalitsowarema, wala hari kaitsowavudza.

¹⁷ Mana uMwana Ɓariɓari alio hari-hari na ishiri ya ufalume atsowatsunga na uwav̄inga hari mwa matso ya maji ya uhayati. Na Mungu atsov̄angua kula tsozi la matso yawo.› »