MUV̄ENULIO 5 - Ha`bari Ndjema ya I Maore

Nida yahusu iShio na uMwana Ɓariɓari

¹ Amwesa tsiono moni na umuhono wa hume wa ule aketsi hari mwa ishiri ya ufalume shio yav̄ambiwa, yaangihwa moni na v̄ondze, tsena yaɓalwa hari mwa maɓandza saɓa na liti yaremwa muhuri.

² Tsiono tsena malayika yendza ushindzi yakoshelemedza ha ji lendza nguvu amba: «Mbani ɗe astahiki upua ziliti, aɓuwe ishio?»

³ Ɓadi kav̄waka mutru yotsi, tsi mbinguni, ɓila shiv̄andreju mwa tsi, wala uzimu na ishiv̄andre ya tsi, akoshindra aɓuwe ishio, wala uiangalia.

⁴ Ɓasi tsilili ha kusudi, mana kav̄waka ata mutru aonehana amba astahiki uɓua ishio, ɓila uiangalia.

⁵ Sa ile moja hari mwa wadzaɗe wale aniambia: «Usulile! Tsini iSimba ya udjama wa Yuda, uMutse wa Daudu, ashindri: waye ushindra aɓuwe ishio yav̄erwa na ziliti saɓa zayo.»

⁶ Amwesa hari-hari na ishiri ya ufalume na ziumbe nne zendza roho zile, na hari-hari na wadzaɗe wale, tsiono Mwana Ɓariɓari ahima, aka mauri aka atsindzwa. Akana nyonga saɓa na matso saɓa, zilio ɗe roho saɓa za Mungu zav̄elehwa hari mwa piya ishiv̄andre ya tsi.

⁷ Andre arenge ishio hari mwa umuhono wa hume wa ule aketsi hari mwa ishiri ya ufalume.

⁸ Wakati arenga ishio, ziumbe nne zendza roho zile v̄umoja na uwadzaɗe shirini na wanne wale wasudjudia mbeli za uMwana Ɓariɓari. Kula moja aka asiki dzendze na zikombe za dhahaɓu zaka zajaya uɓani, ulio ɗe yamamilio ya watwaharifu.

⁹ Wakohimba djimbo pia ha urongoa: «Ustahiki urenge ishio, tsena upuwe ziliti zayo. Mana uka utsindzwa, amwesa ha idamu yaho, umununulia Mungu wanadamu wa kula kaɓila, kula luha, kula umati, na kula nishani.

¹⁰ Uwafanya wake ufalume wa Matolezi-Masadaka wa Mungu watru, tsena watsotawala hari mwa ishiv̄andre ya tsi.»

¹¹ Amwesa tsiangalia, tsikia ji la malayika nyengi zapara indadi ya mialifu na mialifu. iShiri ya ufalume ile ika izingidziwa na ziumbe zendza roho na wadzaɗe.

¹² Ha ji lendza nguvu wakorongoa: «uMwana Ɓariɓari aka atsindzwa astahiki apare ushindzi, utadjiri, hikima, nguvu, hishima, utukufu, na sifa!»

¹³ Amwesa kula shiumbe ilio mbinguni, uju na ishiv̄andre ya tsi, utsini na ishiv̄andre ya tsi na uju na iɓahari, piya zilio, tsizikia zakorongoa: «Ha Monyewe uketsi hari mwa ishiri ya ufalume na ha uMwana Ɓariɓari, sifa, hishima, utukufu na ushindzi daimani aɓada!»

¹⁴ Na ziumbe nne zendza roho zile zakorongoa: «Amina», na uwadzaɗe wale wakosudjudia na uãɓudu.