MUV̄ENULIO 4 - Ha`bari Ndjema ya I Maore

Nida yahusu ishiri ya yezi pev̄oni na Monyeweyo

¹ Ɓaanda ya izo tsiangalia, ɓasi tsiono mulongo waɓuha pev̄oni. Na ji la handra lile naka nalikia lakolagua na wami mauri ɓaragumu, lirongoa: «Hea hunu, na wami nitsohuonesa izo zalazimu zihidjiri ɓaanda ya v̄anu.»

² Sa ile tsisikwa na iRoho. Na tsio, v̄uka shiri ya ufalume pev̄oni, na hari mwa ishiri ya ufalume ile v̄uka v̄uketsi mutru.

³ Ule aka aketsi, akana sura ya ɓwe lendza thamani lihiriwao jaspe na langina lihiriwao saridiwani. Na ishiri ya ufalume ika izingidziwa na mukakamba wakofana na ɓwe lendza thamani lihiriwao emerudi.

⁴ Hari mwa ishiri ya ufalume ile, v̄uka v̄uzingidzia ziri za ufalume shirini na nne. Hari mwa ziri za ufalume zile, v̄uka v̄uketsi wadzaɗe shirini na wanne waka wapindra nguo ndjeu, na kemba ya dhahaɓu shitswani hawo.

⁵ Hari mwa ishiri ya ufalume ile v̄wakolawa peni, maji na maguguma. Mbeli na ishiri ya ufalume, v̄wakovua zizinga za moro saɓa, zilio ɗe ziroho saɓa za Mungu.

⁶ Na mbeli mwa ishiri ya ufalume v̄uka mufano wa ɓahari ya shiɗo yakofana na ɓwe lendza thamani lihiriwao kristali. Hari-hari na ishiri ya ufalume na ha uzingidzia ishiri ya ufalume, v̄uka ziumbe nne zendza roho zaka zajaya matso mbeli na unyuma.

⁷ iShiumbe yendza roho ya handra yakofana na simba, ishiumbe yendza roho ya v̄ili yakofana na mwana kondzo wa nyombe, ishiumbe yendza roho ya raru ikana mufano wa sura ya mwanadamu, na ishiumbe yendza roho ya nne yakofana na kwezi liv̄euhao.

⁸ ziZiumbe nne zendza roho zile zikana kula moja maɓawa sita, tsena zikana matso wavuni piya na moni. Mutsana na uku kazisuzia urongoa: «Mutwaharifu, Mutwaharifu, Mutwaharifu ɗe Mola Mungu, Monyewe Ushindzi, Uwo aka, alio, tsena ajao.»

⁹ Na kula wakati ziumbe zendza roho zile zitukuzao, zihishimuo, na uhimidia Monyewe uketsi hari mwa ishiri ya ufalume, Uwo aẽshio daima,

¹⁰ uwadzaɗe shirini na wanne wale wasusudjudia ule aketsi hari mwa ishiri ya ufalume, wasuãɓudu Monyewe uẽshi ha daima, na ulisha kemba zawo mbeli za ishiri ya ufalume ha urongoa:

¹¹ «Ustahiki Mola, Mungu watru, upare utukufu, hishima, na ushindzi, mana wawe ɗe waumba piya, ɗe ha mav̄endzeleo yaho ɗe zilio, tsena zaumbwa.»