MUV̄ENULIO 3 - Ha`bari Ndjema ya I Maore

Malagidzo ha iDjama Ndziwaminifu ya Sardesu

¹ «Angishia imalayika ya iDjama Ndziwaminifu ya Sardesu zini: Zini ɗe zirongolwao na uwo aliona ziroho saɓa za shi Mungu na zinyora saɓa. Nisujua zitrendro zaho. Nisujua amba usurongolesheha amba wa hayi, ɓadi ufu.

² Ka hashiri! Tria ɓari wao walio kariɓu na ufa, mana tsapara zitrendro zaho amba za ndzikamilifu mbeli za Mungu wangu.

³ Nahana ɓasi iyo wapara, iyo wakia, amwesa uisike, wendre toɓa. Neka kusi hashiri, nitsoja mauri mwidzi, na wawe kutsojua ata hata isa nitsohujiliao.

⁴ Ata namuna iyo, una ɓaãdhwi ya watru Sardesu kawatria tsama nguo zawo. Watsendra v̄umoja na wami ha nguo ndjeu, mana waistahiki.

⁵ V̄av̄o uwo ashindra atsopindra nguo ndjeu; tsitsozima ata hata lidzina lahe moni na ishio ya uhayati, tsena nitsokuɓali dzina lahe mbeli za Ɓaɓangu na mbeli za zimalayika zahe.

⁶ Mwendza makio, nakiye izo iRoho aambiao ziDjama Ndziwaminifu.»

Malagidzo ha iDjama Ndziwaminifu ya Filadelfiya

⁷ «Angishia imalayika ya iDjama Ndziwaminifu ya shi Filadelfiya zini: Zini ɗe zirongolwao na Uwo alio Mutwaharifu amma Kweli, Monyewe ukana umufunguo wa Daudu, Monyewe aɓuao wala kav̄u aɓalao, tsena aɓalao wala kav̄u aɓuao.

⁸ Nisujua zitrendro zaho. Tsini tsihetsi mbeli zaho mulongo waɓuha ulio amba kav̄u mutru ashindrao auɓale. Mana nguvu zaho shashi, ɓadi usiki urongozi wangu, wala kwahara lidzina langu.

⁹ Nitsohuv̄a ɓaãdhwi ya watru wa idjama iãɓuduo Shetwani wadzihirao Mayahudi, wala kawasi: wasurongoa trambo. Tsami nisuwav̄eleha waje wavundze malondro mbeli zaho, amwesa wajuwe amba wami tsihuv̄endze.

¹⁰ Rangu wasika urongozi wangu amba usuɓiri, wami wajau nitsohusika wakati wa umudjereɓio utsojao hari mwa piya ishiv̄andre ya tsi iketsiwao, pare udjereɓu uwakazi wa ishiv̄andre ya tsi.

¹¹ Nisuja tsi hale. Sika iyo ulionayo, ile v̄usuke ata mutru arenga ikemba yaho.

¹² Uwo ashindra nitsomufanya ake ngidzo moni na iNyumba Ndzitwaharifu ya Mungu wangu, tsena katsoilawia ata idahari. Nitsoangiha uju mwaye lidzina la Mungu wangu, na lidzina la liɗago la Mungu wangu, iYerusalemu pia ishukao ulawa pev̄oni ha Mungu wangu. Nitsoangiha raha uju mwaye lidzina pia langu.

¹³ Mwendza makio nakiye izo iRoho aambiao ziDjama Ndziwaminifu.»

Malagidzo ha iDjama Ndziwaminifu ya Laodiseya

¹⁴ «Angishia imalayika ya iDjama Ndziwaminifu ya Laodiseya zini: Tsizini izo zirongolwao na iAmina|Amina, lishahidi dziaminifu, tsena la kweli, koho la liɓuumbio la Mungu.

¹⁵ Nisujua zitrendro zaho: kusi ɓaridi wala moro. Na djeli tu amba uka ɓaridi au moro!

¹⁶ Ha izo, iv̄o ulio fumbu, kusi moro wala ɓaridi, nisujohurav̄iha ulawa hanyoni hangu.

¹⁷ Mana usurongoa amba: ‹Tsa tadjiri, tsitadjirishiha, tsisutama itsokao yotsi›, ɓila ujua amba iwawe yaho djondo, wa uv̄orehwa, masikini, mufa-matso, tsena wa wadzi.

¹⁸ Nisuhusariɓia ununuwe dhahaɓu hangu ilio amba iswafishiha ha moro, ile utadjirishihe; ununuwe nguo ndjeu, ile ike amba upindri, pare iaĩɓu ya wadzi waho yasuv̄enuhe; na ɗalao la utria matsoni pare uone.

¹⁹ Wav̄endzewa wangu piya wami uwarudi na uwafundra. Ɓasi kana djitihadi, tsena wendre toɓa.

²⁰ Tsami, nisuhima mulongoju, nisurema hodi. Neka mutru asukia ji langu aɓua umulongo, nitsongia hahe, nitsoɗya v̄umoja na waye, tsena waye na wami.

²¹ Ha uwo ashindra, nitsomuv̄a aketsi v̄umoja na wami hari mwa ishiri ya ufalume yangu, mauri wami namuna nashindra, tsena naketsi v̄umoja na Ɓaɓangu hari mwa ishiri ya ufalume yahe.

²² Mwendza makio nakiye izo iRoho aambiao ziDjama Ndziwaminifu.»