MUV̄ENULIO 21 - Ha`bari Ndjema ya I Maore

Nida yahusu pev̄o pia na shiv̄andre ya tsi pia

¹ Ɓas, tsiono pev̄o pia na shiv̄andre ya tsi pia, mana ipev̄o ya handra na ishiv̄andre ya tsi ya handra zika zihiɓu, na iɓahari kayaka tsena.

² Amwesa tsiono ushuka ulawa pev̄oni ha Mungu liƊago Dzitwaharifu, iYerusalemu pia, yatayarishiwa mauri mutrumushe arengeledzewa apare mume wahe.

³ Tsikia ulawa hari mwa ishiri ya ufalume ji lendza nguvu larongoa: «Tsini, makazi ya Mungu ya v̄umoja na uwanadamu. Atsoẽshi v̄umoja na wao, na wao watsoka umati wahe, na Mungu waye-waye atsoka na wao.

⁴ Atsov̄angua kula tsozi matsoni hawo; ufa kautsoka tsena, wala kav̄utsoka tsena musiɓa, ɓila shililo, wala utungu, mana trongo za handra ziv̄iri.»

⁵ Na Ule aka aketsi shiriju mwa ufalume arongoa: «Tsini, nisufanya amba piya zike pia!» Arongoa raha: «Angiha, mana marongozi yao yastahiki uaminifu, tsena kweli.»

⁶ Aniambia tsena: «Zitsimidziha. Wami ɗe Alfa na Omega, uMwandro, na uMwiso. Uwo aliona nyora, nitsomuv̄a anwe hari mwa lidzitso la maji ya uhayati ɓila uliv̄a.

⁷ Uwo ashindra, atsoarithi trongo zini. Nitsoka Mungu wahe, na waye atsoka mwana wangu.

⁸ Ɓadi wao tsi watru wasuɓutu, wao tsi maaminifu, watshafi, maula, wendza taɓia, wafanyizi-utsayi, maãɓudu-masanamwe, na piya wanafiki, fungu lawo litsoka moni mwa lidzaha la moro livudzao na vu la shidzaha: uwo ɗe ufa wa v̄ili.»

Nida yahusu iYerusalemu Pia

⁹ Ɓaanda ya v̄ale, moja mengoni mwa zimalayika saɓa zaka zasika zizikombe saɓa zaka zajaya yamaɓa saɓa ya mwiso ija iniambia: «Ko, na wami nitsohuonesa umushe-harusi, mutrumushe wa uMwana Ɓariɓari.»

¹⁰ Ɓas, iniv̄ingi shiroho uju na mulima muɓole, tsena mundra, inionesa liƊago Dzitwaharifu, iYerusalemu, yakoshuka ulawa pev̄oni ha Mungu,

¹¹ yakowala ha utukufu wa Mungu. Muvagio wayo uka mauri wa ɓwe lendza thamani, ɓwe lihiriwao jaspe, wakoonea mauri shiɗo.

¹² Ikana ngome ɓole amwesa ndzundra, tsena ikana milongo kumi na mili, na uju na yimilongo v̄uka malayika kumi na mbili. Tsena hari mwayo v̄uka v̄uangihwa yamadzina ya zingudjama kumi na mbili za Israila.

¹³ Uv̄andre wa jua la uhea v̄uka milongo miraru, kiɓulani milongo miraru, swihilini milongo miraru, na jua la utswa milongo miraru.

¹⁴ iNgome ya liɗago ikana misingi kumi na mili, yaka yaangihwa yamadzina kumi na maili ya yaMav̄ingizi-Risala|Mav̄ingizi-Risala kumi na maili ya uMwana Ɓariɓari.

¹⁵ Ule akolagua na wami, akana shiv̄imo ya tsimbo ya dhahaɓu, ile av̄ime liɗago, milongo yalo, na ingome yalo.

¹⁶ liƊago likana nguv̄andre sawa, ule walo uka sawa na uv̄ana. Iv̄imi liɗago ha itsimbo. Likana ziv̄imo alifu kumi na mbili (12 000): uule, uv̄ana, na uundra walo zika sawa.

¹⁷ Iv̄imi wajau ingome, ipara ziv̄imo za mihono miya wa aruɓaini na nne (144), shiv̄imo ya shimwanadamu imalayika yakoirumia.

¹⁸ iNgome ika iundrwa ha jaspe, na liɗago lika ha dhahaɓu sahe-sahe, mufano wa shiɗo sahe-sahe.

¹⁹ yiMisingi ya ingome ya liɗago yika yiɗaidziwa ha kula aina ya ɓwe lendza thamani. uMusingi wa handra uka ha jaspe, wa v̄ili ha safira, wa raru ha kalsedwani, wa nne ha emerudi,

²⁰ wa tsano ha sardoniksi, wa sita ha saridiwani, wa saɓa ha krisoliti, wa nane ha berili, wa shendra ha topazi, wa kumi ha krisoprasi, wa kumi na moja ha hiyasenti, wa kumi na mbili ha ametisti.

²¹ yiMilongo kumi na mili yika lulu zendza thamani kumi na mbili. Kula moja hari mwa yimilongo uka ha lulu moja. iNdzia ɓole ya liɗago ika ha dhahaɓu sahe-sahe, mauri shiɗo ioneao.

²² Tsaona Nyumba Ndzitwaharifu v̄ale, mana Mwalatru Mungu, Monyewe Ushindzi, ɗe iNyumba Ndzitwaharifu yalo, v̄umoja na uMwana Ɓariɓari.

²³ liƊago kalatama lijua ɓila umwezi amba ziliwaliye, mana utukufu wa Mungu usuliunishia, na kombe lalo ɗe uMwana Ɓariɓari.

²⁴ ziNishani zitsoendra ha iheu yalo, na yamafalume ya shiv̄andreju mwa tsi yatsoliv̄ingia utukufu wawo.

²⁵ Milongo yalo kayitsoɓalwa mutsana, mana v̄av̄o kav̄utsoka uku.

²⁶ V̄utsov̄ingwa moni v̄av̄o utukufu na ihishima za zinishani.

²⁷ Kav̄utsongia ata hata shitru ya tsama itsokao yotsi moni v̄ale, wala yotsi afanyao trongo kazalazimu au za trambo, ɓadi ɗe wao tu waangihwa hari mwa ishio ya uhayati ya uMwana Ɓariɓari.