MUV̄ENULIO 2 - Ha`bari Ndjema ya I Maore

Malagidzo ha iDjama Ndziwaminifu ya Efeso

¹ «Angishia imalayika ya iDjama Ndziwaminifu ya Efeso zini: Zini ɗe zirongolwao na uwo asikao zinyora saɓa hari mwa umuhono wa hume wahe, uwo andrao hari-hari na zizihetsi-kombe saɓa za dhahaɓu:

² Wami ujua zitrendro zaho, ihazi yaho, na ustahamilivu waho. Nisujua amba wawe kushindri ustahamilia waovu. Uv̄imi wao wadzifanyao mav̄ingizi-risala ne kawasi, amwesa uwapara wanafiki.

³ Wawe mustahamilivu, uondesheha ha siɓaɓu ya lidzina langu, tsena kwapuha ɓari.

⁴ Ɓadi iyo nilionayo kinyume na wawe, ɗe iv̄o wajeledza uv̄endza yaho ya mwandro.

⁵ Ɓasi nahana uka yaho kaɓula ya upuliha. Endra toɓa, urudi hari mwa zitrendro za handra zaho. Neka tsi namuna iyo nitsohujilia, tsena nitsotoa shihetsi-kombe yaho ɓandzaju hayo, ɓadi neka wendre toɓa.

⁶ Ata wala ukana iyo, ne una ndjema ini, amba usutukiwa na zitrendrwa za Manikolayiti, zitrendrwa zilio amba wami-wami utikiwa nazo.

⁷ Mwendza makio nakiye izo iRoho aambiao ziDjama Ndziwaminifu! Ha uwo ashindra, nitsomuv̄a aɗye mavuna ya umuri wa uhayati ulio hari mwa ipev̄o ya Mungu.»

Malagidzo ha iDjama Ndziwaminifu ya Smirna

⁸ «Angishia imalayika ya iDjama Ndziwaminifu ya Smirna zini: Zini ɗe zirongolwao na Monyewe wa Handra, amma wa Hwisa, afa, amwesa aregea hayi.

⁹ Nisujua matreso yaho na usikini waho, wala ukana amba wawe tadjiri. Tsena nisujua zinaĩ urongolwaozo na wao wadzihirao Mayahudi wala kawasi, ɓadi walio djama iãɓuduo Shetwani.

¹⁰ Usuriye trongo zijao zihupare. V̄anu Iɓilisa asuja apulise ɓaãdhwi mengoni mwanyu shiv̄ani ile pare mudjereɓihe; mutsopara suku kumi za matreso. Ɓaki muaminifu mupaka hari mwa ufa, na wami nitsohuv̄a likara la uhayati.

¹¹ Mwendza makio, nakiye izo iRoho aambiao ziDjama Ndziwaminifu! Uwo ashindra, katsodhurushiha na ufa ya v̄ili.»

Malagidzo ha iDjama Ndziwaminifu ya Pergamu

¹² «Angishia imalayika ya iDjama Ndziwaminifu ya Pergamu zini: Zini ɗe zirongolwao na Monyewe ukana upanga utsindzao wendza nguso mbili:

¹³ Nisujua v̄ahanu uẽshio: v̄av̄o ɗe v̄ulio ishiri ya yezi ya Shetwani. Ususika hodari lidzina langu, tsena kwalatsa uaminifu na wami, ata hari mwa zisuku Antipasi, shahidi muaminifu wangu akoulawa hanyu, v̄ahanu Shetwani aẽshio.

¹⁴ Ɓadi tsina kinyume na wawe ɓaãdhwi ya zitru tsizini: haho una watru waɗungao musomo wa Ɓalahamu alio amba akomusariɓia Ɓalaki atsonge umukwaliso wa Israila ha uwasariɓia waɗye nyama yakotolewa sadaka masanamwe, na ufanya uzindzi.

¹⁵ Na haho wajau, una watru wafungana na umusomo wa Manikolayiti.

¹⁶ Ɓasi endra toɓa! Neka tsi namuna iyo nitsohujilia tsi hale, niwane na wao ha upanga wa ihanyo yangu.

¹⁷ Mwendza makio nakiye izo iRoho aambiao ziDjama Ndziwaminifu! Uwo ashindra, nitsomuv̄a fungu hari mwa ishahula yatsitswa ihiriwao manna, tsena ɓwe djeu. Na hari mwa liɓwe lilo v̄uangihwa dzina pia lilio amba kav̄u mutru alijuao neka tsi ɗe uwo aliparao.»

Malagidzo ha iDjama Ndziwaminifu ya Tiyatira

¹⁸ «Angishia imalayika ya iDjama Ndziwaminifu ya Tiyatira zini: Tsizini izo zirongolwao na uMwana wa Mungu, Uwo aliona matso mauri jenge la moro, na yimindru yifanao na shaɓa iv̄ev̄enao hari mwa moro.

¹⁹ Nisujua zitrendro zaho, uv̄endza yaho, uaminifu waho, urumishi waho, na ustahamilivu waho; na zitrendro za mwiso zaho zazidi za handra.

²⁰ Ɓadi trongo nilionayo kinyume na wawe, ɗe amba usulisha mutrumushe Djezaɓeli ule adzifanyao amba asujudza marongozi ya shi mutrume ashukidziwao, asomedze na upoteza warumishi wangu wafanye taɓia mbi na uɗya nyama zatolewa sadaka masanamwe.

²¹ Tsimuv̄a wakati amba andre toɓa, ɓadi kasutsaha andra toɓa na taɓia mbovu zahe.

²² Tsami nisumuv̄eleha hari mwa shitrandra ya djondo, waye na wao wafanyao zitaɓia na waye, ɓadi neka wasendra toɓa na zitrendrwa zahe.

²³ Nitsoangamidza wana wahe ha uwaula. Na piya ziDjama Ndziwaminifu zitsojua amba wami ɗe nitsungiyao zifikira na ziroho, tsena nitsov̄a kula moja hari mwanyu ulawana na zitrendro zahe.

²⁴ Ɓadi yahusu wanyu piya wangina wa shi Tiyatira kamwaɗunga musomo uwo, wala kamwaparojua ‹zilindri za Shetwani›, mauri ɗe inamuna warongoao, ɓasi nisurongoa amba tsisumutrihisani mudzo wangina.

²⁵ Ɓadi iyo mulionayo, namuisike hodari ata mupaka nije.

²⁶ Ha uwo ashindra na usika ata mwiso zitrendro zangu, nitsomuv̄a yezi hari mwa zinishani.

²⁷ ‹Atsowatsunga ha tsimbo ya shuma, mauri mutru apasuao ziya za ɗongo.› Nitsomuv̄a ushindzi, mauri wami wajau namuna naupara ha Ɓaɓangu.

²⁸ Tsena nitsomuv̄a inyora ya alifadjiri.

²⁹ Mwendza makio nakiye izo iRoho aambiao ziDjama Ndziwaminifu.»