MUV̄ENULIO 17 - Ha`bari Ndjema ya I Maore

Nida yahusu uangamifu wa Ɓaɓiluna yafanisiwa na susu

¹ Amwesa moja mengoni mwa zimalayika saɓa zaka zasika zizikombe saɓa ija iniambia amba: «Ko, na wami nitsohuonesa ihukuma ya lisusu ɓole laketsi wangoni na maji ha uwengi.

² Ɗe v̄umoja na waye ɗe yamafalume ya ulemengu yakofanya zina, na uwakazi wa shiv̄andreju mwa tsi wakolewa ha ushi wa ususu wahe.»

³ Ɓasi iniv̄ingi shiroho hari mwa padza. V̄ale tsiono mutrumushe aketsi uju na shinyama ndzukundru yajadzwa muangishio wa madzina ya ukufurina, amwesa ikana zitswa saɓa na nyonga kumi.

⁴ Mutrumushe uwo aka apindri nguo zendza range za muzambarau na ndzukundru, amwesa akovaga ha dhahaɓu na mawe yendza thamani, v̄umoja na lulu zendza thamani. Aka asiki muhononi shikombe ya dhahaɓu yaka yajaya zitru zendza nagisi na tsama za ususu wahe.

⁵ Hari mwa uso wahe v̄uka v̄uangihwa dzina la shifumbo amba: Ɓaɓiluna uMuɓole, mama wa yamasusu na ngudhilifu za ishiv̄andre ya tsi.

⁶ Tsiono mutrumushe ule amba alewe ha idamu ya watwaharifu na idamu ya mazahidi wa Insa. Umuona yangu, tsiremwa na ushangavu muɓole.

⁷ Ɓasi imalayika inidzisa: «Manatrini washanga? Nitsohuambia lifumbo lahusu umutrumushe na ishinyama mbovu imuv̄ingao iliona zizitswa saɓa na zinyonga kumi.

⁸ iShinyama mbovu ile waiona ika, ɓadi kaisi tsena. Isuja iheye ulawa Uzimu, amwesa yendre yaangamiye. uWakazi wa ishiv̄andre ya tsi yamadzina kayaka yaangihwa hari mwa ishio ya uhayati rangu uumuumbio wa lidunia, watsoshanga uona yawo ishinyama mbovu, mana ika, kaisi tsena, amwesa itsorudi ike.

⁹ V̄anu ɗe v̄utsahao ãkili yendza hikima. Zitswa saɓa zile, yiyo milima saɓa yilio amba mutrumushe ule ayiketsia.

¹⁰ Wao tsena wafalume saɓa, walio amba watsano wapuliha, moja a v̄av̄o, moja raha kaja; na amoja, alazimu aɓaki wakati mushashi.

¹¹ iShinyama mbovu ile yaka, kaisi tsena, wiyo-wiyo mufalume wa nane, alio wajau moja mengoni na saɓa wale, na iyo isendra hari mwa uangamifu.

¹² ziNyonga kumi waziona, zile wafalume kumi walio amba raha kawapara utawalizi, ɓadi watsoparao yezi ya shiufalume v̄umoja na ishinyama mbovu muda wa sa moja.

¹³ Wana nia moja, tsena wasuv̄a ishinyama mbovu ushindzi wawo na yezi yawo.

¹⁴ Watsofanya kondro kinyume na uMwana Ɓariɓari, na uMwana Ɓariɓari atsowashindra, mana waye Raɓi wa yamaraɓi, tsena Mufalume wa yamafalume, na v̄umoja na waye, wao wahiriwa, watsahulwa, uwaaminifu.»

¹⁵ Amwesa iniambia: «yaMaji wayaona yalio amba lisusu liyaketsia, zile ngumati, dunia za wanadamu, nishani na luha.

¹⁶ ziNyonga kumi waziona na ishinyama mbovu zitsoja zienge lisusu. Zitsolirav̄a na ulilisha wadzi, ziɗye umwili wahe, na ulivudza ha moro.

¹⁷ Mana Mungu awatria rohoni watsimidze inia yahe, wakane nia moja na uv̄a ishinyama mbovu ufalume wawo, ata mupaka yamarongozi ya Mungu yatsimidzihe.

¹⁸ uMutrumushe wamuona, ɗe liɗago ɓole liliona ufalume hari mwa uwafalume wa ishiv̄andre ya tsi.»