MUV̄ENULIO 16 - Ha`bari Ndjema ya I Maore

Nida yahusu zizikombe saɓa za ihadhaɓu ya Mungu

¹ Wakati ule tsikia ji lendza nguvu lalawa hari mwa iNyumba Ndzitwaharifu, liambia zimalayika saɓa zile: «Namwendre mwaɓuhudze shiv̄andreju mwa tsi zizikombe saɓa za ihadhaɓu ya Mungu.»

² iMalayika ya handra yendre iɓuhudza shikombe yayo shiv̄andreju mwa tsi. Sa ile v̄uhea shondra mbovu yendza utungu hari mwa uwanadamu wakana iãlama ya ishinyama mbovu ile, tsena wakoãɓudu sanamwe layo.

³ iMalayika ya v̄ili iɓuhudza ishikombe yayo ɓaharini, na wiyo ifanyiha damu mauri ya mutru afa. Ɓasi piya ziumbe zendza roho zaka ɓaharini zifu.

⁴ iMalayika ya raru iɓuhudza ishikombe yayo hari mwa yimiro na yamatso ya maji, na yao yafanyiha damu.

⁵ Wakati ule tsikia imalayika ya yamaji irongoa: «Wawe wa haki, wawe ulio, tsena waka, wawe uMutwaharifu, iv̄o wanamua namuna iyo.

⁶ Mana watri idamu ya watwaharifu na yimitrume, na wawe uwav̄a damu wanwe; izo ziwastahiki!»

⁷ Amwesa tsikia italatala ya masadaka irongoa: «Ewa, Mwalatru Mungu, Monyewe Ushindzi, yiminamuzi yaho ya kweli, tsena ya haki.»

⁸ iMalayika ya nne iɓuhudza shikombe yayo hari mwa lijua, na wilo liv̄olwa livudze uwanadamu ha umoro.

⁹ Ɓasi uwanadamu wavuwu ha itsav̄e ɓole yalo; na wao wakokufuru lidzina la Mungu aliona iyezi hari mwa yamaɓa yale, ɓadi kawandra toɓa waja wamutukuza.

¹⁰ iMalayika ya tsano iɓuhudza ishikombe yayo hari mwa ishiri ya ufalume ya ishinyama mbovu, ata v̄ahanu yakotawala v̄ungia shidza. Ɓasi watru wakodzikamanyo uulimi ha utungu.

¹¹ Wakomukufuru Mungu Monyewe ziMbingu ha siɓaɓu ya ngutungu zawo na zizondra, ɓadi kawandra toɓa na zitrendrwa zawo.

¹² iMalayika ya sita iɓuhudza ishikombe yayo hari mwa umuro muɓole wa Efurati. Ɓas, maji yaha, ile indzia ya wafalume wajao ulawa Jua la Uhea itayarishihe.

¹³ Amwesa tsiono v̄ulawa hanyoni ha ishinyama ɓole mufano wa vwayi ile, na hanyoni ha ishinyama mbovu, na hanyoni ha umutrume wa trambo, madjini maovu mararu yakofana na ziwatrotro.

¹⁴ Yao madjini ya mazetwani yafanyao ãlama za midjuza na uendra ha uwafalume wa piya ishiv̄andre ya tsi iketsiwao, ile yawangulidze wa ikondro ya iSuku Ɓole ya Mungu Monyewe Ushindzi.

¹⁵ Tsami nisuja mauri mwidzi. Aɓarikishiha uwo alio hashiri, tsena aliona nguo zahe ile asuke wadzi, iaĩɓu yahe isuonehane.

¹⁶ Yawangulidza v̄ahanu v̄uhiriwao Harmagedoni Shiheɓraniya|Muheɓraniya.

¹⁷ iMalayika ya saɓa iɓuhudza ishikombe yayo hawani. Ɓasi v̄ulawa moni na iNyumba Ndzitwaharifu ji lendza nguvu hari mwa ishiri ya ufalume, lirongoa: «Itsimidziha!»

¹⁸ Wakati ule v̄uv̄ene peni, v̄ukilihana maji, maguguma, na mudridrimio muɓole wa ishiv̄andre ya tsi kawaparoka rangu mida wanadamu walio shiv̄andreju mwa tsi.

¹⁹ liƊago ɓole liãnisiha mafungu mararu. yaMalago ya zinishani yatsapuha-tsapuha, na v̄ale Mungu anahana Ɓaɓiluna liBole, alinosa ishikombe ya ushi wa ihadhaɓu ɓole yahe.

²⁰ Ɓasi piya zisiwa zihiɓu, na yimilima kayaparihana tsena.

²¹ Vua ɓole yafa ɓwe lilio amba kula moja likana udziro wa shiv̄imo moja ishukia wanadamu ulawa pev̄oni; na wanadamu wamukufuru Mungu ha siɓaɓu ya liɓa la ivua yafa ɓwe, mana lika dziro halisi.