MUV̄ENULIO 15 - Ha`bari Ndjema ya I Maore

Nida yahusu malayika saɓa na yamaɓa saɓa ya mwiso

¹ Amwesa tsiono tsena ãlama ya midjuza yangina pev̄oni, ɓole itaãdjaɓisao: malayika saɓa zaka zasika yamaɓa saɓa ya mwiso, mana ha yao ɗe ihadhaɓu ya Mungu itsimidzihao.

² Tsiono tsena mauri ɓahari ya shiɗo yatsangana na moro, na wale washindra ishinyama mbovu na lisanamwe layo, na ihisaɓu ya lidzina layo, waka wahimi uju na iɓahari ya shiɗo ile, tsena waka wasiki yamadzendze ya Mungu.

³ Wakohimba lidjimbo la Musa, umurumishi wa Mungu, na lidjimbo la uMwana Ɓariɓari: «Zitrendro zaho ɓole zendza ãdjaɓu, Mola Mungu, Monyewe ushindzi. Ndzia zaho za haki, tsena za kweli, wawe uMufalume wa zinishani.

⁴ Mbani katsoria, wala katsotukuza dzina laho Mola? Mana wawe weke ɗe Mutwaharifu. Na piya zinishani zitsoja, amwesa zitsosudjudia mbeli zaho, mana uhaki waho uv̄enuha.»

⁵ Ɓaanda ya v̄ale tsiono iNyumba Ndzitwaharifu|Nyumba Ndzitwaharifu, liƁanga la Haima la Ushahidi liɓulwa pev̄oni,

⁶ na zimalayika saɓa zaka zasika yamaɓa saɓa zilawa hari mwa iNyumba Ndzitwaharifu. Zika zipindri nguo za kitani sahe-sahe zakowala, amwesa zika ziɓanga na mikandra ya dhahaɓu shifuɓani.

⁷ Wakati ule moja mengoni mwa ziziumbe nne zendza roho zile iv̄a zimalayika saɓa zile zikombe saɓa za dhahaɓu zajaya na ihadhaɓu ya Mungu aẽshio mida ha mida.

⁸ Ɓasi iNyumba Ndzitwaharifu ijaya mwesi ha siɓaɓu ya utukufu wa Mungu na ushindzi wahe, ata kav̄waka yotsi akoshindra angiye moni mwa iNyumba Ndzitwaharifu mupaka yamaɓa saɓa yale ya zimalayika saɓa yakome.