MUV̄ENULIO 12 - Ha`bari Ndjema ya I Maore

Nida yahusu mutrumushe na shinyama ɓole mufano wa vwayi

¹ V̄uv̄enuha kudura ɓole pev̄oni: mutrumushe apindrisiwa lijua, akana umwezi utsini na yimindru yahe, na kemba ya nyora kumi na mbili shitswani hahe.

² Akana hamili, tsena akolatsa keme ha utungu wa madzazi.

³ Ɓasi v̄uv̄enuha kudura yangina mbinguni: shinyama ɓole mufano wa vwayi yendza range ndzukundru yaiva. Ikana zitswa saɓa na nyonga kumi, na hari mwa zitswa zayo, kemba saɓa.

⁴ uMushia wayo wakogogora lifungu la raru la zinyora za mbinguni, na uwo uzivutsu shiv̄andreju mwa tsi. Shinyama ile ihimi mbeli za mutrumushe ule akwendra adze, ile iɗye mwana wahe amohisodza.

⁵ Aja adza mutruɓaɓa, mwana mume, akoja atsunge piya zinishani ha tsimbo ya shuma. Na umwana wahe av̄elehwa ha Mungu na ishiri ya ufalume yahe.

⁶ Ɓadi umutrumushe atrala, andre padzaju, v̄ulio amba Mungu aka amurengeledzea v̄ahanu, ile alisiwe muda wa suku alifu wa miyateni wa sitini.

⁷ Wakati ule v̄uhimi kondro pev̄oni. Mikayilu na malayika zahe wawana na ishinyama ɓole ile. Na ishinyama ile wajau v̄umoja na zimalayika zayo iwana,

⁸ ɓadi kayashindra, ata kav̄waparihana tsena ɓandza pev̄oni amba lawo.

⁹ Ɓasi v̄ale ivutswa utsini, ishinyama ɓole, ne ɗe inyoha ya ãswili ihiriwao Iɓilisa amma Shetwani, uwo adanganyao ulemengu kamili. Avutswa shiv̄andreju mwa tsi, na zimalayika zahe v̄umoja na waye.

¹⁰ Ɓas v̄ale tsikia ulawa pev̄oni ji lendza nguvu lakorongoa: «Av̄asav̄anu ziwaswili uwokovu, ushindzi, utawalizi wa Mungu watru, na iyezi ya Kristi wahe. Mana avutswa v̄ondze, umusingidza wa wananyatru akowasingidza mbeli za Mungu watru uku na mutsana.

¹¹ Na wao wamushindri ha idamu ya uMwana Ɓariɓari, na ha urongozi wa ushahidifu wawo; mana kawav̄endza uhayati wawo ata waka tayari ya ufa.

¹² Ɓasi namufurahi wanyu zimbingu, na wanyu muziketsio! Ɓadi djondo trini hanyuju wanyu shiv̄andre ya tsi na iɓahari, mana Iɓilisa amushukiani na hasera mangavu, iv̄o ajuao amba wakati wahe wa mushashi.»

¹³ Wakati ishinyama ɓole yaona amba ivutswa shiv̄andreju mwa tsi, iɗungu mutrumushe ule adza mwana mutruɓaɓa.

¹⁴ Ɓasi maɓawa maili ya kwezi ɓole yav̄olwa umutrumushe, ile av̄euhe, andre padzaju, v̄ahanu hahe atsolisiwao hari mwa muda, mida, na inusu ya muda, mbali na inyoha.

¹⁵ iNyoha itowo maji mauri muro hanyoni mengoni ha umutrumushe, ile av̄ingwe ha umuro.

¹⁶ Ɓadi ishiv̄andre ya tsi ihuyi umutrumushe, iɓua ihanyo yayo, imedze umuro ishinyama ɓole yaka yautoa hanyoni hayo.

¹⁷ Ɓasi v̄ale ishinyama ɓole ile ihadhaɓiha kinyume na umutrumushe, ilawa yawane kinyume na zilembwe zasalia zahe, wale wasika ãmuri za Mungu na uv̄inga ushahidi wa Insa.

¹⁸ Amwesa ilimbala hari mwa umutsanga wa iɓahari.