MUV̄ENULIO 11 - Ha`bari Ndjema ya I Maore

Nida yahusu yamazahidi maili ya Mungu

¹ Tsiv̄olwa mupweke mufano wa tsimbo ya uv̄ima na uambilwa: «Hima, uv̄ime iNyumba Ndzitwaharifu ya Mungu na italatala ya masadaka, uhasiɓu na uwatru waãɓuduo moni mwayo.

² Ɓadi ishandza ya v̄ondze ya iNyumba Ndzitwaharifu|Nyumba Ndzitwaharifu, ilishe, usuiv̄ime, mana iyo ihetsiwa ya zinishani zangina. Watsotseresa ha mindru liɗago dzitwaharifu muda wa mezi aruɓaini na mili.

³ Nitsov̄a yamazahidi maili yangu yajudze marongozi ya shi mutrume yashukidziwa muda wa suku alifu wa miyateni wa sitini; na wao watsopindra maguni.»

⁴ Mazahidi maili yao ɗe yimizaituni mili na zihetsi-kombe mbili zilio mbeli za Mola wa ishiv̄andre ya tsi.

⁵ Neka mutru asutsaha awarendreye mbovu, moro ulawa hanyoni hawo, amwesa uvudza maãduwi yawo. Ewa, neka mutru asutsaha awarendreye mbovu, ɓasi ilazimu aulawe namuna iyo.

⁶ Wana ushindzi wa uɓala uwingu amba v̄usushuke vua hari mwa zisuku watsojudzao marongozi ya shi mutrume washukidziwayo. Amwesa wana ushindzi wa ugaudza yamaji yafanyihe damu, na uv̄ondra ishiv̄andre ya tsi ha kula namuna ya ɓa, kula wakati watsahao.

⁷ Wakati watsomalidzao ushahidi wawo, ishinyama mbovu ilawao Uzimu itsowana na wao, itsowashindra, amwesa itsowaula.

⁸ Na zipindra zawo zitsoɓaki hari mwa indzia ɓole ya liɗago ɓole lihiriwao ha luha ya shekedzo Suduma na Miswiri, v̄ahanu kamwe Raɓi wawo aka aremwa mizumari hari mwa muri wa pawa.

⁹ Watru wa kula umati, kula kaɓila, kula luha, na kula nishani watsoona zipindra zawo muda wa suku traru wa nusu, wala kawatsokuɓali zipindra zawo zatrilwa kaɓurini.

¹⁰ uWakazi wa ishiv̄andre ya tsi watsofurahi uhusu uangamifu wawo, watsosterehi na uv̄ana zawadi wao na wao, mana mitrume mili yiyo yakotresa uwakazi wa ishiv̄andre ya tsi.

¹¹ Ɓadi ɓaanda ya suku traru wa nusu zile, roho ya uhayati yalawa ha Mungu iwangilia, wahimi ha yimindru yawo. Ɓasi faza ɓole isiki wale wakowaona.

¹² Sa ile watru waili wale wakia ji lalawa pev̄oni lawaambia: «Namuheye hunu!» Ɓas, wahea pev̄oni moni na livingu, na maãduwi yawo yawaono.

¹³ Sa iyo v̄uhidjiri mudridrimio muɓole wa ishiv̄andre ya tsi, na lifungu la kumi la liɗago liangamia. Watru alifu saɓa wafariki hari mwa umudridrimio wa ishiv̄andre ya tsi. Wao waɓaki wangia trisidzo, ɓasi wamutukuza Mungu wa pev̄oni.

¹⁴ liDjondo la v̄ili liv̄iri. Tsilini lidjondo la raru lisuja tsi hale.

iMalayika ya saɓa isuvudzia liɓaragumu layo

¹⁵ Ɓas, imalayika ya saɓa ivudzia liɓaragumu layo. Na v̄ale v̄ukilihana maji maɓole pev̄oni, yakorongoa: «Utawalizi wa lidunia ufanyiha wa Mwalatru na wa Kristi wahe, na waye atsotawala mida ha mida.»

¹⁶ uWadzaɗe shirini na wanne wale waketsi mbeli za Mungu hari mwa ziri za ufalume zawo, wasudjudia ha unyamisa sura zawo v̄otsi na umuãɓudu Mungu

¹⁷ ha urongoa: «Risuhuhimidia Mwalatru Mungu Monyewe Ushindzi, wawe ulio tsena waka, mana urumia ushindzi muɓole waho, tsena uhetsi utawalizi waho.

¹⁸ ziNishani zingia hasera, ɓadi hadhaɓu yaho ija. Wakati wa uhukumu uwafu uja, na uv̄a thawaɓu warumishi waho, yimitrume, uwatwaharifu, v̄umoja na wao wariao lidzina laho, uwatiti na uwaɓole, na uangamidza wao waangamidzao ishiv̄andre ya tsi.»

¹⁹ Na iNyumba Ndzitwaharifu ya Mungu ilio pev̄oni iɓulwa, na iɓweta ya umukataɓa|ɓweta ya mukataɓa wahe iv̄enuha moni na iNyumba Ndzitwaharifu yahe. Ɓasi v̄uka peni, maji, maguguma, mudridrimio wa ishiv̄andre ya tsi, na vua ɓole yafa ɓwe.