MAV̄INGIZI-RISALA 7 - Ha`bari Ndjema ya I Maore

Hutuɓa ya Etiyeni mbeli za uMungulidzano wa Waɓole

¹ Sa ile uMuɓole wa yaMatolezi-Masadaka|Mutolezi-Masadaka adzisa: «Zizo kweli?»

² Ɓas, Etiyeni adjiɓu: «Wananyangu na maɓaɓangu, namuvulishiye! Mungu mwendza utukufu amuv̄enushia ɓakokwatru Iɓrahima wakati aka hari mwa itsi ya Mesopotamiya, kaɓula ya waye ufanya makazi Harani, amwesa amuambia:

³ ‹Lawia itsi yaho na wadjema zaho, wendre hari mwa itsi nitsohuonesaoyo.›

⁴ Ɓas, alawia itsi ya Makaldayo, andre aketsi Harani. Rangu v̄av̄o, ɓaanda ya ufa wa ɓaɓahe, Mungu amuv̄eleha hari mwa itsi muiẽshio av̄asa.

⁵ Kamuv̄a mwaratha utsokao yotsi hari mwa itsi iyo, ata v̄ahanu v̄wa uhetsi umundru, ɓadi amuv̄a wahadi amuv̄eyo waye na zilembwe zahe ɓaanda yahe, wakati ulio amba kakana mwana.

⁶ Mungu arongoa jau, amba zilembwe zahe zitsoka wadjeni hari mwa tsi ndzidjeni; watsofanyiwa warumwa, wasikwe ha unayi pandza la maha aruɓamiya.

⁷ ‹Ɓadi inishani itsowafanyao warumwa, wami ha wami ɗe nitsoihukumuo,› arongoa Mungu. ‹Ɓaanda ya zizo, watsolawa oho, waje waniãɓudu v̄ahanu v̄anu.›

⁸ Amwesa Mungu amuv̄a Iɓrahima mukataɓa wa matahiri; ha izo, Iɓrahima umudza yahe Isiaka, amutahiri isuku ya nane; na Isiaka umudza yahe Yaãkuɓu, aifanya wajau, na Yaãkuɓu v̄ahe ha uwadzaɗe kumi na waili.

⁹ Na wadzaɗe wale, ha uwivu wawo na Yusufu, wamuudzu av̄ingwe Miswiri. Ɓadi Mungu aka na waye,

¹⁰ amukomboa hari mwa piya maondo yahe; amudjaãlia imani na hikima mbeli za Firiyauna, mufalume wa Miswiri, alio amba amuhetsi dhwamana wa iMiswiri na piya umuraɓa wahe.

¹¹ Ɓas, v̄ushuku dzaha la ndza hari mwa piya iMiswiri na iKanaani|Kanaani. liDjondo lilo lika ɓole, ata wadzaɗe watru kawakopara shitru ya uɗya.

¹² Yaãkuɓu ukia yahe amba v̄wa zahula Miswiri, av̄eleha wadzaɗe watru oho ha mara ya handra.

¹³ iMara ya v̄ili, Yusufu adziv̄enua ha wananyahe; v̄av̄o ɗe Firiyauna aja ajua inaswila yahe.

¹⁴ Amwesa Yusufu arumisa amba ɓaɓahe Yaãkuɓu na udjama wahe piya wav̄ingwe Miswiri; djimlani waka watru saɓwini na watsano.

¹⁵ Ɓas, Yaãkuɓu ashuku Miswiri, aja afia hule, waye na wadzaɗe watru.

¹⁶ Maiti zawo ziv̄ingwa Shekemu, zidzihwa moni na likaɓuri Iɓrahima alinunua ha kima ya fedha ha uwana wa Hamori, Shekemu hule.

¹⁷ Wakati wa utsimidzifu wa uwahadi Mungu amuv̄awo Iɓrahima ukuruɓia yawo, uumati uhuwu na uengedzeha indadi Miswiri,

¹⁸ ata umujilio wa mufalume wangina alio amba waye kaka amujua Yusufu.

¹⁹ uMufalume uwo akodanganya umati watru na urendra nnayi wadzaɗe watru, ata akowalazimisha walatse wana wawo wadzalwa av̄asa, pare wasuẽshi.

²⁰ Na wakati uwo ɗe Musa adzalwa, tsena aka mwema matsoni ha Mungu. Alelwa muda wa mezi miraru muraɓani ha ɓaɓahe,

²¹ ata wakati andra alishwa muroni, umwana mutrumushe wa Firiyauna amurundru, amulele mauri mwana wahe.

²² Ha izo, Musa asomedzewa piya ihikima ya Mamiswiri, na waye aka muhodari hari mwa marongozi na zitrendrwa.

²³ Wakati akana umuri wa maha aruɓaini, fikira imujilia rohoni andre aone Maisraila wanyahe.

²⁴ Hule aono moja akorendrwa nnayi na Mumiswiri, andre amuwaniliye; na ha uɗiv̄ia ule akosongwa, aulu Mumiswiri ule.

²⁵ Aka afikiri amba wanyahe watsoshindra waelewe amba Mungu akoja awakombowe ha ndzia yahe, ɓadi kawaelewa.

²⁶ iSuku yaɗunga uwajilia yahe, apara waili mengoni mwawo wakowana. Adjereɓu utria amani ha uwaambia: ‹Wananyanguni! Wanyu wananya, ɓas manatrini ata murendreanao mbovu?›

²⁷ Ɓadi moja ule akomusonga munyahe amusukuma Musa ha urongoa: ‹Mbani ɗe ahuhetsi shitswa na hakimu mbeli zatru?

²⁸ Usutsaha uniule mauri ɗe iheli waula Mumiswiri ule jana?›

²⁹ Ha urongozi ule Musa atrala, andre aketsi hari mwa itsi ya Midiyani, na hule adza wana waume waili.

³⁰ Ɓaanda v̄wav̄ira maha aruɓaini, v̄umuv̄enushia malayika padzaju hari mwa uMulima wa Sinayi|Mulima wa Sinayi, moni na jenge la moro laka hari mwa mwana muri akovua.

³¹ Uona yahe zile, Musa ashanga na ikudura ile. Ɓaanda akotsengea angaliye, akia liji la Mola iv̄o larongoa:

³² ‹Wami ɗe Mungu wa wadzaɗe waho, Mungu wa Iɓrahima, Isiaka na Yaãkuɓu.› Ɓas, Musa akodridrima, kakosuɓutu ata udzua yamatso.

³³ Sa ile Mola amuambia: ‹Toa kaɓwa zaho, mana v̄av̄o ulio, v̄ahanu v̄utwaharifu.

³⁴ Tsiono utungu wa umati wangu ulio Miswiri, tsikia maulilio yawo wayaululao; ɓas, tsishuku niwakombowe. V̄av̄o av̄asav̄anu endra, nitsohuv̄eleha Miswiri.›

³⁵ Musa uwo wamuhara ha umuambia: ‹Mbani ɗe ahuhetsi shitswa na hakimu?›, uwo ɗe Mungu amuv̄eleha hawo ake shitswa amma mukombozi; amuv̄eleha ha ndzia ya malayika ile yaka yamuv̄enushia hari mwa mwana muri.

³⁶ Waye ɗe awatoa Miswiri ha ufanya ãdjaɓu na ãlama za midjuza hari mwa iMiswiri, iƁahari ya Damu|Ɓahari ya Damu, na padzaju, pandza la maha aruɓaini.

³⁷ Musa uwo ɗe aambia uwatru wa Israila: ‹Mungu atsomuv̄elesheani ulawa hanyuju mutrume mauri ɗe wami.›

³⁸ Waye ɗe aka na idjama padzaju, na imalayika yakorongoa na waye hari mwa uMulima wa Sinayi, tsena aka v̄umoja na wadzaɗe watru; av̄olwa marongozi yendza uhayati, aje ariv̄ewo.

³⁹ Wadzaɗe watru kawatsaha wamuɗungishia, ɓadi wamuhara, rohoni hawo watsaha warudi Miswiri,

⁴⁰ ɓasi wamuambia Haruna: ‹Rifanyiye miungu yirikiliye mbeli. Mana Musa uwo ariv̄inga ulawa Miswiri, karisujua zamupara.›

⁴¹ Ulawa v̄ale, wafanya sanamwe la mwana nyombe, watolea sadaka sanamwe lile, amwesa wajiv̄iwa na ishitru waifanya ha yimihono yawo.

⁴² Ɓas, Mungu awaɓaushia, awalishi waãɓudu ziumbe za mbinguni, mauri ɗe iheli yaangihwa moni na ishio ya yimitrume: ‹He wanyu umati wa Israila, hari mwa muda wa maha aruɓaini mwaka padzaju, hali ɗe wami ɗe mwanitsindzia masadaka na unitolea masadaka yangina?

⁴³ Ɓadi muv̄ingi inyumba ya haima ya mungu wa sanamwe Moloki, na inyora ya mungu wa sanamwe wanyu Remufani, masanamwe mwayafanya pare muyaãɓudu. V̄av̄o, nitsomuv̄elehani matreka mbali rahana Ɓaɓiluna.›

⁴⁴ Padzaju oho, wadzaɗe watru wakana iNyumba ya Haima ya Ushahidi, inyumba Mungu akolagua na Musa aka amuãmurisha aifanye, ha uɗunga umufano aka auona.

⁴⁵ Na wadzaɗe watru ɓaanda waipara, waiv̄ingi wakati wangia ha lidjukuma la Yoshua hari mwa itsi wairengea zinishani Mungu akozitrusa mbeli zawo. Na wiyo iɓaki hule ata wakati wa Daudu.

⁴⁶ Waye apara imani mbeli za Mungu, tsena atsaha ruhusa ya umuparia makao Mungu wa Yaãkuɓu.

⁴⁷ Ɓadi ɗe Sulaimana ɗe amuundria nyumba.

⁴⁸ Na v̄ale, Monyewe Uju rahana Uju kaketsi v̄ahanu v̄wafanyiwa ha mihono ya wanadamu, mauri ɗe iheli umutrume arongoa:

⁴⁹ ‹uWingu ɗe ishiri ya yezi yangu, na ishiv̄andre ya tsi ɗe ishikadza-mindru yangu. Ɓasi nyumba trini mutsoniwashiao,› Mola ɗe arongoao, ‹au hav̄i ɗe v̄utsokao v̄ahanu hangu v̄wa uv̄umuzi?

⁵⁰ uMuhono wangu mwa tsi ɗe wafanya piya zitru zizo?›

⁵¹ Wanyu wendza shitswa shiyi na roho ndzikaidi, mwafa na yamakio! Ha dahari yanyu, musendra kinyume na iRoho Ndzitwaharifu. Wanyu sawa na wadzaɗe wanyu.

⁵² uMutrume uv̄i ɗe wadzaɗe wanyu kawamutresa? Waulu wao wakojudza rangu kaɓula umujilio wa uMwendza Haki, ule leo mwamufitini, mwamuula.

⁵³ Wanyu mwav̄olwa iSharia ha ndzia ya malayika, wala kamwaiɗunga.»

Etiyeni asuangamidziwa ha mawe

⁵⁴ Wakati wakia trongo zile, wangiliwa na hadhaɓu rohoni, ata wakov̄uhura yamanyo.

⁵⁵ Ɓadi Etiyeni, ajaya iRoho Ndzitwaharifu, av̄eleha yamatso mbinguni, aono utukufu wa Mungu, na Insa iv̄o ahima humeni ha Mungu.

⁵⁶ Ɓas arongoa: «Tsami, nisuona uwingu uɓuha, na uMwana wa Mwanadamu|Mwana wa Mwanadamu iv̄o ahima humeni ha Mungu.»

⁵⁷ Sa ile walatsa keme, waɓala yamakio, wamushukia ha djimla.

⁵⁸ Wamugogora v̄ondze mwa liɗago, amwesa wamuvutsia mawe ha umuangamidza. yaMazahidi yaka yahetsi madjuɓa yawo mindruni ha shaɓaɓi akohiriwa Saulusu.

⁵⁹ Wakati wakomuangamidza Etiyeni ha mawe, waye akofanya mamilio na urongoa: «Raɓi Insa|Raɓi, kariɓisa iroho yangu.»

⁶⁰ Amwesa aroso malondro, ashelemedza ha ji lendza nguvu: «Mwalangu, usuwadjukumise lidhambi lilo.» Ɓaanda arongoa zile, afariki.