MAV̄INGIZI-RISALA 5 - Ha`bari Ndjema ya I Maore

Hadisi ya Ananiyasi na mushe wahe Safira

¹ Na v̄ale v̄uka mutru akohiriwa Ananiyasi na waye, v̄umoja na mushe wahe Safira, audzu shamba.

² Fungu la ithamani aɓaki nalo, na mushe wahe azijua. Amwesa zaɓaki aziv̄ingi, av̄azo yaMav̄ingizi-Risala|Mav̄ingizi-Risala.

³ Sa ile Monye amuambia: «Hananiya, manatrini Shetwani ahungia rohoni haho, ata walaɓa iRoho Ndzitwaharifu ha usika fungu la ikima ya lishamba?

⁴ Na djeli kwaka waliudza, kalatsohuɓakia? Na ɓaanda waliudza, ifaida kayaka djukumani haho? Ɓasi manatrini ata rohoni haho wapanga fikira mauri ɗe iyo? Tsi ɗe uwanadamu ɗe wawalaɓa, ɓadi ɗe Mungu.»

⁵ Hananiya ukia yahe marongozi yale, awu v̄otsi, afu. Faza ɓole ingilia piya wale wakia zitrongo zile.

⁶ Sa ile mashaɓaɓi watruɓaɓa wahimi, wamuv̄ishidza, amwesa wamuv̄ingi, wandre wamudzihi.

⁷ Ɓaanda v̄wav̄ira muda wa sa traru jauleni, mushe wahe angia, wala tsi ha ujua zile zaka zahidjiri.

⁸ Wakati ule Monye amudzisa: «Niambiye roni, ɗe ha ikima ini ɗe mwaudza lishamba?» Amudjiɓu: «Ewa, ɗe ha ikima iyo.»

⁹ Ɓas, Monye amuambia: «Ha namuna jeje ata mwaafikiana amba mudjereɓu iRoho ya Mola? Wao wandra wamudziha mume waho tsawo, wa mulongoju, watsohuv̄inga wajau.»

¹⁰ Sa na isa ile awu mindruni hahe, afu. Mashaɓaɓi yale ungia yawo, wamupara amba afu, wamurenge, wandre wamudzihi ɓavuni ha mume wahe.

¹¹ Faza ɓole ingilia piya iDjama Ndziwaminifu na piya wale wakia haɓari zile.

yaMav̄ingizi-Risala yasufanya wengi wa ãdjaɓu na midjuza

¹² Wengi wa ãlama za midjuza na trongo za ãdjaɓu zakofanyiwa na yaMav̄ingizi-Risala hari mwa idunia. Ha nia moja wakongulidzana piyawo v̄ahanu v̄uhiriwao Ɓaraza la Sulaimana.

¹³ Kav̄waka mutru atsokao yotsi wangina akosuɓutu andre adzitsanganise na wao, ata wala ukana amba wakov̄olwa sheo na watru.

¹⁴ iHisaɓu ya watru wakomuamini Raɓi, rangu watruɓaɓa ata watrumama, yakwendra na uengedzeha.

¹⁵ Iwaswili amba watru wakov̄inga wawaɗe mav̄areni, wakowaladza hari mwa madjavi na magodoro, pare Monye amov̄ira, wala ukana ɗe ishivuli yahe tu, ne iɓaliliye wasalia hari mwawo.

¹⁶ Dunia ya watru yakoja Yerusalemu ulawa hari mwa yamalago madjirani, wakov̄inga wawaɗe na watru wakotaãɓishiwa na madjini ya peu, na piyawo wakozihiriwa.

Mav̄ingizi-Risala yasutreswa na watru waɓole

¹⁷ Ɓas, uMuɓole wa yaMatolezi-Masadaka|Mutolezi-Masadaka na piya wao waka v̄umoja na waye, yaãni, watru wa ishama ya Masadukayo, wahimi na uwivu wawo,

¹⁸ wandre wasiki yaMav̄ingizi-Risala, wawatria shiv̄ani.

¹⁹ Ɓadi uku, malayika ya Mola iɓua yimilongo ya ishiv̄a, iwatowo, amwesa iwaambia:

²⁰ «Namwendre mwahime moni na iNyumba Ndzitwaharifu, mujudze umati piya zihaɓari za uhayati uwo.»

²¹ Ɓaanda wakia trongo zile, asuɓuhi ya handra wangia moni na iNyumba Ndzitwaharifu|Nyumba Ndzitwaharifu, wakosomedza. Ɓas, uMuɓole wa yaMatolezi-Masadaka na wale waka v̄umoja na waye uja yawo, wahiri uMungulidzano wa Waɓole na piya uwatru waɓole wa Israila, amwesa wav̄eleha watru wandre warenge Mav̄ingizi-Risala yale shiv̄ani.

²² Na v̄ale wakati yamagogezi yawaswili shiv̄ani, kawawapara. Waregea, wandre wajudza:

²³ «Ripara amba ishiv̄a iɓalwa ha uzuri, na yamagogezi yaka hazahaza mulongoju. Ɓadi uɓua yatru umulongo, karapara ata mutru moni.»

²⁴ Ukia yawo trongo zile, shitswa wa yamagogezi ya iNyumba Ndzitwaharifu na yaMatolezi Maɓole ya Masadaka|Mutolezi-Masadaka waremwa na ushangavu na wizo, ata wakodzisana amba umwiso wazo utsoka jeje.

²⁵ Sa ile v̄uja mutru, aja awaambia: «Watru wale mwaka mwawatria shiv̄ani, wa moni na iNyumba Ndzitwaharifu, wasusomedza idjama.»

²⁶ Ɓas, shitswa wa yamagogezi na watru wahe wandre wawarenge, wala tsi ha fidjo, mana wakoria idunia isuje yawaangamidza ha mawe.

²⁷ Ɓaanda wawatoa hule, wawav̄ingi mbeli za uMungulidzano wa Waɓole|Mungulidzano wa Waɓole. Amwesa uMuɓole wa yaMatolezi-Masadaka akowatafiti

²⁸ ha urongoa: «Rimuɓalidzani ha kusudi wanyu usomedza ha lidzina lilo, na tsiyo mujadza iYerusalemu na misomo yanyu yiyo, amwesa musutsaha muritrikise lidjukuma la idamu ya umutru uwo!»

²⁹ Sa ile Monye na yaMav̄ingizi-Risala wanyahe wadjiɓu: «Irilazimu rimutuĩ Mungu rahana uwanadamu!

³⁰ Mungu wa wadzaɗe watru amuregeza hayi Insa, ule mwamuula ha umurungiha hari mwa muri|muri wa pawa.

³¹ Mungu amuhedza humeni hahe ake ɗe uMushangirizi amma uMuhuyifu, ile av̄e iIsraila indzia ya uendra toɓa, na umuswamaha wa yamadhambi.

³² Wasi ra mazahidi wa zitrongo izo, v̄umoja na iRoho Ndzitwaharifu Mungu aiv̄a wao wamutuĩo.»

³³ Ukia yawo marongozi yale, watru wale watukiwa ha kusudi, ata wakotsaha wawaule.

³⁴ Ɓadi mutru wa ishama ya Mafarisayo akohiriwa Djamalayilu, fundi wa iSharia akostehiwa na piya uwatru, ahimi hari-hari mwa uMungulidzano wa Waɓole ule, aãmurisha yaMav̄ingizi-Risala yale yatolwe raɓuzi.

³⁵ Amwesa awaambia: «He Maisraila, namufahamu na itrongo mutsahao muifanyiye watru wao.

³⁶ Mana, nyuma oho mwanapav̄i, Teudasu aka aja, akodzirendra mutru, ata watru wapara aruɓamiya jauleni wakomuɗunga. Ɓadi aulawa, na piya wale wakomuɗunga watsambadziwa, ata kav̄waɓaki itsokao yotsi.

³⁷ Ɓaanda ya waye, wakati v̄wakofanyiwa ihisaɓu ya uwakazi, v̄uja mutru wa shi Galilaya akohiriwa Yudasi. Avuru dunia ya watru imuɗunge. Ɓas waye wajau afu, na piya wao wakomuɗunga, watsambadziwa.

³⁸ Av̄asav̄anu nisumuambiani, namuɓauhe watru wao, namuwalishe tu; mana neka mpango wawo uwo, au ãmali yawo iyo, ilawa ha wanadamu, itsoangamia.

³⁹ Ɓadi neka ila ha Mungu, kamutsoshindra mwaizia. Ɓas namudzitahadhari mwasuje mwadzipara amba musuwana kinyume na Mungu.»

⁴⁰ Waɗungishia marongozi yahe yale, amwesa wahiri yaMav̄ingizi-Risala yale, wawareme zengwe ha kusudi, wawaɓalidza wasulaguwe ha lidzina la Insa, amwesa wawajeledza.

⁴¹ yaMav̄ingizi-Risala yale yalawa hari mwa uMungulidzano wa Waɓole, wafurahi ha iv̄o waonehana amba wastahiki warendrwe mbovu ha siɓaɓu ya lidzina la Insa.

⁴² Na kula suku, rangu moni na iNyumba Ndzitwaharifu ata malagoni, kawakozia usomedza na ujudza iHaɓari Ndjema amba Insa ɗe Mutsahuliwa.