MAV̄INGIZI-RISALA 4 - Ha`bari Ndjema ya I Maore

Monye na Yuhani mbeli za uMungulidzano Muɓole

¹ Monye na Yuhani waka ju la uhutuɓia idunia, ɗe wajiliwa na yaMatolezi-Masadaka|Mutolezi-Masadaka, shitswa wa yamagogezi ya iNyumba Ndzitwaharifu na watru wa ishama ya Masadukayo.

² Wakotukiwa iv̄o wale wakosomedza idunia ile na ujudza, ha ulawana na Insa, umuregezeo hayi wa wafu.

³ Wawasiki, wawatria shiv̄ani ata isuku ya v̄ili, mana lijua madza lika litso.

⁴ Na v̄ale, wengi hari mwa wale wakia uUrongozi waamini, ata iindadi yawo iengedzeha, ipara mukaɓala wa alifu tsano.

⁵ iSuku yaɗunga, makizi-mbeli yawo, v̄umoja na uwatru waɓole na yaMafundi ya Sharia|Mafundi ya Sharia wangulidzana Yerusalemu

⁶ v̄umoja na Anasi, uMuɓole wa yaMatolezi-Masadaka, na Kayafasi, Yuhani, Alisandrusa, na piya wao waka hari mwa uudjama wa uMuɓole wa yaMatolezi-Masadaka.

⁷ Wamuhetsi Monye na Yuhani hari-hari na wao, amwesa wawadzisa: «Ha ushindzi trini au ha dzina la mbani ɗe mwarendra zile?»

⁸ Ɓas Monye, ajaya iRoho Ndzitwaharifu, awaambia: «Wanyu makizi-mbeli na watru waɓole,

⁹ ɓaanda ritafitiwao leo ju la trongo ndjema yarendreha hari mwa shirewe na ha namuna jeje azihiriwa,

¹⁰ wanyu piyanyu, v̄umoja na piya umati wa Israila, namujuwe amba ɗe ha lidzina la Insa-Kristi wa Nazareti, ule mwamurema mizumari hari mwa muri wa pawa, ɗe Mungu amuregeza hayi ulawa ha uwafu, ɗe ha waye ɗe mutru unu ahima mbeli zanyu na unono mukamilifu.

¹¹ Insa, waye ɗe ‹liɓwe lalatswa na wanyu waundrizi, ne larendreha amba ɗe liɓwe la nyongaju.›

¹² Uhuyifu kausi ha mutru wangina atsokao yotsi, mana shiv̄andreju mwa tsi v̄anu kav̄usi dzina langina lav̄elehwa mbeli za wanadamu amba ha lilo ɗe ralazimu rihuyiwe.»

¹³ Wakati waona uhodari wa Monye na Yuhani, waremwa na ushangavu, mana wafahamu amba wao tsi watru wendza ĩlimu wala maãrifa. Wawafahamu iv̄o waka v̄umoja na Insa.

¹⁴ Ɓadi rangu waona umutru ule alimbala mbeli zawo v̄ale, azihiriwa, kawakana za urongoa.

¹⁵ Wawaãmurisha walawe hari mwa Mungulidzano wa Waɓole ule, amwesa wakolana mashuwara

¹⁶ na udzisana: «Riwafanye trini watru wale? Ha kweli amba wafanya ãlama ya ãdjaɓu ɓole; piya uwatru waketsio Yerusalemu waiono dhwahiri, wala karishindri rahana.

¹⁷ Ɓadi ile pare itrongo iyo isuzidi utsaniha ha uwanadamu, nariwafahamishe na uwarisidza wasulaguwe tsena na mutru atsokao yotsi ha lidzina lilo.»

¹⁸ Ɓas wawahiri, amwesa wawaɓalidza ha kusudi urongoa na usomedza ha lidzina la Insa.

¹⁹ Ɓadi Monye na Yuhani wawadjiɓu: «Hali iyo haki mbeli za Mungu ya umuvulikiani wanyu rahana waye Mungu? Namuinamuwe wanyu wenyewe,

²⁰ mana wasi karishindri amba rasurongowe zitrongo razishuhudia na uzikia.»

²¹ Wakati ule watru waɓole wale wawatahadharisha mara yangina tsena, amwesa wawajeledza; ha siɓaɓu ya idunia kawapara ndzia ya uwav̄a zifungo, mana piyawo wakomutukuza Mungu na itrongo ile yahidjiri.

²² Na mutru ule aɓahatisha lidzihiro la midjuza lile akana umuri wazidi maha aruɓaini.

Mamilio ya iDjama Ndziwaminifu

²³ Ɓaanda wajeledzewa, Monye na Yuhani wandre wapara wanyawo, wawatolea hadisi piya trongo zile yaMatolezi Maɓole ya Masadaka|Matolezi Maɓole ya Masadaka na watru waɓole wale wawaambia.

²⁴ Ɓaanda wawavulikia, ha djimlani hawo wahedza yamaji yawo ha umumia Mungu, warongoa: «Mwalatru, wawe ɗe Mungu waumba uwingu na ishiv̄andre ya tsi, iɓahari na piya zilio hari mwazo.

²⁵ Wawe ɗe warongoa ha iRoho Ndzitwaharifu hanyoni ha ɓaɓatru, murumishi waho Daudu: ‹Manatrini zinishani zahafiliha, na zingumati zifanyao mipango kayina mana?

²⁶ yaMafalume ya shiv̄andreju mwa tsi wadzimidzi, na yamatawalizi yawafikiana uka kinyume na Mola na uMutsahuliwa|Mutsahuliwa wahe.›

²⁷ Mana kweli amba Hirudu na Pontiusu Ɓilatusa wawafikiana ɗagoni v̄anu, v̄umoja na watru wa zinishani zangina na uwatru wa Israila kinyume na umurumishi mutwaharifu waho, Insa wamudhwaminisha.

²⁸ Ha izo, watsimidza piya izo waka wazinia rangu kaɓula ha uushindzi waho na yamav̄endzeleo yaho.

²⁹ Av̄asav̄anu Mwalatru, ngalia marisidzo yawo, amwesa uriv̄e wasi warumishi waho ushindzi wa ujudza urongozi waho ha uhodari wa kusudi.

³⁰ Uenyese ushindzi waho ha mazihiro, na ãlama za midjuza na ãdjaɓu, ha lidzina la umurumishi mutwaharifu waho, Insa.»

³¹ Wamomalidza mamilio yawo, mukaɓala ule waka wangulidzana ugudzuha; piyawo wajadziwa iRoho Ndzitwaharifu, amwesa wakojudza urongozi wa Mungu ha uhodari.

Watru wa iDjama Ndziwaminifu wakodjimlisa izo wakanazo

³² iDunia ya wale waamini ifanyiha umo moja na roho moja. Kav̄waka ata mutru akorongoa amba mali yahe, yahe waye monyewe, ɓadi wakozidjimlisa piyazo.

³³ Ha ushindzi muɓole, yaMav̄ingizi-Risala|Mav̄ingizi-Risala yakotoa ushahidi wa umuregezeo hayi wa Raɓi Insa|Raɓi. Na rehema ɓole yakoka ju lawo piya.

³⁴ Kav̄waka mutru atsokao yotsi hari mwawo akokosewa na shitru yalazimu, mana piya wao wakana mazamba au nyumba wakoziudza, wav̄ingi zifaida,

³⁵ wazihetsi mindruni ha yaMav̄ingizi-Risala. Amwesa zakoanyisiwa, ata kula mutru akopara ha ikiasi ya usongefu wahe.

³⁶ Yusufu, ule yaMav̄ingizi-Risala wakomuhira Ɓarnaɓasi, yaãni Mutria-Ɓari, Mulawi|Lawi wa shi Kupro,

³⁷ audzu shamba akanalo, av̄ingi zimarike, aja av̄azo yaMav̄ingizi-Risala.