MAV̄INGIZI-RISALA 3 - Ha`bari Ndjema ya I Maore

Monye asuzihira shirewe

¹ Suku, Monye na Yuhani wakohea hari mwa iNyumba Ndzitwaharifu sa ya shendra ya jio, wakati wa mamilio.

² Wakati ule v̄uv̄ingwa mutru adzalwa na shifeli ya trewe. Kula suku akoladzwa mulongoju mwa iNyumba Ndzitwaharifu, mulongo wakohiriwa Muzuri, pare afanye akrimasikini ha watru wangiao moni na iNyumba.

³ Umuona yahe Monye na Yuhani iv̄o wakongia, awamia marike.

⁴ Ɓasi Monye, v̄umoja na Yuhani, amureme matso, amwesa amuambia: «Riangaliye.»

⁵ Ɓas, awastamia ha uzuri ha uwalindria na shitru.

⁶ Sa ile Monye amuambia: «Tsisina fedha, wala dhahaɓu; ɓadi iyo nilionayo, nisuhuv̄ayo. Ha lidzina la Insa-Kristi wa Nazareti, hima wendre.»

⁷ Amwesa amusiki umuhono wa hume, amumidzi. Sa na isa ile yimindru yahe na zizifungo zayo zihodarishiha.

⁸ Alimbala ha uwaruka, amwesa andre ha yimindru. Angia na wao moni na iNyumba Ndzitwaharifu; akwendra ha uwaruka na umusifu Mungu.

⁹ Umati ule piya umuono amba asendra ha mindru na umusifu Mungu.

¹⁰ Wamujua amba ule ɗe mutru akoka hari mwa umulongo ule uhiriwao Muzuri ha ufanya akrimasikini. Ɓas, waremwa na ushangavu na utaãdjaɓu ha itrongo ile yamuhidjiria.

¹¹ Ɓaanda mutru ule kakolisha umuɗunga Monye na Yuhani piya uwatru, ha ushangavu muɓole, wakorema mbio ondrowapara v̄ahanu v̄ale v̄ulio mustari wa ngidzo v̄uhiriwao Ɓaraza la Sulaimana.

Hutuɓa ya Monye moni mwa iNyumba Ndzitwaharifu

¹² Monye uona yahe zile, aambia idunia ile: «He wanyu Maisraila|Israila, manatrini ata mudzishangidzao na itrongo iyo? Manatrini ata muriremao matso, mauri amba ɗe ha ushindzi watru, au ha utuĩvu watru, ɗe ramuendresa mutru unu?

¹³ Mungu wa Iɓrahima, Isiaka na Yaãkuɓu, Mungu wa maɓaɓatru, atukuza umurumishi wahe Insa, ule mwamuv̄eleha aulawe na umuhara mbeli za Ɓilatusa, alio amba waye aka arenge ãzima amujeledze.

¹⁴ Ɓadi wanyu muhara uMutwaharifu Mwendza Haki, amwesa mumia mujeledzewe muula.

¹⁵ Muulu likoho la uhayati, Monyewe uka amba Mungu amuregeza hayi ha ulawia ufa, na wasi ra mazahidi.

¹⁶ Ɗe lidzina lahe, ha uaminifu na lidzina lilo, ɗe lahodarisha mutru uwo mumuonao tsena mumujuao. Ɗe uaminifu na waye ɗe watsongesha mutru ule apara unono watsimu mbeli zanyu.

¹⁷ Ɓadi av̄asav̄anu wananyangu, nisujua amba zile muzirendre ɓila wanyu ujua, mauri ɗe makizi-mbeli yanyu.

¹⁸ Ɓadi ɗe ha inamuna iyo zitrongo Mungu aka azijudza rangu kaɓula ha yamarongozi ya piya yimitrume zitsimidziha, ne ɗe itrongo amba Kristi wahe aka alazimu aondeshehe.

¹⁹ Ɓasi namwendre toɓa, muparane na Mungu, ile madhambi yanyu yazimwe,

²⁰ pare wakati wa uv̄umuzi wa ziroho zanyu ulawao ha Mwalatru umujiliyeni, amuv̄elesheyeni Kristi wahe mwatsahuliwawo rangu kaɓula, ne ɗe Insa.

²¹ Waye Uwo ɗe alazimu aɓaki pev̄oni ata mupaka ɗe wakati wa umurengeledzeo mukamilifu wa zitrongo, ule Mungu aujudza ha yamarongozi ya yimitrume mitwaharifu yahe.

²² Musa aka arongoa: ‹Mwalanyu Monyezi Mungu atsomuv̄elesheani ulawa hanyuju mutrume mauri ɗe wami. Mutsomuvulishia na piya zitrongo atsomuambiaonizo.

²³ Kula nafusi kaitsovulishia umutrume uwo, itsozimwa hatwi hari mwa umati.›

²⁴ Piya yimitrume yakorongoa rangu Samueli ata wao wamuɗunga, wajudza wajau zisuku zizo.

²⁵ Wanyu ɗe uwana wa yimitrume na wa umukataɓa Mungu aufanya na wadzaɗe watru ha umuambia Iɓrahima: ‹Na hari mwa zilembwe zaho, piya zinishani za shiv̄andreju mwa tsi zitsoɓarikishiha.›

²⁶ Ɗe hanyuju kadimu ɗe Mungu av̄enusa umurumishi wahe, amuv̄eleha amuɓarikini ha uzingisa kula moja hari mwanyu na zimbovu zahe.»