MATIYO 8 - Ha`bari Ndjema ya I Maore

Insa asuzihira muenefu

¹ Insa ushuka yahe mulimani v̄ale, dunia ya watru imuɗungu.

² Ɓasi v̄umujilia muenefu, avundzu malondro mbeli zahe, amwesa amuambia: «Raɓi, neka utsaha, utsoshindra unitwaharishe.»

³ Sa ile Insa av̄eleha umuhono, amusiki, amwesa arongoa: «Nisuitsaha, twaharishiha!» Sa na isa ile mutru ule atwaharishiha na uwenefu wahe ule.

⁴ Insa amuambia: «Fahamu, usuambiye ata mutru trongo izo. Ɓadi endra wadzionese ha Mutolezi-Masadaka, utowe lisadaka laãmurishiwa na Musa, ile ike ushahidifu mbeli zawo.»

Insa asuzihira mutru wa hazi wa djukuma la madjeshi

⁵ Insa ungia yahe ɗagoni Kafarnaumu, v̄umujilia djukuma la madjeshi, amumia hadja

⁶ ha urongoa: «Mutukufu, mutru wa hazi wangu alala ɗagoni, afu uv̄andre, amwesa asuondesheha ha kusudi.»

⁷ Ɓas Insa amuambia: «Nitsendra namuv̄onese.»

⁸ Ɓadi djukuma ule amudjiɓu: «Mutukufu, tsastahiki wawe ungia ɗagoni hangu; rongoa trongo moja tu, na mutru wa hazi wangu atsov̄ona.

⁹ Mana wami ne tsa utsini na ãmuri za waɓole wangu, tsina madjeshi utsini mwangu. Namoambia moja: ‹Endra›, na waye uendra; neka tsiambia wangina: ‹Ko›, waye uja; na mutru wa hazi wangu namomuambia: ‹Fanya jau›, waye uifanya.»

¹⁰ Wakati Insa akia zile ashanga, ata aambia wale waka wamuɗunga: «Nisumuambiani ha kweli, ata hari mwa iIsraila, ne tsapara uaminifu muɓole mauri ɗe unu.

¹¹ Na wami nisumuambiani amba wengi watsolawa jua la uhea na la utswa, amwesa watsoka hari mwa muɗyio v̄umoja na Iɓrahima, Isiaka na Yaãkuɓu hari mwa Utawalizi wa Monyewe ziMbingu.

¹² Ɓadi wao walazimiwa uUtawalizi, watsolatswa hari mwa shidza v̄ondze, v̄ahanu v̄utsokao shililo na uv̄uhura manyo ha utungu.»

¹³ Amwesa Insa amuambia djukuma ule: «Endra; itrongo wakana uaminifu nayo, naifanyishihe.» Sa ɗe ile kamwe na mutru wa hazi ule av̄ono.

Mazihiro ya nyadzahe wa Monye, na wawaɗe wangina

¹⁴ Ɓaanda ya zile Insa angia ɗagoni ha Monye, amupara nyadzahe amba alala, akana ɓuhuo.

¹⁵ Amusiki umuhono, na ɓuhuo lile limulawia, ata ahimi akomuyeleshea.

¹⁶ Mahariɓi ungia yayo, Insa av̄ingiwa watru wengi wakana mazetwani. Atrusu madjini ya peu yale ha urongozi wahe, tsena azihira piya wawaɗe.

¹⁷ Zini zija ile trongo ini yaka yarongolwa na mutrume Izaya, itsimidzihe: «Arenge zifeli zatru, tsena adzitrihisa mawaɗe yatru.»

Mutru atsahao amuɗunge Insa, nadzihodarishe

¹⁸ Wakati Insa aona idunia ya watru yamuzingidzia, aãmurisha wavuke nyambo ya lidzia.

¹⁹ Ɓas v̄umujilia Fundi wa Sharia, amuambia: «Fundi, nitsohuɗunga v̄ahanu yotsi utsendrao.»

²⁰ Insa amudjiɓu: «Pahavuɓa zina magumbo, na zinyunyi za hawani zina mahara; ɓadi uMwana wa Mwanadamu|Mwana wa Mwanadamu kasina v̄ahanu v̄wa uladza ishitswa yahe.»

²¹ Mutru wangina, aka mengoni mwa maswihaɓa yahe, amuambia: «Mutukufu, niruhusu nendre namudzihe raɓuzi ɓaɓangu.»

²² Ɓadi Insa amudjiɓu: «Niɗunge, ulishe wafu wadzihe wafu wawo.»

Insa asuɗaridza pev̄o

²³ Insa ahea moni na djahazi, na maswihaɓa yahe yamuɗungu.

²⁴ Sa ile v̄uhimi pev̄o yendza nguvu dziani v̄ale, ata maluja yakofinikia lidjahazi, ɓadi waye aka asindzia.

²⁵ Maswihaɓa yahe yandre yamumidzi, yamuambia: «Raɓi, rihuyi, risuangamia!»

²⁶ Ɓas awaambia: «Manatrini muriao? Wanyu watru wendza uaminifu mushashi!» Amwesa ahimi, alagulia ipev̄o na iɓahari; sa ile v̄ushuku shiwari.

²⁷ Watru wale waremwa na ushangavu, ata wakorongoa: «Unu mutru jeje unu? Ata zipev̄o na iɓahari, ne zisumutuĩ!»

Insa asuzihira wendza mazetwani waili

²⁸ Insa uwaswili yahe nyambo ya lidzia, mukaɓala wa Magadara, wendza mazetwani waili walawa mahaɓurini, wamujilia. Waka hatwari ata kav̄waka ata mutru akosuɓutu av̄ire ndziani v̄ale.

²⁹ Ɓas, waandrisa ulatsa keme na urongoa: «Usuritsaha na trini, wawe Mwana wa Mungu? Uja v̄anu uritrese kaɓula raha wakati kawapara?»

³⁰ Ha mbali mwanapav̄i v̄uka ɓangwe ɓole la mav̄uruku, lakorundria.

³¹ Ɓas, mazetwani yale yamumia Insa: «Neka usuritradza v̄anu, riv̄elehe hari mwa ɓangwe la mav̄uruku lile.»

³² Ayaambia: «Haya, namwendre!» Ɓas yalawa, yangilia mav̄uruku yale. Sa ile piya liɓangwe la mav̄uruku lipuliha ulawa shilimaju v̄ale, lishuku ɓaharini, lifu piyalo.

³³ Wale wakoyarundrisa watrala wangia ɗagoni, wajudza piya trongo zile waziona, na zile zahidjiria wendza mazetwani wale.

³⁴ Ɓas, piya liɗago lilawa, lija limupara Insa. Wakati wamuona, wamumia alawiye ɓavu lawo lile.