MATIYO 3 - Ha`bari Ndjema ya I Maore

Haɓari ijudziwao na Yahaya Muɓaĩshizi

¹ Ɗe hari mwa wakati uwo, ɗe Yahaya Muɓaĩshizi andra padzaju Yudeya, akoĩdhia

² ha urongoa: «Namwendre toɓa, mana Utawalizi wa Monyewe ziMbingu, ukuruɓia.»

³ Yahaya ɗe mutru alio amba mutrume Izaya akomurongoa hari mwa marongozi yahe yanu ashukidziwayo: «Tsilini liji la mutru ashelemedzao padzaju: ‹Namutayarishe indzia ya Mola, muondzowe wana ndzia wahe!› »

⁴ Yahaya akana nguo ya madzivuzi ya ngamia, na mukandra wa ngwezi trengaju. Akoɗya maɗatra na ngizi ya nyoshi.

⁵ Wakazi wa Yerusalemu, na piya itsi ya Yudeya, na wa piya liɓavu la umuro wa Jurdani, wakomujilia.

⁶ Wakov̄enua madhambi yawo, na waye akowaɓaĩsha|uɓaĩsha moni na umuro wa Jurdani.

⁷ Uona yahe amba watru wengi wa ishama ya Mafarisayo na ya Masadukayo wakomujilia waɓaĩshiwe, awaambia: «Wanyu wanafiki, udjama wa nyoha za peu! Mbani ɗe amujudzani amba mutsoshindra mutrale ihadhaɓu ijao?

⁸ Ɓasi namutowe mavuna yaonesao amba kweli mwendre toɓa,

⁹ wala musufikiri udziambia amba: ‹Wasi, ɓaɓatru ɗe Iɓrahima.› Mana nisumujudzani amba ha mawe yanu, ne Mungu ushindra atowe wana wa Iɓrahima!

¹⁰ liSoha madza lihetsiwa miziju mwa yimiri. Kula muri kaudza mbia ndjema utsokatrwa, uvutswe moroju.

¹¹ Wami nisumuɓaĩshani ha maji, ike udhiɓitifu amba mwendre toɓa. Ɓadi uwo ajao unyuma hangu, ana ushindzi rahana wami: tsastahiki ata uv̄inga kaɓwa zahe. Waye atsomuɓaĩshani ha iRoho Ndzitwaharifu, na ha moro.

¹² Asiki utseo wahe muhononi, atsorahatsa ɓandza lahe arwao, atenge liguru na zitrundra, agamise mele yahe moni na kanya; ɓadi atsovudza liguru moni na moro kauzimiha.»

Muɓaĩsho wa Insa

¹³ Ɓas Insa alawa Galilaya, amujilia Yahaya|Yahaya Muɓaĩshizi muroni Jurdani ile amuɓaĩshe.

¹⁴ Ɓadi Yahaya akohara ha urongoa: «Wami ɗe nalazimu niɓaĩshiwe na wawe, na v̄anu usuja unipare ɗe wami!»

¹⁵ Ɓadi Insa amudjiɓu: «Lisha tu ike namuna iyo av̄asa. Mana ɗe ha inamuna iyo ɗe yastahiki ritsimidze piya izo zilio za haki.» Ɓas, v̄ale Yahaya akuɓali.

¹⁶ Amohisoɓaĩshiwa, Insa alawa majini. Sa ɗe wiyo ile kamwe zimbingu ziɓuha, aono iRoho ya Mungu iv̄o yakomushukia mufano wa shukuru.

¹⁷ Sa ile v̄ulawa ji mbinguni, lirongoa: «Unu ɗe uMwana muv̄endzewa wangu, tsena wami ujiv̄iwa halisi na waye.»