MATIYO 28 - Ha`bari Ndjema ya I Maore

Muregezeo hayi wa Insa

¹ iSuku ya Uv̄umuzi uv̄ira yayo, asuɓuhi mapema ya Mufumov̄ili, isuku ya handra ya umufumo, Mariama wa Magidala na Mariama wangina ule wandre waangaliye likaɓuri|kaɓuri.

² Sa na isa v̄uja v̄uhidjiri mudridrimio wendza nguvu wa ishiv̄andre ya tsi, mana malayika ya Mola ishuku ulawa pev̄oni, ija iv̄ingirisa liɓwe, amwesa iketsi uju mwalo.

³ Yakoonehana mauri peni, na nguo yahe ika ndjeu mauri uv̄amba.

⁴ Magogezi yale yadridrima ha faza, wafanyiha mauri wafu.

⁵ Ɓadi malayika ile irenge umurongo, iambia watruwashe wale: «Mwasuriye wanyu. Nisujua amba musumuzunguha Insa, ule aka aremwa mizumari hari mwa muri wa pawa.

⁶ Kasi v̄anu, aregezewa hayi, mauri ɗe inamuna aka arongoa. Namuje muone v̄ahanu aka aladzwa.

⁷ Amwesa ha uharaka mwendre mwaambiye maswihaɓa yahe amba aregezewa hayi ulawa ha uwafu, na v̄anu kamwe asumutranguliani uendra Galilaya; oho ɗe v̄ahanu mutsomuonao. Tsiyo tsimuambianizo.»

⁸ Ha upesi walawa kaɓurini v̄ale, v̄umoja na faza tsena na furaha ɓole wareme mbio wajudze yamaswihaɓa haɓari ile.

⁹ Sa na isa ile kamwe Insa aja awapara, awaambia: «Tsimusalimuni!» Ɓas, watruwashe wale watsengelea, wamusiki yimindru, amwesa wamusudjudia.

¹⁰ Wakati ule Insa awaambia: «Mwasuriye; namwendre mwaambiye wananyangu wandre Galilaya; oho ɗe v̄ahanu watsonionao.»

Maeledzo ya magogezi ya likaɓuri

¹¹ Wakati watruwashe wale waka ndziani, ɓaãdhwi ya magogezi yangia ɗagoni, wajudza yaMatolezi Maɓole ya Masadaka|Mutolezi-Masadaka piya trongo zahidjiri.

¹² Na wao ɓaanda wangulidzana v̄umoja na uwaɓole, walawana shuwara wav̄a madjeshi yale fedha ha uwengi,

¹³ na uwaambia: «Namurongowe amba: ‹Maswihaɓa yahe yaja yamuhiɓi uku wakati raka rasindzia.›

¹⁴ Neka dhwamana wa daula azikia, wasi ritsomutrulidza, rimutoweni hari mwa taãɓu.»

¹⁵ Ɓas, magogezi yale yarenge zimarike, wafanya namuna waka waambilwa. Na haɓari ile ienea yaMayahudi ata ileo ini.

Insa asuv̄enushia maswihaɓa yahe na uwaruma

¹⁶ Amwesa maswihaɓa kumi na moja yale yandre Galilaya hari mwa umulima Insa aka awaambia.

¹⁷ Umuona yawo, wamusudjudia, ɓadi v̄wa wasalia wakana taradudu.

¹⁸ Insa atsengelea, amwesa awaambia: «Piya yezi tsiv̄olwayo rangu mbinguni ata shiv̄andreju mwa tsi.

¹⁹ Ɓas namwendre ha piya zinishani, muwafanye maswihaɓa, muwaɓaĩshe ha lidzina la Ɓaɓa, la uMwana, na la iRoho Ndzitwaharifu,

²⁰ muwasomedze watuĩ piya izo namuãmurishanizo. Na tsami, nisuka v̄umoja na wanyu kula suku, ata mupaka umwiso wa lidunia.»