MATIYO 25 - Ha`bari Ndjema ya I Maore

Mufano wa wanahirimu watruwashe kumi

¹ «Ɓas, v̄av̄o Utawalizi wa Monyewe ziMbingu utsojua ufanisiwe na wanahirimu watruwashe kumi, warenga mahombe yawo, walawa wandre wamupare ɓwana-harusi.

² Watsano hari mwawo waka wapuzi, na watsano waka wendza hikima.

³ Wapuzi wale wav̄ingi mahombe yawo, ɓadi kawav̄inga ãkiɓa ya matra.

⁴ Ɓadi wendza hikima wale wav̄ingi v̄umoja na mahombe yawo, matra moni na ziya.

⁵ Iv̄o ɓwana-harusi akohoma, piyawo waremwa na tsindzi, walala.

⁶ Hari-hari mwa uku, v̄ukilihana ji lashelemedza: ‹Ɓwana-harusi tsuwo! Namulawe mwamupare!›

⁷ Sa ile piya wanahirimu watruwashe wale wahimi, watayarisha mahombe yawo.

⁸ Ɓas, wapuzi wale waambia uwendza hikima: ‹Namuriv̄e roni mwana matra hanyu v̄av̄o, mana mahombe yatru yasuzimiha.›

⁹ Ɓadi wendza hikima wale wadjiɓu: ‹Kaitsokiri, mana kayatsoritosha wasi na wanyu. Ɓorwa mwendre ha maudzizi-matra, mwadzinunuliye.›

¹⁰ Ɓas, uendra yawo wanunuwe, ɓwana-harusi aja. Wale waka tayari, wangia na waye moni na lipa la harusi, mulongo uɓalwa.

¹¹ Mwisoni wanahirimu watruwashe wasalia wale wawaswili, warongoa: ‹Mutukufu, Mutukufu, riɓuliye!›

¹² Ɓadi awadjiɓu: ‹Nisumuambiani ha kweli, wami tsimujini.›

¹³ V̄av̄o namuke hashiri, mana kamusujua isuku wala isa.»

Mufano wa warumizi wararu wav̄olwa dhwamana

¹⁴ «Wakati uwo utsoka mufano wa mutru andrao musafara, ahira warumizi wahe, awadhwaminisha mali zahe.

¹⁵ Moja amuv̄a mapauni matsano ya fedha, moja maili, na wa raru av̄olwa pauni moja, kula mutru av̄olwa ha ulingana na inamuna atsoshindrao, amwesa alawa.

¹⁶ V̄ale kamwe ule aka av̄olwa mapauni matsano andre ayarumishia ata apara matsano yangina.

¹⁷ Ɗe ha inamuna ile wajau, ule aka apara yamaili, ayarumishia ata apara maili yangina.

¹⁸ Ɓadi ule aka apara lipauni moja, andre atsimbi gumbo, atsitsi ifedha ya murumisa wahe.

¹⁹ Ɓaanda ya muda mwengi, murumisa wa warumizi wale aregea, aja afanya hisaɓu na wao.

²⁰ Ule aka av̄olwa mapauni matsano aja, av̄ingi matsano yangina, amwesa arongoa: ‹Mutukufu, univ̄a mapauni matsano; ɓasi tsami tsipara matsano yangina.›

²¹ Sa ile murumisa wahe amuambia: ‹Ufanya fetre, wawe murumizi mwema, muaminifu; uonesa uaminifu hari mwa trongo shashi, v̄av̄o nitsohudhwaminisha nyengi. Ko, uje ufurahi na murumisa waho.›

²² Ule aka av̄olwa mapauni maili aja wajau, arongoa: ‹Mutukufu, univ̄a mapauni maili; tsami tsipara maili yangina.›

²³ Sa ile murumisa wahe amuambia: ‹Ufanya fetre, wawe murumizi mwema, muaminifu; uonesa uaminifu hari mwa trongo shashi, v̄av̄o nitsohudhwaminisha nyengi. Ko, uje ufurahi na murumisa waho.›

²⁴ Amwesa ule aka av̄olwa lipauni moja aja wajau, arongoa: ‹Mutukufu, nakojua amba wawe mutru muhali: wawe uvuna v̄ahanu kwataɓu, amwesa ungulidza mavuna v̄ahanu kwatsanya.

²⁵ Ɓas tsiriyi, tsendre tsitsitsi pauni laho shiv̄andreju mwa tsi; tsiyo, renga mali yaho.›

²⁶ Ɓadi murumisa wahe amudjiɓu: ‹Wawe murumizi wa peu mwendza shiɗa! Wakojua ha uzuri tu amba wami uvuna v̄ahanu tsataɓu, na ungulidza mavuna v̄ahanu tsatsanya!

²⁷ Ɓasi uka ulazimu utriye fedha yangu hari mwa pa la marike amba namoregea, nipariye mali yangu na faida.

²⁸ V̄av̄o namumurengeye pauni lilo, muv̄elo ule aliona mapauni kumi.

²⁹ Mana yotsi aliona, atsov̄olwa ata azidi ukana; ɓadi uwo kasina, atsorengewa ata ile alionayo.›

³⁰ Na umurumizi kana faida uwo, namumuvutse v̄ondze shidzani oho, v̄ahanu v̄utsokao shililo na uv̄uhura manyo.»

Hukuma ya mwiso

³¹ «Wakati uMwana wa Mwanadamu|Mwana wa Mwanadamu atsojao hari mwa utukufu wahe na piya zimalayika v̄umoja na waye, atsoketsi hari mwa ishiri ndzitukufu yahe ya ufalume.

³² V̄av̄o piya zinishani zitsongulidziwa mbeli zahe. Wakati uwo atsoɓausa watru, mauri mutsunga atengao yamaɓariɓari na zimbuzi.

³³ Atsohetsi yamaɓariɓari humeni hahe, na zimbuzi potroni.

³⁴ Amwesa umufalume atsoambia wao watsokao humeni hahe: ‹Namuje wanyu mulio uwaɓarikishiwa wa Ɓaɓangu, muwarithi Utawalizi mwatayarishiwawo rangu lidunia uumbwa yalo.

³⁵ Mana tsikana ndza, na wanyu muniv̄a ya uɗya; tsikana nyora, na wanyu muniv̄a ya unwa; tsika mudjeni, na wanyu munikariɓisa.

³⁶ Tsika wadzi, na wanyu munipindrisa; tsika muwaɗe, na wanyu muniangalia; tsika shiv̄ani, na wanyu muja muniono.›

³⁷ Wakati uwo, warahara wale watsodjiɓu: ‹Raɓi, lini ɗe rahuona wakana ndza, rahuv̄a ya uɗya, au wakana nyora, rahuv̄a ya unwa?

³⁸ Lini rahuona mudjeni, rahukariɓisa, au wadzi, rahupindrisa?

³⁹ Lini ɗe rahuona muwaɗe, au shiv̄ani, raja rahuangalia?›

⁴⁰ Sa ile mufalume atsowadjiɓu: ‹Nisumuambiani ha kweli, kula wakati mwakofanyiazo mutiti moja hari mwa wananyangu watiti rahana watiti wao, v̄ale mwakonifanyiazo ɗe wami.›

⁴¹ Amwesa atsoambia wao watsokao potroni hahe: ‹Namuniɓaushiye v̄anu wanyu mwalaanwa! Namwendre hari mwa umoro ulio amba kauzimiha dahari watayarishiwa Iɓilisa na warumizi wahe!

⁴² Mana tsikana ndza, wala kamwaniv̄a ya uɗya; tsikana nyora, wala kamwaniv̄a ya unwa;

⁴³ tsika mudjeni, wala kamwanikariɓisa; tsika wadzi, wala kamwanipindrisa; tsika muwaɗe, tsika shiv̄ani, wala kamwaja mwaniangalia.›

⁴⁴ Ɓasi wao wajau watsodjiɓu: ‹Raɓi, lini rahuona wakana ndza, au nyora, au mudjeni, au wadzi, au muwaɗe, au shiv̄ani, wala karahusaidi?›

⁴⁵ Na waye atsowadjiɓu: ‹Nisumuambiani ha kweli, kula wakati kamwaka mwafanyiazo mutiti moja hari mwa wananyangu watiti rahana watiti wao, v̄ale kamwakonifanyiazo ɗe wami.›

⁴⁶ Ɓas, wao watsendra hari mwa ãdhaɓu ya daimani aɓada, ɓadi warahara wale hari mwa uhayati mukamilifu wa daima.»