MATIYO 24 - Ha`bari Ndjema ya I Maore

Insa asujudza mukomoleo wa iNyumba Ndzitwaharifu

¹ Iv̄o Insa akolawa moni na iNyumba Ndzitwaharifu, maswihaɓa yahe wamukuruɓia wamuonese miundrio yayo.

² Ɓadi awaambia: «Musuona zini piya? Nisumuambiani ha kweli, v̄anu kav̄utsoɓaki ata ɓwe uju na munyahe amba kalav̄indrusiwa.»

Taãɓu na matreso yajudzao umwiso

³ Ɓaanda Insa aka aketsi hari mwa uMulima wa Mizaituni|Mulima wa Mizaituni, maswihaɓa yahe yaja yamupara weke, wamudzisa: «Riambiye, wakati trini trongo izo zitsohidjirio? Na ãlama trini ɗe itsoonesao umuregeo waho na umwiso wa lidunia?»

⁴ Ɓas, Insa awadjiɓu: «Namufahamu, v̄wasuke mutru amudanganyani.

⁵ Mana wengi watsodziv̄eleha amba ha lidzina langu, warongowe amba: ‹Wami ɗe Kristi!› tsena watsodanganya watru wengi.

⁶ Mutsokia haɓari zahusu kondro, na ari-ari za kondro, ɓadi mwasudzilishe mwangiliwa na trisidzo. Mana izo zilazimu zihidjiri, ɓadi raha kautsoka amba ɗe umwiso.

⁷ Nishani itsohima iwane kinyume na nishani, na ufalume kinyume na ufalume. V̄ahanu v̄wengi v̄utsoka dzaha la ndza, na midridrimio ya shiv̄andre ya tsi.

⁸ Zizo piya zitsoka ɗe umwandro tu wa matungu ya udzazi.

⁹ Ɓas, mutsotrilwa hari mwa matreso, na uulawa. Mutsoengwa na piya zinishani ha siɓaɓu ya lidzina langu.

¹⁰ V̄av̄o tsena ha watru wengi itsoka siɓaɓu ya ukwala hari mwa uaminifu wawo, watsov̄iriana nyuma na uengana.

¹¹ V̄utsohima wanafiki wengi watsodzifanyao amba washukidziwa marongozi, amwesa watsodanganya watru wengi.

¹² Ha iv̄o upeu utsozidio, uv̄endza ya indadi ɓole ya watru, itsozilia.

¹³ Ɓadi uwo atsostahamilio ata mwiso, atsohuyiwa.

¹⁴ iHaɓari Ndjema ini ya Utawalizi itsotekelezewa hari mwa ulemengu kamili, ile ike ushahidi ha piya zinishani; v̄av̄o iv̄o ɗe umwiso utsojao.»

Udhilifu unagisio iNyumba Ndzitwaharifu

¹⁵ «Mutsoona udhilifu unagisio mutrume Danieli akourongoa ulio amba utsolishwa v̄uV̄ahanu V̄utwaharifu. (Mutru asomao, naelewe imana ya v̄av̄o.)

¹⁶ Ɓasi sa iyo, wao watsokao hari mwa iYudeya, nawatrale wandre milimani.

¹⁷ Na mutru atsokao uju na iɓanara ya inyumba yahe, asushuke amba asendra arenge zitru zahe moni.

¹⁸ Tsena, mutru atsokao shambani hahe, asuregeye ɗagoni amba asendra arenge ikandzu yahe.

¹⁹ Maondo ha watruwashe watsokao na hamili, na wao watsohamusao hari mwa zisuku izo!

²⁰ Namumiye Mungu umutralio wanyu usuke wakati wa kashikazi au Suku ya Uv̄umuzi!

²¹ Mana v̄av̄o v̄utsoka ãdhaɓu ɓole, tsena ndziro mauri raha kav̄waparoka rangu lidunia uumbwa yalo ata upara ileo ini, wala kav̄utsoka tsena ata idahari.

²² Na djeli zisuku za ãdhaɓu zizo kazaka zav̄ungudziwa, kav̄usi ata mutru atsohuyiwao; ɓadi ha siɓaɓu ya uwatru watsahulwa, suku zizo zitsov̄ungudziwa.

²³ V̄av̄o neka mutru asumuambiani: ‹Kristi a v̄anu!› au, ‹A v̄ale!›, mwasumuamini.

²⁴ Mana v̄utsohima makristi wa trambo, na wanafiki watsodzifanyao amba washukidziwa marongozi; watsofanya ãlama za midjuza ɓole na trongo za ãdjaɓu ile wadanganye, neka mukinishiha, ata wao watsahulwa.

²⁵ Tsini, tsimujudzani rangu kaɓula.

²⁶ Ɓasi neka musuambilwa: ‹Tsuwo a padzaju oho!› musendre; au, ‹A moni na mafuko yao v̄av̄o!› mwasuamini.

²⁷ Mana mauri ɗe ipeni iv̄enuhao rangu jua la uhea ionehanao jua la utswa, ɗe namuna utsokao umujilio wa uMwana wa Mwanadamu|Mwana wa Mwanadamu.

²⁸ V̄ahanu v̄ulio shipindra, ɗe v̄ahanu mahwezi yatsongulidzanao.»

uMujilio wa uMwana wa Mwanadamu

²⁹ «Ɓaanda ya zisuku za ãdhaɓu zizo kamwe, ‹lijua litsongia shidza, na umwezi kautsowala tsena, zinyora zitsopuliha ulawa mbinguni, na zingushindzi za mbinguni zitsogudzusiwa.›

³⁰ V̄av̄o iãlama ya uMwana wa Mwanadamu itsov̄enuha mbinguni, na piya zikaɓila za shiv̄andreju mwa tsi zitsodzilaumu, wamoona uMwana wa Mwanadamu iv̄o atsojao hari mwa yamavingu ya uwinguni, ha ushindzi na utukufu muɓole.

³¹ Ha ɓaragumu ɓole atsov̄eleha malayika zahe hari mwa zinyonga nne za ishiv̄andre ya tsi, ile zingulidze watsahulwa wahe, ulawa kotso ata kotso ya uwingu.»

Mufano wa muri uhiriwao mufigiye

³² «Namurenge musomo hari mwa mufano warengwa ha mufigiye. Marahi yahe yamofanyishiha marembwavu na yamani yamoandrisa utsanga, wanyu ujua amba kashikazi ikaɓili.

³³ Ɗe ha inamuna iyo wanyu wajau, mwamoona piya trongo izo, v̄av̄o mutsojua amba uMwana wa Mwanadamu a kariɓu, a mulongoju.

³⁴ Nisumuambiani ha kweli, zama za leo kazitsov̄ira kaɓula piya trongo zizo kazahidjiri.

³⁵ uWingu na ishiv̄andre ya tsi zitsov̄ira, ɓadi marongozi yangu kayatsov̄ira.»

Kav̄u mutru ajuao isuku wala isa ya umuregeo wa uMwana wa Mwanadamu

³⁶ «Ɓadi yahusu isuku na isa, kav̄usi ata mutru aijuao, tsi ɗe zimalayika za mbinguni, wala tsi ɗe uMwana, ɓadi ɗe Ɓaɓa weke wahe.

³⁷ Mauri ɗe zitrongo namuna zahidjiri wakati wa Nuhu, ɗe utsokao umujilio wa uMwana wa Mwanadamu.

³⁸ Mana hari mwa zisuku kaɓula ya lidzaha la maji, wanadamu wakoɗya na unwa, wakolola na ulodza wana wawo, mupaka ɗe isuku Nuhu angia moni na lidjahazi.

³⁹ Kawakodzifikiria na trongo ata iv̄o lidzaha la maji lawajilia, lawav̄inga piyawo. Iyo ɗe inamuna wajau umujilio wa uMwana wa Mwanadamu utsokao.

⁴⁰ V̄av̄o v̄wamoka watru waili shambani, moja atsorengwa, na umoja alishwe.

⁴¹ Na v̄wamoka watruwashe waili warwao, moja atsorengwa, na umoja alishwe.

⁴² Ɓasi namuke hashiri, iv̄o kamusujua isuku Raɓi wanyu atsojao.

⁴³ V̄av̄o namuelewe ha uzuri: na djeli monyewe nyumba akojua wakati trini mwidzi atsojao, atsoka hashiri, katsolisha nyumba yahe yavundzwa.

⁴⁴ Iyo ɗe imana wanyu wajau namuke tayari, mana uMwana wa Mwanadamu atsoja wakati kamutsoufikiri.»

Murumizi muaminifu na murumizi tsi muaminifu

⁴⁵ «Uv̄i ɗe murumizi muaminifu mwendza hikima murumisa wahe amudhwaminisha muraɓa wahe, av̄e zahula watru wahe wakati walazimu?

⁴⁶ Aɓarikishiha murumizi uwo murumisa wahe amoregea ɗagoni, atsomuparao amba ashahiliha na hazi zahe.

⁴⁷ Nisumuambiani ha kweli, atsomudjukumisa piya mali zahe.

⁴⁸ Ɓadi neka amba uwo murumizi wa peu adziambiao: ‹Mutukufu wangu asuhoma uja›,

⁴⁹ ɓasi aandrisa uɓuɓua wanyahe, asuɗya na unwa v̄umoja na walevi,

⁵⁰ v̄av̄o murumisa wa murumizi ule atsoja suku ilio amba kasudzilindrilia, na sa kasuijua.

⁵¹ Atsomuãdhaɓisha ha kusudi, amuv̄e ɓandza lahe v̄umoja na uwanafiki, v̄ahanu v̄utsokao shililo na uv̄uhura manyo.»