MATIYO 22 - Ha`bari Ndjema ya I Maore

Mufano wa watru walalihwa karamu

¹ Insa arenge tsena umurongo, alagua na wao ha urumia mifano. Awaambia:

² «Utawalizi wa Monyewe ziMbingu ujua ufanishihe na mufalume akofanya karamu ya ndrolo ya mwana wahe mutruɓaɓa.

³ Av̄eleha warumizi wahe wandre wahire wale walalihwa hari mwa ikaramu, ɓadi kawakiri waja.

⁴ Av̄eleha tsena warumizi wangina ha uwaambia: ‹Namuambiye wadjeni: «Madza tsipihi ikaramu yangu, mahondzo na zinyama zendza matra zitsindzwa; trongo piya za tayari, namuje karamuni!» ›

⁵ Ɓadi kawashapiha na itrongo, wandre dzawo na mashuhuli yawo: v̄wa andra shambani hahe, wangina hari mwa ɓiashara zahe.

⁶ Wasalia wasiki warumizi wale, wawarendre nnayi, amwesa wawaulu.

⁷ Ɓas, umufalume akasiriha. Av̄eleha madjeshi yahe yandre yaangamidze waula wale, na utria moro liɗago lawo.

⁸ Amwesa aambia warumizi wahe: ‹Ikaramu ya tayari, ɓadi watru walalihwayo, kawaistahiki.

⁹ V̄av̄o namwendre hari mwa zinia-traru za ndzia, mulalihe iharusi piya watru mutsowaparao.›

¹⁰ Ɓas, warumizi wale wandre mav̄areni, wangulidza piya uwatru wakowapara, rangu uwema ata uwayi, ata lipa la harusi lijaya wadjeni.

¹¹ Wakati mufalume angia aangaliye wadjeni wale, aono v̄ale mutru kaka apindra nguo za harusi.

¹² Amudzisa: ‹Mwandzani wangu, ufanya jeje ata wangia v̄anu wala kwapindra nguo za harusi?› Ɓadi mutru ule aɓuriha.

¹³ Ɓas, mufalume aambia warumizi wale: ‹Namumufunge yimindru na yimihono, mumuvutse shidzani v̄ondze oho, v̄ahanu v̄utsokao shililo na uv̄uhura manyo.›

¹⁴ Mana wengi ɗe wahiriwao, ɓadi washashi ɗe watsahuliwao.»

Suala lahusu uliv̄a latete

¹⁵ Ɓas, watru wa ishama ya Mafarisayo wakwendra wapange namuna ya umulimbia Insa utra ata wamusike hari mwa marongozi yahe.

¹⁶ Wamuv̄eleshea wanazoni wawo na watru wa ishama ya Hirudu wamuambiye: «Fundi, risujua amba wawe mutru wa kweli, tsena wawe usomedza indzia ya Mungu ha uɗunga ukweli, wala kusudzifahamisha ha mutru atsokao yotsi, mana wawe kutsahua sura.

¹⁷ Riambiye ɓasi namuna uonao: iTrongo ya umuliv̄a latete Kaiswara, iruhusiwa, au kayaruhusiwa?»

¹⁸ Ɓadi Insa iv̄o akowajua na upeu wawo, adjiɓu: «Wanyu wanafiki! Manatrini munilimbiao utra?

¹⁹ Namunionese turuturu iliv̄iwao latete.» Sa ile wamuv̄ingia ituruturu ya fedha.

²⁰ Insa awadzisa: «Sura ini na lidzina lini, za mbani?»

²¹ Wamudjiɓu: «Za Kaiswara.» Ɓas, awaambia: «V̄av̄o namumuv̄e Kaiswara za Kaiswara, mumuv̄e na Mungu za Mungu.»

²² Wakati wakia lidjawaɓu lile washanga, wamulishi wandre dzawo.

Suala lahusu muregezeo hayi

²³ Suku ɗe wiyo ile, v̄uka ɓaãdhwi ya watru wa ishama ya Masadukayo warongoao amba kav̄u trongo ya muregezeo hayi ulawa ha uwafu, wamujilia Insa, wamudzisa suala lini:

²⁴ «Fundi, Musa arongoa amba neka mutru aja afu wala kadza mwana, ilazimu mwananyahe mutruɓaɓa alole mutrumushe ule afiliwa, ile amudzaliye mwananyahe wana.

²⁵ Ne v̄uka hari mwa wasi v̄anu wananya saɓa; wa handra alola, ɓila kapara adza, ne afu, amulishia mwananyahe mutrumushe wahe ule.

²⁶ Zifanyishiha namuna ile ha wa v̄ili, na wa raru, ata iwaswili ha wa saɓa.

²⁷ Ɓaanda ya wao piya, mutrumama ule aja afu wajau.

²⁸ Ɓasi wakati wa umuregezeo hayi, atsoka mutrumushe wa uv̄i hari mwa saɓa wale? Mana piyawo waka wamulola!»

²⁹ Sa ile Insa awadjiɓu: «Wanyu mulatsiha, mana kamusuelewa, tsi ɗe uMuangishio Mutwaharifu, wala tsi ɗe ushindzi wa Mungu.

³⁰ Mana wakati wa umuregezeo hayi, watruɓaɓa kawatsolola, wala watrumama kawatsololwa, ɓadi watsoka mauri ɗe zimalayika [za Mungu] pev̄oni.

³¹ Hari mwa itrongo ya umuregezeo hayi wa uwafu, hali kamwasoma zini Mungu amuambiani?

³² ‹Wami ɗe Mungu wa Iɓrahima, Mungu wa Isiaka, na Mungu wa Yaãkuɓu.› Ha izo, Mungu tsi Mungu wa uwafu, ɓadi wa walio hayi.»

³³ iDunia yaka v̄ale ukia yawo trongo zile, yakoshanga na yimisomo yahe.

iÃmuri mahususu raha na zasalia

³⁴ Watru wa ishama ya Mafarisayo ɓaanda wakia amba Insa aɓurisa yaMasadukayo, wangulidzana.

³⁵ Moja hari mwawo, aka fundi wa Sharia, amudzisa suala lini ha utsaha amulimbiye utra:

³⁶ «Fundi, ãmuri iv̄i ɗe mahususu hari mwa iSharia?»

³⁷ Ɓas, Insa amudjiɓu: « ‹Utsomuv̄endza Mwalaho Monyezi Mungu ha piya umo waho, ha piya iroho yaho, na ha piya zifikira zaho.›

³⁸ Iyo ɗe iãmuri ɓole, amwesa ɗe ya handra hari mwa iSharia.

³⁹ Na ya v̄ili tsini ilio sawa na ya handra ile: ‹Utsomuv̄endza munyaho mauri ɗe iwawe yaho.›

⁴⁰ Ãmuri mbili zini ɗe zilio koho la piya iSharia na yimisomo ya yimitrume.»

Suala lahusu uMutsahuliwa wa Mungu

⁴¹ Wakati watru wa ishama ya Mafarisayo waka v̄umoja, Insa awadzisa:

⁴² «Musufikiri trini yahusu Kristi? Waye mwana wa mbani?» Wamudjiɓu: «Mwana wa Daudu.»

⁴³ Ɓas, awaambia: «Ha namuna jeje ɓasi, ata uv̄ingwa yahe na iRoho, Daudu amuhira ‹*Raɓi› wakati arongoa:

⁴⁴ ‹Mola amuambia Raɓi wangu: «Ketsi humeni hangu, ata mupaka nifanye maãduwi yaho yake shikadza-mindru yaho.» ›

⁴⁵ Ɓasi neka amba Daudu asumuhira ‹Raɓi›, v̄av̄o ha namuna jeje atsojuao ake mwana wahe?»

⁴⁶ Kav̄waka ata mutru ashindra amudjiɓu trongo. Na rangu suku iyo kav̄waka tsena mutru asuɓutu amudzisa suala.