MATIYO 21 - Ha`bari Ndjema ya I Maore

Insa asungia Yerusalemu na shime

¹ Wakati wakokuruɓia Yerusalemu, ata wawaswili Ɓaitifadji kariɓu na uMulima wa Mizaituni|Mulima wa Mizaituni, Insa akidza mbeli maswihaɓa maili,

² ha uwaambia: «Namwendre hari mwa liɗago lilio mbeli na wanyu v̄av̄o; ungia yanyu mutsopara pundra ndzishe yafungwa, na umwana wayo; namuziɓuliye, muniv̄ingiyezo.

³ Neka v̄wa mutru amuambiaoni trongo, mutsodjiɓu amba: ‹*Raɓi asuzitsaha›, na v̄av̄o atsozijeledza.»

⁴ Zini zija ile itrongo ini yaka yarongolwa ha ndzia ya mutrume itsimidzihe:

⁵ «Namuambiye mwana mutrumushe wa Siyuna: ‹Tsuwo umufalume waho asuhujilia na utrulivu, apandra pundra, mwana-pundra, mwana wa shinyama itrikao.› »

⁶ Ɓas maswihaɓa yale yalawa, wafanya zile Insa aka awaãmurisha.

⁷ Wav̄ingi ipundra na umwana wayo, wahetsi nguo zawo uju na wizo, amwesa wamuketsisa.

⁸ Wengi hari mwa idunia ile wakoodza nguo zawo ndziani; wasalia wakokutrua marahi ya miri na uyahetsi hari mwa indzia.

⁹ iDunia yakomukilia mbeli na ile yakomuɗunga, yakoshelemedza: «Hozana ha uMwana wa Daudu|Mwana wa Daudu! Naɓarikishihe uwo ajao ha lidzina la Mola! Hozana hari mwa yimikaɓala ya uju rahana uju!»

¹⁰ Wakati Insa angia Yerusalemu, piya liɗago lishanga. Watru wakodzisa: «Unu mwa mbani?»

¹¹ Na idunia yakodjiɓu: «Uwo ɗe mutrume Insa wa Nazareti hari mwa iGalilaya.»

Insa asuĩdzia waudzizi moni na iNyumba Ndzitwaharifu

¹² Insa angia moni na iNyumba Ndzitwaharifu, aĩdzia piya watru wakoudza na ununua moni mwayo. Av̄indrusa zimeza za waɓadilizi-marike, na ziziri za maudzizi-ndiwa.

¹³ Amwesa awaambia: «V̄uangihwa: ‹iNyumba yangu itsohiriwa nyumba ya mamilio›; ɓadi wanyu muifanya gumbo la warav̄izi!»

¹⁴ Wakati ule v̄umujilia wafa-matso na magoɓo moni na iNyumba Ndzitwaharifu ile, na waye awazihira.

¹⁵ Ɓadi yaMatolezi Maɓole ya Masadaka|Mutolezi-Masadaka na yaMafundi ya Sharia watukiwa iv̄o waona trongo za ãdjaɓu akozifanya, na wanatsa iv̄o wakoshelemedza moni na iNyumba Ndzitwaharifu: «Hozana ha uMwana wa Daudu!»

¹⁶ Sa ile wamuambia: «Saɓu usukia trongo wazirongoao?» Insa awadjiɓu: «Ewa. Hali kamwaparosoma marongozi yanu: ‹Udzitolea sifa hari mwa hanyo za wanatsa na za wale wahamwao›?»

¹⁷ Amwesa awalishi v̄ale, alawia liɗago ha uendra Ɓaitihaniya, v̄ahanu andra av̄itsa uuku.

Hadisi ya muri kaudza

¹⁸ Asuɓuhi yaɗunga Insa akoregea ɗagoni, akia ndza.

¹⁹ Aono mufigiye ndziani, aukuruɓia, ɓadi kapara shitru neka tsi ɗe mani yahe. Sa ile auambia: «Ata dahari kutsodza tsena mbia.» Sa ɗe wiyo ile kamwe, mufigiye ule uhumu.

²⁰ yaMaswihaɓa uona yawo trongo ile, waremwa na ushangavu ha kusudi. Wadzisa: «Ha namuna jeje ata hari mwa sa moja na mufigiye ule wahuma?»

²¹ Insa awadjiɓu: «Nisumuambiani ha kweli, na djeli mukana uaminifu ɓila taradudu itsokao yotsi, tsi ɓasi amba mwatsofanya zafanyiwa mufigiye ule tu, ɓadi ata mwamoambia mulima unu amba: ‹Dzitowe v̄av̄o, udzipulise ɓaharini›, na izo zatsofanyishiha.

²² Yotsi mutsoimiao ha uaminifu, mutsov̄olwayo.»

Suala lahusu yezi ya Insa

²³ Insa angia moni na iNyumba Ndzitwaharifu na wakati akosomedza v̄ale, yaMatolezi Maɓole ya Masadaka, na waɓole wa idjama waja wamuambia: «Ha yezi trini ɗe ufanyao trongo zini? Mbani ɗe ahuv̄a yezi iyo?»

²⁴ Insa awadjiɓu: «Wami wajau nisumudzisani suala moja; neka munidjiɓu, v̄av̄o nitsomuambiani ha yezi trini nifanyao trongo zini.

²⁵ Muɓaĩsho *Yahaya akofanya, uka ulawia hav̄i? Ha Monyewe ziMbingu, au ha wanadamu?» Ɓadi wakolana shuara wao na wao ha urongoa: «Neka ridjiɓu: ‹Mbinguni›, atsoriambia: ‹Manatrini ɓasi ata kamwamuamini?›

²⁶ Na neka rirongoa: ‹Ha wanadamu›, ɓasi narifahamu idunia, mana piya wakomurenga Yahaya amba mutrume.»

²⁷ Ɓas, wamudjiɓu Insa: «Karisujua.» Na waye wajau awaambia: «Wami ne tsisumuambiani ha yezi trini nifanyao trongo zini.»

Insa asutoa mufano wa wana waili

²⁸ «Musufikiri trini hari mwa mufano unu? V̄uka mutru akana wana watruɓaɓa waili. Suku, aambia wa handra: ‹Mwana wangu, endra wafanye hazi leo hari mwa ishunga ya mizaɓiɓu.›

²⁹ Adjiɓu: ‹Tsiv̄endze.› Ɓaanda ya mwana muda aja ajutsa, amwesa andre.

³⁰ Ɓaɓa ule aambia wa v̄ili trongo ɗe wizo zile. Ule adjiɓu: ‹Ewa Ɓaɓa, nisendra.› Ɓadi, kandra ata v̄ahanu.

³¹ V̄av̄o uv̄i hari mwa wao waili, afanya mav̄endzeleo ya ɓaɓahe?» Ɓas wadjiɓu: «Ɗe wa handra.» Sa ile Insa awaambia: «Nisumuambiani ha kweli, yamaliv̄isa-latete na masusu wasumutranguliani hari mwa Utawalizi wa Mungu.

³² Mana Yahaya Muɓaĩshizi aja hanyu ha umuonesani indzia yarahara, na wanyu kamwamuamini; ɓadi yamaliv̄isa-latete na masusu wamuamini. Na wanyu wala ukana muono izo, ne kamwandra toɓa pare mwamuamini.»

Mufano wa walimizi waovu wa shunga ya mizaɓiɓu

³³ «Namuvulishiye mufano wangina tsunu: V̄uka monyewe shamba, ataɓu mizaɓiɓu. Alizingidzia vala, atsimbi ngama ya uhamua zimbia, aundru na munara wa ugogea, aliwadjirisa walimizi, amwesa asafiri.

³⁴ Wakati wa mavuna wamowaswili, av̄eleha warumizi wahe ha uwalimizi wale, wandre warenge ushuru wahe.

³⁵ Ɓadi walimizi wale wasiki uwarumizi, waɓuɓua umoja, umoja wamuulu, iv̄o na umoja wamuangamidza ha mawe.

³⁶ Ɓas, monyewe lishamba av̄eleha warumizi wangina raha, wengi rahana wa handra wale, na uwalimizi wawarendrea ɗe wizo zile.

³⁷ Mwisoni awav̄eleshea umwana wahe ha urongoa: ‹Watsostehi umwana wangu.›

³⁸ Ɓadi wakati walimizi waona mwana ule, waambiana: ‹Tsunu monyewe atsoarithio. Namuje rimuule, rirenge umwaratha wahe!›

³⁹ Ɓas wamusiki, wamutowo v̄ondze na lishamba, wamuulu.

⁴⁰ V̄av̄o wakati monyewe ishunga atsojao, atsofanyia trini walimizi wale?»

⁴¹ Wamudjiɓu: «Ɓila shaka atsoangamidza walimizi wa peu wale, aadjirise ishunga ya mizaɓiɓu ile walimizi wangina watsomuv̄ao ushuru wahe wakati wa mavuna.»

⁴² Ɓas Insa awaambia: «Hali kamwaparosoma moni na uMuangishio Mutwaharifu zini? Amba: ‹Liɓwe waundrizi walilatsa, ɗe larendreha liɓwe mahususu la nyongaju. Iyo ilawa ha Mola, na iyo ãdjaɓu matsoni hatru.›

⁴³ Iyo ɗe imana, nisumuambiani, mutsorengewa Utawalizi wa Mungu, uv̄olwe umati utsouv̄ingiao mavuna. [

⁴⁴ Mutru yotsi atsowao hari mwa liɓwe lile, atsovundziha-vundziha; na uwo litsomushukiao, atsotsereha-tsereha.]»

⁴⁵ Ɓaanda yaMatolezi Maɓole ya Masadaka na watru wa ishama ya Mafarisayo wakia yimifano Insa akoyitoa v̄ale, waelewa amba akowarongoa ɗe wao.

⁴⁶ Ɓas wakotsaha wamusike, ɓadi wakoria idunia, iv̄o yakomurenga amba waye mutrume.