MATIYO 18 - Ha`bari Ndjema ya I Maore

Muɓole ɗe uv̄i hari mwa Utawalizi wa Monyewe ziMbingu?

¹ Wakati ule yamaswihaɓa yandre yamupara Insa, yamudzisa: «V̄av̄o muɓole ɗe uv̄i hari mwa Utawalizi wa Monyewe ziMbingu?»

² Ɓas, Insa ahiri mwanamutsa, amuhetsi hari-hari na wao,

³ amwesa arongoa: «Nisumuambiani ha kweli, neka kamusugauha mwaka mauri wana, kamutsongia hari mwa Utawalizi wa Monyewe ziMbingu.

⁴ Ha izo, mutru yotsi atsodzifanyao mwekevu mauri ɗe mwanamutsa unu, atsoka ɗe umuɓole hari mwa Utawalizi wa Monyewe ziMbingu.

⁵ Na mutru yotsi arengao mwanamutsa mauri ɗe unu ha lidzina langu, asunirenga ɗe wami.»

Yahusu zitsongao mutru akwale

⁶ «Mutru atsokwalisao moja hari mwa uwatiti wanu waniaminio, itsoka afudhwali ya waye ufungwa ɓwe ɓole tsingoju, andre apulisiwe zilindrini.

⁷ Maondo ha ulemengu, iv̄o v̄ulio trongo zikwalisao! Lazima amba v̄uke trongo zikwalisao, ɓadi maondo ha uwo atsotsongao zije!

⁸ Neka muhono waho au umundru uhutsongesha ukwale, ukutruwe, uuvutse mbali na wawe; ɓorwa hahoju ungiye hari mwa uhayati mukamilifu na muhono moja au mundru moja, rahana wawe ukana mindru mili na mihono mili, ne uvutswe moni na umoro kauzimiha dahari.

⁹ Na neka dzitso laho lihutsongesha ukwale, livoɓowe, ulivutse mbali na wawe; ɓorwa hahoju ungiye hari mwa uhayati mukamilifu na dzitso moja, rahana ukana matso maili, ne uvutswe moni na umoro wa Djahanama.»

Mufano wa ɓariɓari laka lapotea, laparihana

¹⁰ «Namudzitahadharishe na uv̄ungua moja hari mwa watiti wanu; mana nisumuambiani amba malayika zawo pev̄oni, ha dahari za maswa na Ɓaɓangu alio pev̄oni. [

¹¹ Mana uMwana wa Mwanadamu|Mwana wa Mwanadamu aja ahuyi wapotea.]

¹² Musuona jeje? Neka mutru ana maɓariɓari miya amba moja lipotea, v̄av̄o katsolisha tuswini na shendra yale mulimani hule, andra azunguha moja lile lapotea?

¹³ Tsena amolipara, nisumuambiani ha kweli, waye ujiv̄iwa nalo raha na tuswini na shendra yale kayaka yapotea.

¹⁴ Ha izo wajau, tsi ɗe mav̄endzeleo ya Ɓaɓanyu alio mbinguni, amba v̄upoteye moja hari mwa watiti wanu.»

Yahusu watru uswihilishana

¹⁵ «Neka munyaho ahukoso, endra wamupare weke, umueledze likosa lahe. Neka ahuv̄ulishia, v̄av̄o itsoka amba umupara munyaho.

¹⁶ Ɓadi neka kahuv̄ulishia, renga mutru moja au waili wahuɗunge, pare kula urongozi utsolawao uhakikishiwe na ushahidi wa watru waili au wararu.

¹⁷ Neka kakiri awav̄ulishia, judza iDjama Ndziwaminifu; na neka ahara uvulishia wajau iDjama Ndziwaminifu, v̄av̄o murenge mauri mutru kamuji Mungu, au muliv̄isa-latete.

¹⁸ Ha kweli nisumuambiani, yotsi mutsoifungao shiv̄andreju mwa tsi, itsofungwa mbinguni; na yotsi mutsoiɓuliao shiv̄andreju mwa tsi, itsoɓuliwa mbinguni.

¹⁹ Nisumuambiani raha, neka waili hari mwanyu waafikiana shiv̄andreju mwa tsi wamiye itsokao yotsi, watsov̄olwayo na Ɓaɓangu alio mbinguni.

²⁰ Mana v̄ahanu v̄ulio amba waili au wararu wangulidzana ha lidzina langu, wami uka v̄umoja na wao.»

Yahusu watru uswamihiana

²¹ Wakati ule Monye amujilia Insa, amudzisa: «Raɓi, mara ngav̄i nitsoswamihio munyangu amonikosa? Hali, ata mara saɓa?»

²² Insa amudjiɓu: «Tsisuhuambia amba ata mara saɓa, ɓadi mupaka mara saɓwini ata mara saɓa.

²³ Iyo ɗe imana Utawalizi wa Monyewe ziMbingu ujuao ufanisiwe na hadisi ya mufalume akotsaha afanye zihisaɓu za warumizi wahe.

²⁴ Wakati aandrisa, av̄ingiwa mutru akomuyia alifu kumi za fedha.

²⁵ Iv̄o kakana za uliv̄a, murumisa wahe aãmurisha audziwe, waye, mushe wahe, wana wahe, na kula akanayo, pare ideni iliv̄ishihe.

²⁶ Sa ile murumizi ule adzivutsu v̄otsi mbeli zahe, amuambia: ‹Ka na suɓira na wami, nitsohuregezea piya!›

²⁷ Ɓas, murumisa ule aremwa na poreho na murumizi wahe ule, amuswamihi deni yahe, amulishi andre dzahe.

²⁸ Ɓaanda alawa v̄ale, murumizi ule apara munyahe wa hazi akomutsaha turuturu miya. Amusiki, akomusinya ligandzi na urongoa: ‹Liv̄a iyo nihutsahaoyo.›

²⁹ Ɓas, munyahe ule adzivutsu mindruni hahe, amuambia: ‹Ka na suɓira na wami, ne nitsohuliv̄a!›

³⁰ Ɓadi ule kakuɓali; andre amutria shiv̄ani, mupaka aliv̄i deni yahe.

³¹ Wanyahe uona yawo zahidjiri v̄ale, waremwa na hamu ha kusudi, ata wandre wamuambia murumisa wawo piya trongo zav̄ira.

³² Ɓas, murumisa ahiri murumizi ule, amuambia: ‹Wawe murumizi wa peu! Tsika tsihuswamihi piya deni yaho iv̄o wanimia.

³³ Hali v̄av̄o kwakolazimu wav̄oreha wajau munyaho, mauri ɗe inamuna nahuv̄oreha?›

³⁴ Murumisa ule atukiwa ha kusudi, ata amuv̄eleha aãdhiɓiwe mupaka aliv̄e piya deni yahe.

³⁵ Iyo ɗe inamuna Ɓaɓangu alio mbinguni atsomufanyiaoni, neka kula moja hari mwanyu kasuswamihi munyahe ha umo warahara.»