MATIYO 15 - Ha`bari Ndjema ya I Maore

Misomo ya Insa yahusu zimila

¹ Ɓas, watru wa ishama ya dini ya Mafarisayo na Mafundi ya Sharia wamujilia Insa ulawa Yerusalemu, wamuambia:

² «Manatrini maswihaɓa yaho yatadio imila ya wadzaɗe watru? Mana wao kawatwaharisha yimihono wamondroɗya.»

³ Awadjiɓu: «Ẽhẽ wanyu, manatrini mutadio iãmuri ya Mungu ha uɗunga mila yanyu?

⁴ Mana Mungu arongoa: ‹Muhishimu ɓaɓaho na mayaho.› Tsena: ‹Mutru atsomuapizao ɓaɓahe au mayahe, atsolazimu aulawe.›

⁵ Ɓadi wanyu musurongoa: mutru amuambiao ɓaɓahe au mayahe: imali nitsoshindrao nihusaidiye nayo, tsiitamania Mungu,

⁶ v̄av̄o mususomedza amba tsi paka amuhishimu tsena ɓaɓahe au mayahe. Ha izo, wanyu ulatsa urongozi wa Mungu ha siɓaɓu ya mila yanyu.

⁷ Wanyu wanafiki! Mutrume Izaya akana haki wakati akojudza ju lanyu urongozi unu ashukidziwawo:

⁸ ‹Umati unu unihishimu ha malomo, ɓadi roho yawo ya mbali na wami.

⁹ Uniãɓudu yawo kaina faida, iv̄o yimisomo wayitoao ãmuri za shiuɓinadamu.› »

Misomo yahusu zinagisio mwanadamu

¹⁰ Amwesa Insa ahiri idunia, aiambia: «Namuvulishiye, tsena muelewe:

¹¹ Shitru inagisio mwanadamu, tsi ɗe ile ingiao hanyoni, ɓadi ɗe ilawao hanyoni.»

¹² Ɓas, maswihaɓa yahe yamujilia, yamuambia: «Saɓu ujua amba watru wa ishama ya Mafarisayo watukiwa rohoni iv̄o wakia urongozi waho ule?»

¹³ Adjiɓu: «Kula shimea kayataɓulwa na Ɓaɓangu alio mbinguni, itsorurumulwa.

¹⁴ Namuwalishe tu! Wao wafa-matso wav̄ingao wafa-matso. Na neka mufa-matso asuv̄inga mufa-matso, watsopuliha wao waili moni na ngama.»

¹⁵ Monye amuambia: «Rieledze mufano ule.»

¹⁶ Insa arongoa: «Wanyu wajau ne raha kamusuelewa?

¹⁷ Kamusuelewa amba kula ingiao hanyoni, ushuka moni na imimba, amwesa yendre ilawa?

¹⁸ Ɓadi iyo ilawao hanyoni, ula rohoni, na iyo ɗe inagisio mutru.

¹⁹ Mana rohoni ɗe v̄ulawao fikira za peu, za uula, za uzindzi, za shahawa za peu, za uwidzi, ushahidi wa trambo, na ushirikina,

²⁰ izo ɗe zinagisio mwanadamu; ɓadi mutru uɗya wala katwaharisha yimihono, iyo kainagisi mutru.»

Uaminifu wa mutrumama Mukanaani

²¹ Amwesa Insa alawa v̄ale, andre hari mwa liɓavu la Tiro na Sidoni.

²² Na v̄ale v̄wa mutrumama Mukanaani alawa mukaɓala ule, aja ha ushelemedza: «Mutukufu, Mwana wa Daudu, niv̄orehe! Mwana mutrumushe wangu asikwa ha kusudi na shetwani.»

²³ Ɓadi Insa kamudjiɓu ata shitru. Sa ile maswihaɓa yahe yaja yamumia: «Fundi, muambiye andre dzahe, mana asuriɗunga na ulatsa keme!»

²⁴ Adjiɓu: «Tsav̄elehwa ha watru wangina neka tsi ɗe ha wa umuraɓa wa Israila, wapotea mauri maɓariɓari.»

²⁵ Ɓadi mutrumama ule aja avundzu malondro mbeli zahe, amuambia: «Mutukufu, nisaidi.»

²⁶ Insa amudjiɓu: «Tsi ndjema mutru urenga shahula ya wanatsa, aiv̄e mbwa.»

²⁷ Sa ile mutrumama ule amuambia: «Kweli Mutukufu, ɓadi mbwa uɗya kenye zipuliao v̄otsi ulawa mezaju ha wanyewezo.»

²⁸ Ɓas Insa amuambia: «Mama, uaminifu waho muhodari! V̄av̄o naike mauri ɗe inamuna utsahao.» Sa na isa ile kamwe mwana mutrumushe wahe ule av̄ono.

Insa asuzihira wawaɗe wengi

²⁹ Insa alawa v̄ale, av̄iri wangoni na iƁahari ya Galilaya|Ɓahari ya Galilaya, ahea uju na mulima, aketsi.

³⁰ Ɓas, dunia ya watru imujilia v̄ale v̄umoja na magoɓo, wafa-matso, wendza zifeli, maɓuɓu, na wawaɗe wengi wangina; walishwa mindruni ha Insa, awazihira.

³¹ V̄ale idunia yakoshanga halisi iv̄o wakoona amba maɓuɓu yakolagua, wendza zifeli wakopara unono, magoɓo yakorengelea uendra, na wafa-matso wakoona. Ha izo, wakomutukuza Mungu wa Israila.

Insa asulisa watru wazidi alifu nne

³² Amwesa Insa ahiri maswihaɓa yahe, awaambia: «Nisuv̄oreha watru wanu, mana ina suku traru rangu walio v̄anu na wami, ne kawana shitru ya uɗya. Tsisutsaha nawalisha warudi na ndza, ha uria wasuje wavuliha ndziani.»

³³ Maswihaɓa yale yamuambia: «Padzaju v̄anu rilio, hav̄i ɗe ritsoparao shahula ya ukurisa dunia ɓole mauri ɗe ini?»

³⁴ Ɓas, Insa awadzisa: «Madipe mangav̄i ɗe mulio nayo?» Wadjiɓu: «Saɓa, na wana fi.»

³⁵ Sa ile aambia idunia ile iketsi v̄otsi.

³⁶ Amwesa arenge madipe saɓa yale na zifi, amuhimidia Mungu, ayakutrua, ayav̄a maswihaɓa yahe waãnisiye idunia.

³⁷ Piyawo waɗyi ata wakura, amwesa wav̄ingi mahanga saɓa yajadzwa na magudru yaka yaɓaki.

³⁸ Watru wakoɗya v̄ale waka wapara alifu nne, ɓila uhisaɓu watruwashe na uwanatsa.

³⁹ Amwesa ɓaanda av̄eleha watru malagoni hawo, Insa apashia lidjahazi, andre hari mwa umukaɓala wa Magadani.