MATIYO 14 - Ha`bari Ndjema ya I Maore

Wafati wa Yahaya Muɓaĩshizi

¹ Wakati uwo, Hirudu djukuma wa iGalilaya, akia haɓari zamuhusu Insa,

² ɓas aambia watru wahe: «Uwo ɗe Yahaya Muɓaĩshizi. Aregezewa hayi ulawa ha uwafu, iyo ɗe imana afanyao midjuza.»

³ Hirudu aka aãmurisha amba Yahaya aziwe, afungwe, amwesa atrilwe shiv̄ani ha siɓaɓu ya Hirudiyati, mutrumushe wa mwananyahe Filiɓusa,

⁴ mana Yahaya aka amurudi na itrongo ya waye urenga mutrumushe wa mwananyahe mutruɓaɓa ule.

⁵ Hirudu akotsaha amuule, ɓadi akoria idunia, mana yakomurenga Yahaya amba mutrume.

⁶ Ɓadi isuku ya unahanizi wa mudzalio wa Hirudu, mwana mutrumushe wa Hirudiyati akozina mbeli za wadjeni waka v̄ale, amujiv̄ia Hirudu,

⁷ ata amulav̄ia amba atsomuv̄a yotsi atsoitsahao.

⁸ Ha uɗunga masariɓu ya mayahe, amuambia: «Niv̄e v̄anu ishitswa ya Yahaya Muɓaĩshizi hari mwa shiya.»

⁹ V̄ale mufalume aremwa na huzuni, ɓadi ha siɓaɓu ya mulav̄io wahe mbeli za wadjeni wale, aãmurisha av̄olweyo.

¹⁰ Ɓas, av̄eleha mutru amupuwe Yahaya ishitswa shiv̄ani.

¹¹ Shitswa yahe iv̄ingwa hari mwa shiya, iv̄olwa mwana mutrumushe ule, amuv̄ingiayo mayahe.

¹² Ɓas, maswihaɓa ya Yahaya yaja, yarenge imaiti, wandre waidzihi, amwesa wandre wamuambiazo Insa.

Insa asulisa dunia ya watru yazidi alifu tsano

¹³ Ukia yahe haɓari ile, Insa alawa v̄ale ha djahazi, adzivuru mukaɓala watengeha. Ɓadi idunia uijua yayo, walawa malagoni, wamuɗungu ha mindru.

¹⁴ Wakati Insa ashuka djahazini v̄ale ata aona idunia ile, aremwa na poreho nayo, amwesa azihira wawaɗe wawo.

¹⁵ Mahariɓi yamozinga, yamaswihaɓa yaja yamupara, yamuambia: «Mukaɓala unu padza, na wakati wendre. Ambia watru wandre malagoni, wadzitsashiye zahula.»

¹⁶ Insa awadjiɓu: «Ata tsi paka wandre dzawo; namuwav̄e wanyu zahula waɗye.»

¹⁷ Ɓadi wamuambia: «Karisina v̄anu neka tsi madipe matsano na fi mbili.»

¹⁸ Insa awaambia: «Namuniv̄ingiyezo.»

¹⁹ Ɓas, aambia watru wale waketsi kunuju v̄ale, arenge yamadipe matsano na fi mbili zile, adzua yamatso mbinguni, azisopelea; amwesa akutrua yamadipe, av̄awo yamaswihaɓa waanyisiye piya idunia ile.

²⁰ Piyawo waɗyi, ata wakura. Magudru yaka yaɓaki yaangulidziwa, ata wajadza mahanga kumi na maili.

²¹ Watru wakoɗya v̄ale waka mukaɓala wa alifu tsano, ɓila uhisaɓu watrumama na wanatsa.

Insa asendra hari mwa maji

²² Ɓaanda ya v̄ale kamwe, Insa aãmurisha yamaswihaɓa yapashiye lidjahazi, wamukiliye mbeli washiye lidzia, na waye av̄elehe idunia malagoni hawo.

²³ Amohisa uwav̄eleha, ahea mulimani weke ile afanye mamilio. Ata uku wamongia, aka v̄ale raha, weke.

²⁴ V̄ale lidjahazi lika liɓaushia ishiv̄andre ya tsi pandza dzengi; lakoremwa na maluja, mana ipev̄o ika kinyume.

²⁵ Kariɓu na alifadjiri, Insa andre awapara ha ugaɗa hari mwa yamaji.

²⁶ Wakati maswihaɓa yamuona amba asendra hari mwa yamaji, washanga, ata wakorongoa: «Ule mufu!» Na ha zifaza zawo, wakolatsa keme.

²⁷ Ɓadi v̄ale kamwe Insa awaambia: «Namutruliye! Unu ɗe wami, musuriye!»

²⁸ Ɓas Monye amuambia: «Raɓi, neka kweli ɗe wawe, ãmurisha nije nihupare ha uendra hari mwa yamaji.»

²⁹ Insa amuambia: «Ko ɓasi!» Sa ile Monye alawa djahazini v̄ale, andre ha ugaɗa yamaji amupare Insa.

³⁰ Ɓadi uona yahe amba ipev̄o ikana nguvu, angia faza. Na ɓaanda akoandrisa urora, alatsa keme ha urongoa: «Raɓi, nidiriki!»

³¹ Sa ile kamwe Insa av̄eleha umuhono amusiki, amwesa amuambia: «He wawe mwendza uaminifu mushashi. Manatrini wangia taradudu?»

³² Na sa wangia moni na lidjahazi, pev̄o ilala.

³³ Wale waka moni na lidjahazi wamunyamisia na urongoa: «Kweli, wawe ɗe uMwana wa Mungu.»

Insa asuzihira wawaɗe mukaɓala wa Djanisarata

³⁴ Ɓaanda wavuka lidzia, wapahua hari mwa liɓavu la Djanisarata|Dzia la Maji la Djanisarata.

³⁵ Watru wa mura ule umujua yawo Insa, wav̄eleha haɓari hari mwa piya mikaɓala yile; ɓas, av̄ingiwa piya wawaɗe.

³⁶ Wamumia ruhusa waɓambe ɗe itsa ya nguo yahe tu ɓasi; na piya wao waiɓamba, wav̄ono.