MATIYO 12 - Ha`bari Ndjema ya I Maore

Misomo yahusu iSuku ya Uv̄umuzi

¹ V̄uka Suku ya Uv̄umuzi, Insa akov̄ira hari mwa mundra wa murama-mutsa. Maswihaɓa yahe wakana ndza, waandrisa ushelua make na uv̄uhura.

² Watru wa ishama ya Mafarisayo uona yawo trongo zile, wamuambia Insa: «Ngalia! Maswihaɓa yaho yasufanya trongo kayaruhusiwa ifanyiwe Suku ya Uv̄umuzi!»

³ Insa awadjiɓu: «Kamwasoma itrongo Daudu aifanya wakati aka asikwa na ndza, waye na uwatru wahe?

⁴ Iv̄o angia moni na iNyumba ya Mungu, aɗya yamadipe maraharifu yaka yatamaniwa Mungu, ata ha iv̄o kayaka yaruhusiwa waye uyaɗya, wala wale waka na waye; yaka yaruhusiwa Matolezi-Masadaka|Mutolezi-Masadaka ɓas.

⁵ Na tsena, hali kamwasoma moni na iSharia amba Suku za Uv̄umuzi, yaMatolezi-Masadaka utadi iSharia ya iSuku ya Uv̄umuzi ha ufanya hazi zawo moni na iNyumba Ndzitwaharifu, wala wao kawakoso?

⁶ Ɓadi wami nisumujudzani amba v̄anu v̄wa trongo ɓole rahana iNyumba Ndzitwaharifu.

⁷ Na djeli mwakoelewa imana ya urongozi unu: ‹Nisutsaha urehema, ɓadi tsi sadaka›, ɓasi kamwatsolaumu watru kawasina kosa.

⁸ Mana uMwana wa Mwanadamu ɗe Monyewe iSuku ya Uv̄umuzi.»

Insa asuzihira mutru afa umuhono

⁹ Insa alawa v̄ale, angia moni na iNyumba ya Uswali yawo.

¹⁰ Na hule v̄uka mutru afa umuhono. Watru waka v̄ale ɓaanda wakotsaha shisa ya umushitaki Insa, wamudzisa: «Hali iSharia yatru, iruhusu mutru uzihira iSuku ya Uv̄umuzi?»

¹¹ Awadjiɓu: «Mbani hari mwanyu amokana ɓariɓari moja lapuliha sisimani Suku ya Uv̄umuzi, katsendra alitoa?

¹² Mara ngav̄i zaidi mwanadamu aliona kima rahana ɓariɓari! Ɓasi iruhusiwa mutru ufanya ndjema Suku ya Uv̄umuzi.»

¹³ Ɓas, aambia mutru ule: «Ondzoa muhono waho.» Auondzoa, na uwo uregea munono mauri ɗe umoja.

¹⁴ Ɓasi watru wa ishama ya Mafarisayo waka v̄ale walawa, wakwendra wapange namuna ya umuangamidza Insa.

Murumishi atsahuliwa na Mungu

¹⁵ Insa ujua yahe trongo ile, alawa v̄ale. Watru wengi wamuɗungu, na waye azihira piya wawaɗe.

¹⁶ Ɓadi awafahamisha wasumujudze ha watru.

¹⁷ Izo zija ile zini zaka zarongolwa na mutrume Izaya zitsimidzihe:

¹⁸ «Tsunu murumishi wangu namutsahua, muv̄endzewa wangu, uwo umo wangu wajiv̄iwa na waye. Nitsohetsi Roho yangu ju lahe, na waye atsojudza ihaki ha zinishani.

¹⁹ Katsoshindrana ɓila ushelemedza, wala mutru katsokia ji lahe mav̄areni.

²⁰ Katsovundza sandze langia ndrwa, wala katsozima pwendzi lilawao mwesi, ata mupaka av̄e ushindzi ihaki.

²¹ Na zinishani zitsohetsi tama yazo hari mwa lidzina lahe.»

Insa asulinganisiwa na Ɓelzeɓuli

²² Amwesa Insa av̄ingiwa mutru shetwani yaka yamufanya mufa-matso, ɓuɓu. Na waye amuzihira ata ɓuɓu lile lilagua, tsena lakoona.

²³ Ɓas, piya idunia yaka v̄ale iremwa na ushangavu, ata yakorongoa: «Afa ule tsi ɗe uMwana wa Daudu|Mwana wa Daudu mwa?»

²⁴ Wakati watru wa ishama ya Mafarisayo wakia trongo ile, warongoa: «Mutru unu asuĩdzia mazetwani ha ushindzi wa Ɓelzeɓuli, umuɓole wa yamazetwani.»

²⁵ Insa iv̄o akojua fikira zawo, awaambia: «Kula ufalume uliona mufaraka moni hawo, uangamidziha. Na kula ɗago au muraɓa ufarikishanao, kaushindri uẽshi.

²⁶ Neka Shetwani asuĩdzia Shetwani, v̄av̄o asendra kinyume na iwaye yahe. Ɓasi namuna jeje ufalume wahe utsoshindrao uẽshi?

²⁷ Na neka wami nisuĩdzia mazetwani ha ushindzi wa Ɓelzeɓuli, watru wanyu uyaĩdzia ha ushindzi wa mbani? Iyo ɗe imana wao ha wao ɗe watsokao wanamuzi wanyu.

²⁸ Ɓadi neka ha ushindzi wa iRoho ya Mungu ɗe niĩdziao mazetwani, v̄av̄o Utawalizi wa Mungu umujiliani.

²⁹ Au ha namuna jeje mutru ashindrao angiye moni na nyumba ya mutru mwendza nguvu, amuhiɓiye mali zahe, neka kafunga mwendza nguvu ule raɓuzi? V̄av̄o ɗe atsorav̄ao inyumba yahe.

³⁰ Mutru kasi na wami, uwo a kinyume na wami, na mutru kasutsanganisa v̄umoja na wami, uwo asutsapua.

³¹ Iyo ɗe imana nimuambiaoni, kula dhambi na kula kufuru itsoswamihiwa wanadamu. Ɓadi ikufuru kinyume na iRoho Ndzitwaharifu, kaitsoswamihiwa ata hata.

³² Na mutru yotsi atsolaguao kinyume na uMwana wa Mwanadamu|Mwana wa Mwanadamu, uwo atsoswamihiwa; ɓadi yotsi atsolaguao kinyume na iRoho Ndzitwaharifu, uwo katsoswamihiwa, tsi hari mwa dunia lini, wala lilo lijao.»

Muri ujulihana ha mbia zahe

³³ «Muri ukuɓalishiha amba mwema neka mbia zawo za ndjema, ɓadi movu neka mbia zawo za mbovu. Mana muri ujulihana ha zimbia zawo.

³⁴ Wanyu kaɓila za nyoha za peu! Ha namuna jeje mutsoshindrao murongowe trongo ndjema, waovu namuna mulio? Mana ɗe ha uwengi ulio rohoni, ɗe hanyo ilaguao.

³⁵ Mutru mwema utoa ndjema hari mwa idafine ndjema rohoni hahe, na mutru muyi utoa mbovu hari mwa idafine mbovu rohoni hahe.

³⁶ Ɓasi nisumuambiani, iSuku ya hukuma, wanadamu watsolazimu wadzieledze na kula urongozi kawalazimu ulio amba waurongoa.

³⁷ Mana ha marongozi yaho ɗe utsonamulwao na haki, tsena ha marongozi yaho ɗe utsonamulwao na kosa.»

Mafarisayo watsaha waone ãlama ya midjuza

³⁸ Ɓaanda ya v̄av̄o ɓaãdhwi ya Mafundi ya Sharia na ya watru wa ishama ya Mafarisayo wamuambia Insa: «Fundi, ratsov̄endza rihuone ufanye ãlama ya midjuza.»

³⁹ Awadjiɓu: «Dunia ɓovu la leo lini kalina uaminifu lisudayi ãlama ya midjuza, ɓadi kalitsoonesewa ãlama yangina neka tsi ɗe ya mutrume Yunusa ile.

⁴⁰ Mana mauri ɗe inamuna Yunusa aɓaki moni na mimba ya fi muda wa suku traru, mauku na yimitsana, ɗe inamuna uMwana wa Mwanadamu atsokao wajau moni na ishiv̄andre ya tsi muda wa suku traru, mauku na yimitsana.

⁴¹ Watru wa Niniva watsohima isuku ya hukuma, washitaki watru wa lidunia la leo lini, mana wao wandre toɓa wakati wakia maĩdhwa ya Yunusa. Na v̄anu v̄wa ɓole rahana Yunusa!

⁴² iSuku ya hukuma, umufalume mutrumushe wa swihilini atsohima na watru wa lidunia la leo lini, amwesa atsowasika na kosa, mana waye alawa rangu mwiso wa lidunia aje avulishiye ihikima ya Sulaimana. Na v̄anu v̄wa ɓole rahana Sulaimana!»

Muregeo wa djini ɓovu

⁴³ «Djini ɓovu lamolawia mutru, lilo uv̄ira hari mwa mikaɓala mihavu ha uzunguha v̄ahanu v̄wa uv̄umuzi, ɓadi kaliv̄upara.

⁴⁴ Ɓas, lilo urongoa: ‹Nisuregea nyumbani hangu hule nalawa.› Ata lamowaswili, lilo uipara amba ya wanga-wanga, ihundzwa, tsena irengeledzewa ha uzuri.

⁴⁵ Ɓas, lilo ulawa, lendre lirenge madjini saɓa yangina, maovu rahana wilo. Yao ungia hahe v̄ale, yafanya makazi, ha namuna amba hali ya mutru ule, mwisoni uzidi mbovu rahana mara ya handra. Ɓasi itsoka ɗe inamuna iyo wajau ha lidunia ɓovu la leo lini.»

Wadjamazahe wa Insa ɗe wav̄i?

⁴⁶ Wakati Insa raha akolagua na idunia ile, mayahe na wananyahe wawaswili v̄ondze hule, wakotsaha walaguwe na waye.

⁴⁷ Ɓas, v̄wa mutru v̄ale amuambia: «Mayaho na wananyaho wa v̄ondze oho, wasutsaha walaguwe na wawe.»

⁴⁸ Insa adjiɓu ule amuambia: «Mayangu ɗe uv̄i, na wananyangu ɗe wav̄i?»

⁴⁹ Amwesa av̄eleha muhono wahe ha maswihaɓa yahe, arongoa: «Mayangu tsunu, na wananyangu tsawanu.

⁵⁰ Mana mutru yotsi afanyao yamav̄endzeleo ya Ɓaɓangu alio mbinguni, uwo ɗe mwananyangu mutruɓaɓa, mwananyangu mutrumama, tsena mayangu.»