MATIYO 10 - Ha`bari Ndjema ya I Maore

Mutsahulio wa Mav̄ingizi-Risala kumi na maili

¹ Amwesa Insa ahiri maswihaɓa kumi na maili yahe, awav̄a yezi ya uĩdzia madjini na uzihira kula uwaɗe na zifeli za kula namuna.

² Tsayanu madzina ya Mav̄ingizi-Risala kumi na maili yahe: wa handra Simoni ahiriwao Monye, na mwananyahe Andreasa; Yakoɓu mwana wa Zuɓudu, na mwananyahe Yuhani;

³ Filiɓusa na Ɓartolomayo; Tomasi na Matiyo, umuliv̄isa-latete|muliv̄isa-latete; Yakoɓu mwana wa Halifa, na Tadu;

⁴ Simoni Mukanaani na Yudasi Iskarioti, ule atsomuv̄iriao nyuma Insa.

Insa asuv̄eleha yaMav̄ingizi-Risala kumi na maili yajudze iHaɓari Ndjema

⁵ Wanu ɗe kumi na waili Insa awav̄eleha ɓaanda awav̄a ãmuri zini: «Musendre ha watru wa nishani zangina, wala musungiye hari mwa ɗago la Masamariya.

⁶ Ha kinyume, namwendre ha yamaɓariɓari yapotea hari mwa uumati wa Israila.

⁷ Ndziani mutsokao, namujudze zini: ‹Utawalizi wa Monyewe ziMbingu ukuruɓia!›

⁸ Namuv̄onese wawaɗe, namuregeze hayi uwafu, mutwaharishe waenefu, muĩdziye mazetwani. Mupara ɓure-ɓure, namuv̄e ɓure-ɓure.

⁹ Musuv̄inge mali itsokao yotsi moni na yimizeti ya marike yanyu, tsi dhahaɓu, tsi fedha, wala shaɓa.

¹⁰ Hari mwa umusafara wanyu, musuv̄inge mukoɓa, wala nguo ya ugaudza, wala kaɓwa, wala ɓankora. Mana mufanyizi-hazi ustahiki shahula yahe.

¹¹ Ɗago lotsi mutsowaswilio, neka ɓole au titi, namutsahe mutru aliona sifa ndzuzuri tayari ya umurengani, muɓaki hahe v̄ale ata isuku mutsolawao.

¹² Mwamongia ɗagoni hahe, namumuv̄e salamu.

¹³ Neka muraɓa ule v̄ale ulistahiki, v̄av̄o salamu lanyu naliwaendreleye; ɓadi neka kawalistahiki, salamu lanyu nalimuregeyeni.

¹⁴ Neka hari mwa nyumba au ɗago kamwarengwa au kamwavulishiwa, namulawe v̄ale, tsena muv̄aruse djifu la yimindru yanyu.

¹⁵ Nisumuambiani ha kweli, isuku ya hukuma, ihukuma ya malago ya Suduma na Gomora itsostahamilishiha rahana ya liɗago lile.»

Misomo ya Insa yahusu matreso yajao

¹⁶ «Namujuwe, nisumuv̄elehani mauri maɓariɓari hari-hari na mbwa nyeha. Ha izo, namuke wendza ãkili mauri ɗe zinyoha, tsena muke warembwavu mauri zukuru.

¹⁷ Namudzifahamishe na wanadamu, mana watsomuv̄elehani mbeli za mahakama, na umuv̄ondrani moni na ziNyumba za Uswali zawo.

¹⁸ Mutsov̄ingwa mbeli za mawakala na wafalume ha siɓaɓu ya wami, pare mulawe ushahidi mbeli zawo, na mbeli za wale kawamuji Mungu.

¹⁹ Ɓadi mwamov̄elehwa, mwasudzitriye hamu na izo mutsorongoao, wala na inamuna mutsolaguao, mana izo zalazimu muzirongowe, mutsov̄olwazo isa iyo kamwe.

²⁰ Mana wanyu tsi ɗe mutsolaguao, ɓadi iRoho ya Ɓaɓanyu ɗe itsolaguao ha ndzia yanyu.

²¹ Mwananya atsomuv̄eleha mwananyahe aulawe, na ɓaɓa umwana wahe; wana watsohima kinyume na wadzaɗe wawo, wawatsongeshe waulawe.

²² Mutsoengwa na watru piya ha siɓaɓu ya lidzina langu. Ɓadi uwo atsostahamilio ata mwisoni, atsohuyiwa.

²³ Mwamotreswa hari mwa ɗago, namutrale hari mwa langina. Nisumuambiani ha kweli, kamutsomalidza uv̄ira yamalago ya Israila, kaɓula ya uMwana wa Mwanadamu uja.

²⁴ Mwanashoni kaka muhu rahana fundi wahe, wala murumizi rahana murumisa wahe.

²⁵ Iyo utosha mwanashoni uka sawa na fundi wahe, na murumizi sawa na murumisa wahe. Neka watru wahiri shitswa wa umuraɓa ‹Ɓilizaɓula›, ha mara ngav̄i zaidi watsohirao namuna ile watru wa umuraɓa wahe!»

Mbani ɗe astahiki ariwe?

²⁶ «Ɓasi musuwariye. Kav̄usi yadzama ilio amba kaitsov̄enuha, wala ya siri kaitsojulihana.

²⁷ Izo nimuambiaoni shidzani, namuzirongowe mutsana-hari, na izo mwavongonewazo makioni, namuzitrangaze utroju.

²⁸ Musuriye wao waulao mwili, wala kawashindri uula roho. Mutru alazimu mumuriye, ɗe uwo ashindrao aangamidze iroho na umwili moni na umoro wa Djahanama.

²⁹ Hali maveru maili kayaudziwa ha roɓo moja? Ne kav̄u ata moja hari mwao lipulihao v̄otsi ɓila Ɓaɓanyu ukuɓali.

³⁰ Na wanyu, ata nyole zilio shitswani hanyu, ne zihasiɓiwa piyazo.

³¹ Ɓasi musuriye; wanyu muna kima zaidi rahana maveru mengi.»

Uwo amukuɓalio Insa-Kristi, na uwo amuharao

³² «Ha izo, yotsi anikuɓalio mbeli za wanadamu, nitsomukuɓali wami wajau mbeli za Ɓaɓangu alio mbinguni.

³³ Ɓadi yotsi aniharao mbeli za wanadamu, nitsomuhara wami wajau mbeli za Ɓaɓangu alio mbinguni.»

Insa kaja na usalama, ɓadi mufaraka

³⁴ «Musufikiri amba tsija nitriye usalama shiv̄andreju mwa tsi. Tsaja nitriye usalama, ɓadi upanga.

³⁵ Mana tsija nitriye ‹mufaraka ɓaina ya mutru na ɓaɓahe, ɓaina ya mwana mutrumushe na mayahe, na ɓaina ya mutrumushe na nyadzahe.

³⁶ Maãduwi ya mutru watsoka ɗe wale walio muraɓani hahe.›

³⁷ Uwo amuv̄endzao ɓaɓahe au mayahe rahana wami, kanistahiki; na uwo av̄endzao umwana wahe mutruɓaɓa au mutrumama rahana wami, kanistahiki.

³⁸ Mutru kadzitrihisa umuri wa pawa wahe aniɗunga, kanistahiki.

³⁹ Mutru atsotsahao avukise nafusi yahe, itsomulatsishia; ɓadi uwo atsolatsishiwao na inafusi yahe ha siɓaɓu ya wami, atsoivukisa.»

Uwo akariɓisao mutru wa Insa, asumukariɓisa ɗe Insa

⁴⁰ «Monyewe umukariɓisani, asunikariɓisa ɗe wami; na uwo anikariɓisao, asukariɓisa Ule aniv̄eleha.

⁴¹ Monyewe ukariɓisa mutrume ha siɓaɓu amba ule mutrume, atsopara thawaɓu sawa na mutrume. Na monyewe ukariɓisa mutru mutuĩvu ha siɓaɓu amba waye mutuĩvu, atsopara thawaɓu sawa na mutru mutuĩvu.

⁴² Mutru yotsi atsov̄ao wala ukana kapoka ya maji ya rutuɓa moja hari mwa watiti wao, ha siɓaɓu amba waye swihaɓa langu, nisumuambiani ha kweli, ha yakini katsolatsishiwa na thawaɓu yahe.»