MATIYO 1 - Ha`bari Ndjema ya I Maore

iNasaɓa ya Insa

¹ Tsini ishikandre yav̄inga madzina ya wadzaɗe wa Insa-Kristi, shilembwe ya Daudu, alio amba shilembwe ya Iɓrahima.

² Iɓrahima amudza Isiaka, Isiaka amudza Yaãkuɓu, na Yaãkuɓu amudza Yuda v̄umoja na wananyahe.

³ Yuda amudza Farisi na Ziru, na mayawo aka ɗe Thamarati; Farisi amudza Hesiruna, na Hesiruna amudza Arami.

⁴ Arami amudza Aminadaɓu, Aminadaɓu amudza Nashuni, na Nashuni amudza Salmuna.

⁵ Salmuna amudza Ɓoazi, alio amba mayahe aka ɗe Rahaɓu; Ɓoazi amudza Oɓaidu, alio amba mayahe aka ɗe Rudhwati; Oɓaidu amudza Yesi.

⁶ Na Yesi waye, amudza Mufalume Daudu. Daudu amudza Sulaimana, na mayahe aka ɗe mutrumushe wa Uri.

⁷ Sulaimana amudza Riɓoamu, Riɓoamu amudza Aɓiya, na Aɓiya amudza Asaf.

⁸ Asaf amudza Yehushafat, Yehushafat amudza Yoramu, na Yoramu amudza Uzayasa.

⁹ Uzayasa amudza Yothamu, Yothamu amudza Ahazi, na Ahazi amudza Hezekias.

¹⁰ Hezekias amudza Manasi, Manasi amudza Amonu, na Amonu amudza Yosias.

¹¹ Yosias amudza Yakuniya na wananyahe. Uwo ɗe uwakati Maisraila warengwa matreka, wav̄ingwa Ɓaɓiluna.

¹² Na ɓaanda wav̄ingwa matreka Ɓaɓiluna, Yakuniya amudza Shealtiyeli, na Shealtiyeli amudza Zuruɓaɓeli.

¹³ Zuruɓaɓeli amudza Aɓihudi, Aɓihudi amudza Eliakimu, na Eliakimu amudza Azori.

¹⁴ Azori amudza Sadoki, Sadoki amudza Hakimu, na Hakimu amudza Eliyudi.

¹⁵ Eliyudi amudza Eliyazari, Eliyazari amudza Matani, na Matani amudza Yaãkuɓu.

¹⁶ Yaãkuɓu amudza Yusufu, mume wahe wa Mariama, alio amba amudza Insa ahiriwao Kristi.

¹⁷ Ɓas, djimlani v̄uka wadzaɗe kumi na wanne rangu Iɓrahima ata upara ha Daudu, na wadzaɗe kumi na wanne rangu Daudu ata uwakati Maisraila warengwa matreka ha uv̄ingwa Ɓaɓiluna, iv̄o na wadzaɗe kumi na wanne rangu Ɓaɓiluna ata upara umudzalio wa Kristi.

Mudzalio wa Insa-Kristi

¹⁸ Tsini inamuna umudzalio wa Insa-Kristi waja. Mayahe Mariama aka arumidziwa na Yusufu. Ɓadi kaɓula ya wao ufungia, adzipara na hamili yaja ha ushindzi wa iRoho Ndzitwaharifu.

¹⁹ Mutsumba wahe Yusufu, iv̄o aka mutru mwendza imani, kakotsaha amupatsa aĩɓu ha hadhwira; aãzimu ulisha trumidzo lahe ha siri.

²⁰ Iv̄o akofikiri trongo ile, malayika ya Mola imujilia tsindzini, imuambia: «Yusufu, mwana wa Daudu, usuriye umurenga Mariama ake mushe waho, mana umwana amumira, aja ha ushindzi wa iRoho Ndzitwaharifu.

²¹ Atsodza mwana mutruɓaɓa, na wawe utsomuhira Insa, mana waye ɗe atsohuyio umati wahe na madhambi yawo.»

²² Piya zini zija ile itrongo ini yaka yarongolwa na Mola ha ndzia ya mutrume itsimidzihe:

²³ «Mutrumushe-mwanamutsa atsomira, atsodza mwana mutruɓaɓa atsohiriwao Emanueli.» Faswiri ya v̄av̄o: «Mungu a v̄umoja na wasi».

²⁴ Yusufu umaruha yahe v̄ale, afanya zile imalayika ya Mola yamuãmurisha, amurenge mutrumushe wahe wake v̄umoja.

²⁵ Ɓadi kalala na waye ata mupaka adza mwana mutruɓaɓa alio amba amuhiri dzina la Insa.