MAROMU 9 - Ha`bari Ndjema ya I Maore

Mungu ɗe Monyewe utsahua

¹ Hari mwa uv̄umoja wangu na Kristi, nisurongoa ikweli, tsisurongoa trambo, tsena inafusi yangu yav̄ingwa na iRoho Ndzitwaharifu isuishadidisa:

² amba v̄anu tsina huzuni ɓole na utungu kausukoma rohoni hangu.

³ Natsov̄endza wami yangu nilaãnishihe, niɓaushane na Kristi ha tanafu ya wananyangu, wao wa ikaɓila yangu uv̄andre wa shiuɓinadamu,

⁴ wao walio Maisraila, wafanyiha wana, waonesewa utukufu, wav̄olwa yimikataɓa, iSharia, iĩɓada, na zinguwahadi.

⁵ Wadzaɗe wawo ɗe wadzaɗe wa zamani wale, na uv̄andre wa shiuɓinadamu Kristi alawa hari mwa ikaɓila yawo, waye Monyewe uju na zitrongo piya, Mungu naɓarikishihe daima. Amina.

⁶ Tsi amba urongozi wa Mungu kawafayi. Mana tsi piya wao wadzalwa na Israila walio Maisraila.

⁷ Wala tsi piya zilembwe za Iɓrahima ɗe walio wana, mana uMuangishio urongoa: «Ɗe ha Isiaka ɗe v̄utsolawao zilembwe zitsohiriwao zaho.»

⁸ Yaãni v̄av̄o, tsi ɗe uwana waja ha ndzia ya shiuɓinadamu walio wana wa Mungu, ɓadi uwana wa uwahadi ɗe walio hari mwa ihisaɓu ya zizilembwe.

⁹ Tsunu urongozi wa uwahadi: «Wakati mauri ɗe unu nitsorudi, na Sara atsokana mwana mutruɓaɓa.»

¹⁰ Wala tsi tu, ɓadi Reɓeka wajau alio amba amira wana mbiliju na mutru moja, ne ɗe Isiaka ɓaɓatru.

¹¹ Na kaɓula ya wana wahe udzalwa, raha kawafanya ndjema wala mbovu, ile pare umupango wahe uɓaki, ne ɗe uka amba waye ɗe atsahuao,

¹² wala tsi ha zitrendro, ɓadi ɗe ha Monyewe uhira, Reɓeka aambilwa: «uMuhu atsorumishia umutiti»,

¹³ mauri ɗe iheli yaangihwa: «Yaãkuɓu tsimuv̄endze, Ĩzu tsimuenge.»

¹⁴ Ɓasi v̄av̄o ritsorongoa trini? Amba Mungu tsi wa haki? Ata hata!

¹⁵ Mana amuambia Musa: «Nitsorehemu uwo nitsomurehemuo, niv̄orehe uwo nitsomuv̄orehaowo.»

¹⁶ Ha izo, kayaketsi ha yamav̄endzeleo ya mutru, au ha idjitihadi yahe, ɓadi ɗe ha Mungu Monyewe urehemu.

¹⁷ Mana uMuangishio umuambia Firiyauna: «Tsihuv̄a daradja ha kusudi, ile nionese haho ushindzi wangu na lidzina langu lijudziwe hari mwa ulemengu piya.»

¹⁸ Ha izo, waye urehemu uwo waye atsahao, na ukaidisha uwo waye atsahao.

iHadhaɓu na urehema wa Mungu

¹⁹ Mukinishiha amba v̄wa mutru atsonidzisao: «Ɓasi manatrini ata alaumuo tsena? Mbani ɗe atsoshindrao andre kinyume na mav̄endzeleo yahe?»

²⁰ Ɓasi hewe wawe shiumbe mwanadamu, wawe mbani ata usuɓutuo umukanyushe Mungu? Hali shitru yaparangwa itsomudzisa muparangizi wayo amba: «Manatrini wanifanya namuna ini?»

²¹ Afa muparangizi kasina ruhusa hari mwa liɗongo ata ajua arenga ɗongo wilo-wilo, afanya shiya ya sheo na shiya ndziv̄ungufu?

²² Ɓasi neka Mungu utsaha yahe aonese hadhaɓu zahe na ujudza ushindzi wahe, astahamili ha suɓira ɓole ziya za hadhaɓu zatayarishiwa uangamifu?

²³ Au tsena, neka atsaha aonese utadjirifu wa utukufu wahe ha ziziya za urehema azitayarisha rangu kaɓula amba zike za utukufu?

²⁴ Wasi ra moni v̄av̄o wajau, wasi rilio amba arihiri, tsi tu amba hari mwa yaMayahudi, ɓadi tsena hari mwa zinishani zangina.

²⁵ Mauri ɗe inamuna airongoao moni na ishio ya mutrume Hozeya: «Uwo ulio amba kawaka umati wangu, nitsouhira umati wangu; na uwo kawaka muv̄endzewa, nitsouhira muv̄endzewa.»

²⁶ Na tsena: «V̄ahanu v̄ale wakoambilwa: ‹Wanyu tsi umati wangu›, ɗe v̄ahanu kamwe watsohiriwao: ‹Wana wa Mungu alio hayi.› »

²⁷ Na Izaya waye, ajudza zahusu Israila: «Ata neka amba ihisaɓu ya Israila ifanyiha mauri ɗe umutsanga wa iɓahari, ne washashi ɗe watsohuyiwao.

²⁸ Mana Mola atsotsimidza ha ukamilifu na ha upesi, ihukuma yahe shiv̄andreju mwa tsi.»

²⁹ Tsena mauri ɗe iheli Izaya aka airongoa rangu kaɓula: «Na djeli Mola Monyewe Ushindzi kaka arilisha rakana zilembwe, ratsorendreha mauri Suduma, rifanyihe mauri Gomora.»

Israila ilatsiha hari mwa muhakisho mbeli za Mungu

³⁰ Ɓasi v̄av̄o rirongowe jeje? Watru wa zinishani zangina kawakodzishahilisa na umuhakisho ha Mungu wapara muhakisho ha ndzia ya uaminifu,

³¹ wakati ulio amba Israila wakozunguha muhakisho ha ndzia ya sharia, ne kawaupara.

³² Manatrini? Mana wakouzunguha, tsi ulawana na uaminifu, ɓadi mauri wakoja ha ndzia ya zizitrendro. Wakwala hari mwa liɓwe likwalisao.

³³ Mauri ɗe iheli v̄uangihwa: «Tsini, nisuhetsi ɓwe *Siyuna, ɓwe la ukwalisa, tsena ɓwe-monye liusao; na uwo amuaminio, katsotolewa itama.»