MAROMU 8 - Ha`bari Ndjema ya I Maore

Maẽsha ya mutru av̄ingwao na iRoho Ndzitwaharifu

¹ Av̄asa ɓasi kav̄u tsena hukuma ha wao walio hari mwa uv̄umoja na Kristi-Insa|Kristi.

² Mana isharia ya iRoho iv̄ingao uhayati ha uv̄umoja na Kristi-Insa, inikomboa na isharia ya dhambi na ya ufa.

³ Mana trongo iSharia kakoishindra iv̄o hali ya shiuɓinadamu yakotoa ushindzi wayo, Mungu aifanya ha uv̄eleha uMwana wahe monyewe hari mwa mwili amba mutru amomuona, akoona mwili sawa na wa mwanadamu mwendza dhambi. Na uhusu dhambi, Mungu ahukumu lidhambi mwilini ha mwanadamu,

⁴ ile pare ihaki yatsahwa na iSharia itsimidzihe hatruju, wasi rilio amba karisuɗunga maendreleo ya hali ya shiuɓinadamu, ɓadi ya shi Roho.

⁵ Mana wao waẽshio ha uɗunga ihali ya shiuɓinadamu, ushahiliha na trongo za ihali ya shiuɓinadamu; ɓadi wao waẽshio ha uɗunga iRoho, ushahiliha na trongo za shi Roho.

⁶ Ushahilifu wa fikira za ihali ya shiuɓinadamu uv̄inga hari mwa ufa, ɓadi ushahilifu wa fikira za iRoho uv̄inga hari mwa uhayati na utrulivu wa roho.

⁷ Fikira za ihali ya shiuɓinadamu, izo uwana kinyume na za shi Mungu, mana monyewe ukanazo katuĩ iSharia ya Mungu, wala kashindri ata hata uituĩ.

⁸ Tsena, wao watawaliwa na ihali ya shiuɓinadamu kawashindri umujiv̄idza Mungu.

⁹ Yahusu wanyu, wanyu kamusi utsini na utawalifu wa ihali ya shiuɓinadamu, ɓadi utsini na wa iRoho, neka anga amba iRoho ya Mungu isuẽshi moni hanyu. Na neka mutru kasina iRoho ya Kristi, v̄av̄o kasi wahe.

¹⁰ Ɓadi neka amba Kristi a moni hanyu, v̄av̄o kweli amba umwili ufu ha siɓaɓu ya dhambi, ɓadi iRoho ɗe uhayati ha siɓaɓu ya umuhakisho.

¹¹ Na neka iRoho ya Ule amuregeza Insa hayi ulawa ha uwafu isuẽshi moni hanyu, v̄av̄o waye-waye amuregeza hayi Kristi-Insa ulawa ha uwafu, atsoẽshisa wajau yimili mufa yanyu, ha ndzia ya iRoho yahe iẽshio moni hanyu.

¹² Ɓasi ha izo wananyangu, rina deni, ɓadi tsi ɗe mbeli za ihali ya shiuɓinadamu ata ralazimu riẽshi ha uɗunga ihali ya shiuɓinadamu.

¹³ Mana neka musuẽshi ha uɗunga ihali ya shiuɓinadamu, mutsofa; ɓadi neka ha iRoho musuula zitaɓia za mwili, v̄av̄o ɓasi mutsoẽshi,

¹⁴ ha iv̄o ilio amba piya wao wav̄ingwao na iRoho ya Mungu, wa wana wa Mungu.

¹⁵ Na Roho iyo mwav̄olwayo tsi ya umufanyani warumwa amba irudise hari mwa trisidzo; ɓadi muv̄olwa Roho imufanyaoni wana, na ha wiyo, risuhira: «Aɓɓa, Ɓaɓa!»

¹⁶ iRoho wiyo-wiyo isutolea ushahidi iroho yatru amba wasi wana wa Mungu.

¹⁷ Na ha iv̄o rilio wana, ra wajau hari mwa umwaratha: warithishiwa wa Mungu, tsena hari mwa ushirika wa mwaratha v̄umoja na Kristi, neka kweli risuondesheha v̄umoja na waye, ile ritukuzihe wajau v̄umoja na waye.

Matreso ya leo kayafanishiha na utukufu ujao

¹⁸ Nisuona amba hali yotsi utsokao utungu wa wakati unu, kawastahiki ufanisiwa na utukufu utsov̄enuliwao hatruju.

¹⁹ Mana ziumbe piya zisulindra na hamu uwakati wa umuv̄enulio wa uwana wa Mungu.

²⁰ Kweli amba ziumbe piya zijeledzewa zifanyishihe shitru ndzipuzi, tsi amba ha uv̄endza yazo, ɓadi ɗe ha siɓaɓu ya Monyewe afanya itrongo, v̄umoja na itama amba

²¹ ziumbe zizo piya zitsotolwa hari mwa urumwa wa umenyefu, ile zirenge fuvu hari mwa unafasi mutukufu wa uwana wa Mungu.

²² Mana risujua amba ata ileo ini piya zaumbwa zisuulula, mauri za hari mwa utungu wa madzazi.

²³ Wala tsi wizo tu ɓasi, ɓadi wasi wajau riliona yamavuna ya handra ya iRoho, wasi wajau risuulula moni hatru, ha ulindra itrongo ya ufanyiha wana, ha ukombofu wa umwili watru.

²⁴ Mana ɗe ha tama ɗe rahuyiwa. Na tama ionehwanao, iyo tsi tama tsena. Hali shitru mutru aionao, iyo ukiri utamwa raha?

²⁵ Ɓadi neka risutama trongo karisuiona, v̄av̄o risuilindra v̄umoja na suɓira.

²⁶ Ɗe namuna iyo tsena iRoho uriv̄a musada hari mwa ushashi watru, mana wasi kariji yalazimu ritsahe hari mwa mamilio yatru, ɓadi iRoho wiyo-wiyo urimilia ha misisio-pumu yilio amba kav̄u marongozi yatsoshindrao yayieledze.

²⁷ Na Monyewe aonao zilio moni na umo asujua zinia za iRoho, mana ɗe ha uɗunga yamav̄endzeleo ya Mungu ɗe imiliao watwaharifu.

²⁸ Ha namuna yotsi wasi risujua amba trongo piya urendreha ha uwema wa wao wamuv̄endzao Mungu, wahiriwa ulingana na ikusudi yahe.

²⁹ Mana wao awajua rangu mwandro, awahetsi wajau rangu kaɓula walingane na umufano wa uMwana wahe, ile pare uMwana wahe ake ɗe zuki hari mwa wananya wengi.

³⁰ Na wao awahetsi rangu kaɓula, awahiri wajau; na wao awahira, awahakisha wajau; na wao awahakisha, awatukuza wajau.

Ha Insa-Kristi, ɗe Mungu aonesa uv̄endza yahe

³¹ Ɓasi v̄av̄o rirongowe trini yahusu trongo zizo? Neka Mungu a uv̄andre watru, mbani ɗe atsoshindrao ake kinyume na wasi?

³² Waye alio amba kamuɓalia uMwana wahe monyewe, ɓadi amutoa ha faida ya wasi piyasi, ɓasi ha namuna jeje katsoridjaãlia wajau piya v̄umoja na waye?

³³ Mbani ɗe atsosingidziao wao watsahuliwa na Mungu? Mungu waye ɗe ahakishao!

³⁴ Mbani ɗe atsowanamuao na kosa? Kristi-Insa ɗe afa, na zaidi ya iyo, aregezewa hayi, a humeni ha Mungu, na waye asurimilia.

³⁵ Mbani ɗe atsoritsapuao na uv̄endza wa Kristi? Hali itsoka ɗe taãɓu, au usongefu, au matreso, au ndza, au usikini, au hatwari, au upanga?

³⁶ Mauri ɗe iheli yaangihwa hari mwa uMuangishio: «Ha siɓaɓu ya wawe risukaɓili ufa isuku kamili; risufanyisiwa na maɓariɓari yandrao yatsindzwe.»

³⁷ Ɓadi hari mwa piya trongo zizo, risuzidi uka washindrifu ha uwo ariv̄endza.

³⁸ Mana tsiwafiku amba kav̄u ishindrao iritsapuwe na uv̄endza yahe: tsi ɗe ufa wala uhayi, tsi ɗe zimalayika wala ngushindzi zangina, tsi ɗe za leo wala za meso, tsi nguvu zitsokao yotsi,

³⁹ tsi za uju oho wala za uzimu, wala kav̄u shiumbe itsokao yotsi yangina itsoshindrao iritsapuwe na uv̄endza ya Mungu yav̄enuha ha Kristi-Insa, Raɓi watru.