MAROMU 3 - Ha`bari Ndjema ya I Maore

¹ Ɓasi ina tanafu trini ya uka Muyahudi, na utahiriwa|utahiri ina faida trini?

² Zina faida nyengi ha kula namuna. Raɓuzi imahususu moni v̄av̄o, ɗe iv̄o amba Mayahudi ɗe wadhwaminishiwa yamarongozi ya Mungu.

³ Kweli amba ɓaãdhwi mengoni mwawo kawaamini. Ɓasi iv̄o kawaamini, isurongoa amba Mungu tsi muaminifu?

⁴ Ata hata! Ɓadi Mungu nakuɓalishihe amba wa kweli, wala ukana kula mwanadamu munafiki, mauri ɗe iheli v̄waangihwa moni na uMuangishio: «Ile pare uhakishihe hari mwa marongozi yaho, tsena ushindre neka usunamulwa.»

⁵ Ɓadi neka zimbovu zatru zisuv̄enua uhaki wa Mungu, v̄av̄o rirongowe trini? Amba Mungu tsi wa haki neka asuriãdhiɓisha ha zihadhaɓu zahe? (V̄av̄o nisulagua shiunadamu.)

⁶ Ata hata! Na djeli ɗe namuna iyo, namuna jeje atsohukumuo ulemengu?

⁷ Ɓadi nahika ha unafiki wangu ukweli wa Mungu uzidi uv̄enuha ha utukufu wahe, manatrini ata wami nitsohukumulwao amba muãswifu?

⁸ Ɓasi v̄av̄o ritsojua rirongowe, mauri ɗe wasalia wanisingidziao, amba: «Narifanye mbovu ile pare v̄uje ndjema»? Watru wao wastahiki wahukumulwe.

Kav̄u alio amba arahara mbeli za Mungu

⁹ Ɓasi v̄av̄o trini? Hali v̄anu wasi Mayahudi ra uju mwa wanyatru? Ata hata! Mana madza tsionesa amba wanadamu piya, yaãni, Mayahudi na tsi Mayahudi, rishilidziwa piyasi na maãswi.

¹⁰ Mauri ɗe iheli v̄waangihwa moni mwa uMuangishio: «Kav̄usi arahara mbeli za Mungu, ata moja ne kav̄u;

¹¹ kav̄usi aelewao, wala kav̄u amutsahao Mungu.

¹² Piya walatsa indzia, piyawo wafanyishiha amba kawasina faida, kav̄u ata mutru afanyao ndjema, ata moja ne kav̄u.»

¹³ «Gandzi lawo la kaɓuri laɓuha; ha ulimi wawo wasudanganya.» «Malomoju hawo v̄wa sumu la nyoha.»

¹⁴ «Hanyo yawo ijaya madzapizo na uhali.»

¹⁵ «Wao uendra mbio ile watre damu;

¹⁶ ndziani hawo wav̄irao, uangamifu na djondo ɗe walishao,

¹⁷ na indzia ya amani, wao kawaiji.»

¹⁸ «Uria Mungu kaiv̄o mbeli za matso yawo.»

¹⁹ Ne risujua amba piya izo zarongolwa na iSharia, isuzirongoa ɗe ha wao walio hari mwa iSharia, ile pare v̄wasuke ata hanyo amba yashindra yadziv̄a haki, na ulemengu kamili uv̄enuhe na kosa mbeli za Mungu.

²⁰ Kweli amba kav̄u ata mutru atsohakishiao mbeli za Mungu ha zizitrendro zatsahwa na iSharia. Mana iSharia, iyo uonesa lidhambi ɓas.

Muhakisho uja ha uaminifu

²¹ Ɓadi av̄asa, wala tsi amba ha iSharia, umuhakisho mbeli za Mungu uv̄enuha, trongo ishadidishiwao ha iSharia na yimitrume.

²² Uwo muhakisho wa Mungu ha uaminifu na Insa-Kristi ha piya wao waaminio, wala kav̄u tafauti:

²³ mana piya waãswi, ɓasi walatsishiwa na utukufu wa Mungu.

²⁴ Ɓadi ha ineema yahe, Mungu awadjaãlia muhakisho mbeli zahe, ɓila muliv̄io, ha ndzia ya ukombofu ulio ha Insa-Kristi.

²⁵ Waye ɗe Mungu amutoa ake sadaka la muliv̄isho, ile ha idamu yahe, ake indzia ya upara muswamaha wa madhambi ha wao waaminio, pare aonese uhaki wahe; mana kaɓula oho, kakov̄ondra watru ha siɓaɓu ya madhambi yao.

²⁶ Ha ustahamilifu wahe, Mungu atsaha aonese uhaki wahe hari mwa uwakati wa av̄asa unu, ile ake wa haki, amma uwo ahakishao mbeli zahe wao waliona uaminifu na Insa.

²⁷ Ɓasi v̄av̄o, trini ɗe ritsodzisifuo nayo? Kav̄u! Ha sharia iv̄i? Ɗe ya zizitrendro? Ata hata! Ɓadi ɗe ha isharia ya uaminifu.

²⁸ Mana riono amba mwanadamu uhakishiwa mbeli za Mungu ha uaminifu, ɓadi tsi ha zitrendro zatsahwa na iSharia.

²⁹ Au v̄av̄o, Mungu waye Mungu wa Mayahudi tu ɓasi? Hali waye tsi wa zinishani zangina wajau? Ewa, waye wa zinishani zangina wajau,

³⁰ mana v̄wa Mungu moja tu, na waye atsohakisha wao watahiriwa ha uaminifu wawo, na wao kawatahiriwa ha siɓaɓu ya uaminifu wawo wajau.

³¹ Hali v̄av̄o, risulalusa iSharia ha siɓaɓu ya uaminifu? Ata hata! Ɗe ikinyume, v̄av̄o risuhakikisha iSharia.