MAROMU 13 - Ha`bari Ndjema ya I Maore

Utuĩ uwendza yezi

¹ Kula mutru natuĩ wendza yezi watawalia itsi, mana kav̄u yezi kayala ha Mungu, na wendza yezi walio, Mungu ɗe awahetsi.

² Iyo ɗe imana ata mutru andrao kinyume na iyezi, v̄av̄o asendra kinyume na trongo Mungu aihetsi; na wao wandrao kinyume, watsodziv̄ingia mahukuma.

³ Mana wao watawala kawasi wa uriwa neka mutru asufanya ndjema, ɓadi ɗe neka asufanya mbovu. Hali usutsaha usuriye mwendza yezi? V̄av̄o fanya ndjema, na wawe utsopara sifa zahe.

⁴ Mana waye a hari mwa urumwa wa Mungu ha itanafu yaho. Ɓadi neka usurendra mbovu, v̄av̄o ria, mana tsi ha ɓure ɗe av̄ingao shombo ya uãdhaɓisha; waye a hari mwa urumwa wa Mungu, ile aonese ihadhaɓu yahe mbeli za ule arendrao mbovu.

⁵ Iyo ɗe imana ilio farudhwi ya utuĩ, tsi ha siɓaɓu ya uria hadhaɓu tu, ɓadi tsena ha siɓaɓu iv̄o mutru ajuao rohoni hahe iyo yalazimu.

⁶ Na tsena, iyo ɗe imana ata muliv̄ao latete, mana wendza yezi wao, wa ju la urumwa wa Mungu ha zihazi wazifanyao.

⁷ Namuv̄e kula mutru yamulazimu: latete ha uwo alazimu ilatete, ushuru ha uwo alazimu uushuru, staha ha uwo alazimu istaha, hishima ha uwo alazimu ihishima.

Uv̄endza, iyo utsimidza iSharia

⁸ Musuke na deni ha mutru atsokao yotsi neka tsi ɗe uv̄endzana wanyu na wanyu. Kweli amba mutru av̄endzao munyahe, v̄av̄o atsimidza iSharia.

⁹ Mana ziãmuri zini: usufanye hawara, usuule, usuhiɓe, usudzihafukanise, na zasalia piya, zirongolesheha hari mwa iãmuri moja ini: «Utsov̄endza munyaho mauri ɗe iwawe yaho.»

¹⁰ Mutru av̄endzao munyahe, waye kamurendre mbovu. Ha izo uv̄endza, iyo utsimidza iSharia.

Udzitayarisha ha umujilio wa Kristi

¹¹ Namufanye zizo, iv̄o mujuao wakati rilio: wakati upara ya wanyu ulamuha hari mwa tsindzi zanyu. Mana av̄asa uhuyifu wa kariɓu na wasi rahana wakati raja raamini.

¹² Uku uendre mbeli, wa kariɓu na usha. Ɓasi narilishe zitrendro za shidzani, riɓange zizombo za iheu.

¹³ Naridziv̄inge ha namuna yalazimu yastahiki umutsana, ɓila uv̄endzoɗya, wala ulevi, ɓila uzani, wala taɓia kayalazimu, ɓila umani, wala uwivu.

¹⁴ Ɓadi namudzipindrise Raɓi Insa Kristi, wala musudzishuhulise na itaɓia ya shiuɓinadamu ha ujiv̄idza zingushauku zayo.