MAROMU 11 - Ha`bari Ndjema ya I Maore

Mungu kajeledza umati wahe Israila

¹ Ɓasi v̄anu nisudzisa: Hali v̄av̄o Mungu ajeledza umati wahe? Ata hata! Mana wami-wami mutru wa Israila, shilembwe ya Iɓrahima, wa udjama wa Ɓenyamini.

² Mungu kajeledza umati wahe ulio amba aujua rangu kaɓula. Hali kamusujua iyo uMuangishio urongoao hari mwa likara lahusu mashitaka ya Eliya mbeli za Mungu kinyume na Israila, amba:

³ «Mwalangu, waulu mitrume yaho na uangamidza zitalatala za masadaka zaho; tsiɓaki ɗe wami weke, ne wasutsaha wanitowe iroho.»

⁴ Ɓadi djawaɓu Mungu amuv̄alo trini? Ɗe lini: «Tsidzihetsia watru alifu saɓa walio amba kawavundza malondro mbeli za Ɓahali.»

⁵ Ɓasi ɗe namuna iyo wajau zama za leo, v̄wa fungu laɓaki latsahulwa ha neema.

⁶ Na neka ha neema, v̄av̄o tsi ulawana na zitrendro. Mana neka tsi ɗe iyo, v̄av̄o ineema kaisi neema tsena.

⁷ Ɓasi v̄av̄o trini? iTrongo Israila akozunguha, kaipara, ɓadi wao watsahulwa waipara. Na wao waɓaki wakaidishiha.

⁸ Mauri ɗe iheli yaangihwa moni na uMuangishio: «Mungu awafanya wendza roho zafamandzi, wendza matso kayaono, na wendza makio kayakia, ata upara leo.»

⁹ Na Daudu waye, arongoa: «Karamu zawo zike utra hawoju, zike trambwi, siɓaɓu ya ukwala, tsena ziwav̄ingiye shengwe ya haki.

¹⁰ Matso yawo nayatrilwe shidza, ile yasuone, tsena uwav̄ere imengo ha daima.»

¹¹ Ɓasi nisudzisa: hali wakwala, ile ike amba wawu ata idahari? Ata hata! Ɓadi ha siɓaɓu ya likosa lawo, uhuyifu ujilia zinishani zangina, ile uwivu wa Israila utsotsehe.

¹² Ɓasi neka kosa lawo liv̄ingia ɓaraka ulemengu, na uwa yawo iv̄ingia ɓaraka zinishani zangina, v̄av̄o ha mara ngav̄i zaidi uhuyifu wa indadi kamili yawo utsov̄ingao ɓaraka!

Ukombofu wa watru tsi Mayahudi

¹³ Av̄asa nisumuambiani wanyu tsi Mayahudi: Rangu nilio Muv̄ingizi-Risala ha zinishani zangina, nisutukuza ihazi nadhwaminishiwayo,

¹⁴ ile neka trongo mukinishiha, nitsotse uwivu wa wao walio kaɓila moja na wami, tsena nihuyi wasalia mengoni mwawo.

¹⁵ Mana neka utengefu wawo uv̄ingia ulemengu muparaniso na Mungu, v̄av̄o ukuɓaliwa yawo itsov̄inga trini, neka tsi muregezeo hayi ulawa ha uwafu?

¹⁶ Neka lifungu la handra lifanyao muhare litwaharishiha, v̄av̄o piya umuhare wa twahara; na neka umuzi wa twahara, v̄av̄o na yamarahi wajau.

¹⁷ Ɓadi neka ɓaãdhwi ya marahi yakatrwa wakati ulio amba wawe, muzaituni nyeha uja upatsanisiwa ɓandzaju ha marahi yale, urenge fuvu na umuzi na lidzia la umuzaituni,

¹⁸ usudzisifu mbeli za marahi yale yakatrwa. Na neka usudzisifu, usuɗele amba wawe tsi ɗe uv̄ingao umuzi, ɓadi umuzi ɗe uhuv̄ingao.

¹⁹ Mukini utsorongoa: «yaMarahi yakatrwa ile pare wami nipatsanisiwe.»

²⁰ Iyo kweli. Yakatrwa ha siɓaɓu ya ukosefu wa uaminifu wakati ulio amba wawe, ɗe ha uaminifu ɗe wasika. Ɓasi usudzione, ɓadi ilazimu uriye.

²¹ Mana neka Mungu kaɓalilia yamarahi ya ãswili, v̄av̄o katsohuɓalilia wajau.

²² Ɓasi angalia uwema na uhali wa Mungu: waye muhali uv̄andre wa wale wawa, na mwema uv̄andre waho, neka uɓaki hari mwa uwema uwo. Neka tsi ɗe namuna iyo, utsokatrwa wajau.

²³ Wao tsena, neka kawasuendrelea hari mwa ukosefu wa uaminifu wawo, watsopatsanisiwa ha mara yangina; mana Mungu ana ushindzi wa uwapatsanisa raha.

²⁴ Mana neka wawe uka ukatrwa ha umuzaituni nyeha wa ãswili amwesa, ha kinyume na iãswili, upatsanisiwa ha muzaituni wataɓilwa, ha mara ngav̄i zaidi wao watsopatsanisiwao ulingana na iãswili yawo hari mwa umuzaituni wawo wenyewe.

iIndadi kamili ya Mayahudi yaka yahetsiwa na Mungu itsohuyiwa

²⁵ Wananyangu, tsisutsaha yaka amba kamwajua ikweli ya siri ini, ile pare musudzione amba wanyu ɗe wendza ziãkili: ɗe amba v̄wa ɓaãdhwi ya Israila ifanyiha ndzikaidi ya uamini, ata mupaka ukamilifu wa ihisaɓu ya zinishani zangina ingiye hari mwa uhuyifu.

²⁶ Na ha namuna iyo ɗe piya Israila itsohuyiwao. Mauri ɗe iheli yaangihwa moni na uMuangishio: «uMukombozi atsoja ulawa Siyuna, atsomuɓausa Yaãkuɓu na ushirikina.

²⁷ Na uwo ɗe umukataɓa nitsoufungao na wao wakati nitsotoao madhambi yawo.»

²⁸ Yahusu iIndjili, wafanyiha maãduwi ya Mungu ha faida yanyu, wanyu tsi Mayahudi. Ɓadi yahusu umutsahulio wahe, wav̄endzewa ha siɓaɓu ya wadzaɗe wawo.

²⁹ Mana Mungu amodjaãlia zineema zahe na umuhirio wahe, waye karudi nyuma.

³⁰ Mara ya handra, wanyu kamwakotuĩ Mungu, na av̄asa ha iv̄o kawatuĩ, wanyu mupara urehema wahe;

³¹ ɗe ha inamuna iyo wajau av̄asa, wao kawatuĩ ulawana na urehema mwadjaãliwawo, pare wao wajau wapare urehema av̄asa.

³² Mana Mungu aɓalia piya wanadamu hari mwa umuharalio wa utuĩ wawo, ile awaonese urehema piyawo.

Mungu natukuzihe ha uɓole wahe

³³ Namuna jeje ulio muɓole utadjiri, ihikima na ujuzi wa Mungu! Kav̄u atsojuao aeledze minamuzi yahe, wala aelewe ndzia zahe.

³⁴ Mauri ɗe iheli v̄waangihwa moni na uMuangishio: «Mbani ɗe aparojua inia ya Mola? Mbani aka mushaurina wahe?»

³⁵ «Au tsena, mbani ɗe amuv̄a wa handra, ata ike amba alazimu aliv̄we?»

³⁶ Mana zitru piya zilawa hahe, zija ha indzia yahe, na tsena za ha tanafu yahe. Natukuzihe ha daima! Amina.