MAROMU 10 - Ha`bari Ndjema ya I Maore

¹ Wananyangu, itrongo nilionayo rohoni na mumilio wangu ha wanyangu, ɗe wao uhuyiwa.

² Nisuwalawia ushahidi amba wana djitihadi na Mungu, ɓadi kayaketsi hari mwa ujuzi.

³ Ha iv̄o kawasujua uhaki ulawao ha Mungu, na iv̄o watsahao wadzipariye wao wenyewe uhaki, kawakuɓali indzia yahetsiwa ya umuhakisho wa Mungu.

⁴ Mana Kristi, waye ɗe utsimidzifu wa iSharia, ile pare umuhakisho uke ha kula aaminio.

Uhuyifu kauna monyewe, uwo wa kula aamini

⁵ Ini ɗe itrongo Musa aiangiha ju la uhaki ujao ha ndzia ya iSharia: «Mutru atsofanyao ãmuri zizo, atsoẽshi ha ndzia yazo.»

⁶ Ɓadi uhaki ujao ha ndzia ya uaminifu usurongoa zini: «Usudzidzise moni haho: ‹Mbani ɗe atsoheao pev̄oni?› » (yaãni, ha ondromushukidza Kristi),

⁷ «wala amba: ‹Mbani ɗe atsoshukao uzimu?› » (yaãni, ha ondromuhedza Kristi ulawa ha uwafu.)

⁸ Ɓasi v̄av̄o uMuangishio urongoa trini? Urongoa: «Urongozi wa kariɓu na wawe, moni na ihanyo yaho, tsena moni na iroho yaho.» Na uwo ɗe urongozi wa uaminifu ɗe riuudzao.

⁹ Mana neka ukuɓali ha ihanyo yaho amba: «Insa ɗe Raɓi», tsena neka uamini rohoni haho amba Mungu amuregeza hayi ulawa ha uwafu, v̄av̄o utsohuyiha.

¹⁰ Mana uamini ha iroho, ɗe ijao na muhakisho, na ukuɓali ha ihanyo, ɗe ijao na uhuyifu.

¹¹ Mauri ɗe iheli uMuangishio urongoao: «Yotsi amuaminio katsoja haya.»

¹² Ha izo kav̄u tafauti ɓaina ya Muyahudi na Mugiriki: piyawo Mwalawo moja adjaãliao ha uwengi piya wao wamuombao.

¹³ Mana v̄uangihwa: «Yotsi aombao lidzina la Mola atsohuyiwa.»

¹⁴ Ha namuna jeje ɓasi watsoombao mutru alio amba kawamuamini? Au, ha namuna jeje watsoaminio mutru neka kawaparokia av̄umbulwa? Na ha namuna jeje watsokiao av̄umbulwe neka kav̄u mutru ajudzao?

¹⁵ Au, namuna jeje watru watsojudzao neka kawav̄elehwa? Mauri ɗe iheli yaangihwa moni na uMuangishio: «Kweli amba yistawi yimindru ya wao wajudzao haɓari ndjema!»

¹⁶ Ɓadi tsi piya ɗe watuĩ iHaɓari Ndjema. Mana Izaya arongoa: «Mwalangu, mbani ɗe aamini ihaɓari arikia nayo?»

¹⁷ V̄av̄o uaminifu uja ha iyo mutru akiao, na iyo mutru aikiao, uja ha umutekelezeyo wa urongozi wa Kristi.

¹⁸ Ɓadi nisudzisa: Hali kawakia? Ɗe ikinyume! uMuangishio usurongoa: «liJi lawo livumu hari mwa piya ishiv̄andre ya tsi, na marongozi yawo ata mupaka umwiso wa lidunia.»

¹⁹ Ɓadi wami nisudzisa: Hali Israila kaijua? Trongo ya handra, Musa arongoa: «Nitsotsotsa uwivu wanyu ha watru walio amba tsi nishani; ha nishani ndzijinga, nitsotsotsa hadhaɓu zanyu.»

²⁰ Na Izaya asuɓutu arongoa: «Tsiparihana na wao kawakonizunguha, tsidziv̄enua ha wao kawakonitsaha.»

²¹ Ɓadi yahusu Israila, arongoa: «uMutsana piya tsiondzoa yimihono ha umati kautuĩ wendza ukaidi.»