MARKUSI 9 - Ha`bari Ndjema ya I Maore

¹ Insa awaambia tsena: «Nisumuambiani ha kweli, wasalia hari mwa wao walio v̄anu kawatsopara wafa kaɓula ya wao uona Utawalizi wa Mungu wamoja ha ushindzi.»

iSuku Insa akovaga

² Ɓaanda v̄wav̄ira suku sita, Insa amurenge Monye, Yakoɓu na Yuhani, awav̄ingi weke wao v̄ahanu v̄watengeha hari mwa mulima muɓole. Ɓasi hule agauha mbeli zawo,

³ nguo zahe zakov̄ev̄ena, zikana uweu ulio amba kav̄usi mutru shiv̄andreju mwa tsi ashindrao arahatse nguo ata ike ndjeu mauri ɗe zahe zile.

⁴ Sa ile Eliya na Musa wawav̄enushia, wakolagua na Insa.

⁵ Wakati ule Monye amuambia Insa: «Fundi, ija fetre iv̄o rilio v̄anu. Narimidze maɓanga mararu, moja laho, moja la Musa, na moja la Eliya.»

⁶ Kakojua trongo ya urongoa, mana waka wangiliwa na faza halisi.

⁷ Wakati ule vingu liwav̄ishidza, na moni na vingu lile v̄ulawa ji, lirongoa: «Unu ɗe uMwana muv̄endzewa wangu; namumuvulishiye!»

⁸ Ɓasi v̄ale kamwe maswihaɓa yahe yaangalia uv̄andre na uv̄andre, wala kawaona mutru tsena na wao neka tsi ɗe Insa.

⁹ Ushuka yawo ulawa mulimani, Insa awafahamisha wasutoleye hadisi ata mutru trongo zile waziona, ata mupaka ike amba uMwana wa Mwanadamu|Mwana wa Mwanadamu aregea hayi ulawa ufaju.

¹⁰ Ɓas, wasiki urongozi ule, ɓadi wakodzisana imana ya «uregea hayi ha ulawa ufaju.»

¹¹ Amwesa wamudzisa: «Manatrini Mafundi ya Sharia warongoao amba Eliya alazimu aje raɓuzi?»

¹² Awadjiɓu: «Kweli amba Eliya alazimu aje raɓuzi, ile arengeledze piya zitrongo. Ɓasi manatrini yaangihwa tsena yahusu uMwana wa Mwanadamu amba ilazimu aondeshehe na nyengi, amwesa apuzisiwe?

¹³ Ɓadi nisumuambiani amba Eliya madza aja, na watru wamurendrea piya izo wakozitsaha, mauri ɗe iheli yaangihwa zahusuana na waye.»

Insa asuzihira mwanamutsa mutruɓaɓa akana djini la peu

¹⁴ Wakati waja wapara maswihaɓa yasalia yale, waono dunia nyengi yawazingidzia, na Mafundi ya Sharia wakoshindrana na wao.

¹⁵ Umuona yawo Insa, piya idunia ishanga, imupushia yamusalimu.

¹⁶ Sa ile awadzisa: «Musulagua trini na wao?»

¹⁷ Mutru moja hari mwa idunia ile amudjiɓu: «Fundi, tsihuv̄ingia mwana wangu, mana ana djini lamufanya ɓuɓu.

¹⁸ V̄ahali yotsi limujundrushiao, lilo umuvutsa v̄otsi, umutoa mavovu hanyoni, umuv̄uhurisa manyo, na mwili wahe ulimbiha. Tsirayi maswihaɓa yaho yalitowe, ɓadi kawashindra.»

¹⁹ Ɓasi Insa awaambia: «He wanyu wa lidunia la leo lini kamuna uaminifu! Ata lini nitsokao na wanyu? Ata lini tsena ɗe nitsomustahamilioni? Namuniv̄ingiyewo.»

²⁰ Ɓas, wamuv̄ingiawo. Umuona yahe Insa, lidjini litsuhu umwana ha nguvu. Awu v̄otsi, akodziv̄ingirisa na ulawa mavovu.

²¹ Sa ile Insa amudzisa ɓaɓahe: «Ina mida mingav̄i trongo ini imuparao?» Amudjiɓu: «Rangu unatsani hahe.

²² Wakati mwengi djini lilo umuvutsa moni na moro au majini, ile limuangamidze. Ɓadi neka utsoshindra ufanye trongo, riv̄orehe, urisaidiye.»

²³ Insa amuambia: «Usurongoa amba ‹neka utsoshindra›? Piya umukinishiha ha uwo aaminio.»

²⁴ Sa ile ɓaɓahe wa umwana ule ashelemedza: «Nisuamini, ɓadi nisaidiye v̄ahanu nakosewa na uaminifu.»

²⁵ Wakati Insa aona dunia nyengi zaidi iremao mbio ije ingulidzane v̄ale, alagulia djini la peu lile ha uliambia: «He wawe djini la peu ɓuɓu dzifa-makio, nisuhuãmurisha, ɓaushia mwanamutsa uwo, wala usumungiye tsena!»

²⁶ Sa ile lidjini lilatsa keme, limutsuhu ha nguvu, amwesa lilawa. Mwanamutsa ule aka mauri afu, ata wengi waka v̄ale wakorongoa amba afu.

²⁷ Ɓadi Insa amusiki umuhono, amumidzi, ata alimbala.

²⁸ Wakati Insa angia moni na inyumba, maswihaɓa yahe waja wamudzisa: «Manatrini wasi karashindra raĩdzia djini lile?»

²⁹ Awadjiɓu: «iNamuna ya djini lini kalishindri utolwa neka tsi ha mamilio.»

Insa asujudza ha mara ya v̄ili ufa na umuregezeo hayi wahe

³⁰ Amwesa walawa v̄ale, wav̄iri iGalilaya. Insa kakotsaha watru waijua.

³¹ Mana akosomedza maswihaɓa yahe na uwaambia: «uMwana wa Mwanadamu atsov̄elehwa mihononi ha wanadamu; watsomuula, amwesa v̄wamov̄ira suku traru, atsoregea hayi.»

³² Ɓadi maswihaɓa yale kayakoelewa imana ya urongozi ule, tsena yakoria umudzisa.

uMuɓole ɗe uv̄i ha Mungu

³³ Wawaswili ɗagoni Kafarnaumu. Nyumbani waka, Insa awadzisa: «Trini ɗe mwakoilagua ndziani?»

³⁴ Ɓadi waɓuriha, mana ndziani hule wakotsaha wajuwe amba uv̄i ɗe umuɓole hari mwawo.

³⁵ Ɓas aketsi, ahiri kumi na waili wale, awaambia: «Neka mutru atsaha ake wa handra, alazimu ake wa mwiso wa piya, tsena ake murumishi wa piya.»

³⁶ Amwesa arenge mwanamutsa, amuhetsi hari-hari na wao, amuv̄ahara mihononi na uwaambia:

³⁷ «Mutru yotsi arengao mwanamutsa mauri ɗe unu ha lidzina langu, uwo asunirenga ɗe wami; na mutru yotsi anirengao, kasunirenga ɗe wami, ɓadi ɗe Uwo aniv̄eleha.»

Mutru kasi kinyume na wasi, uwo a v̄umoja na wasi

³⁸ V̄uka suku, Yuhani amuambia Insa: «Fundi, riono mutru atoao mazetwani ha lidzina laho. Ɓasi rimuɓalidza, mana kasuriɗunga.»

³⁹ Ɓadi Insa arongoa: «Musumuɓalidze, mana kav̄u ata mutru atsofanyao midjuza ha lidzina langu, amwesa ɓaanda ya v̄ale kamwe ashindre anirongowe ha unayi.

⁴⁰ Mana mutru kasi kinyume na wasi, uwo a uv̄andre moja na wasi.

⁴¹ Na mutru yotsi atsomuv̄aoni shikombe ya maji ya unwa ha siɓaɓu amba wanyu wa Kristi, nisumuambiani ha kweli amba ithawaɓu yahe kaitsomulatsisha.»

Mufahamisho wa Insa na itrongo ya mutru ukwalisa munyahe

⁴² «Mutru atsokwalisao moja hari mwa uwatiti wanu waniaminio, itsoka afudhwali ya waye ufungwa ɓwe ɓole tsingoju, andre apulisiwe zilindrini.

⁴³ Neka muhono waho uhutsongesha ukwale, ukutruwe! Ɓorwa hahoju ungiye hari mwa uhayati mukamilifu amba kwatsimu ziga, rahana wawe ukana mihono mili, ne uvutswe moni na umoro wa Djahanama kauzimiha dahari. [

⁴⁴ V̄ahali nyengwe yawo kaifu, na umoro kauzimiha.]

⁴⁵ Na neka mundru waho uhutsongesha ukwale, ukutruwe! Ɓorwa hahoju ungiye goɓo hari mwa uhayati mukamilifu, rahana wawe ukana mindru mili, ne uvutswe moni na umoro wa Djahanama kauzimiha dahari. [

⁴⁶ V̄ahali nyengwe yawo kaifu, na umoro kauzimiha.]

⁴⁷ Na neka dzitso laho lihutsongesha ukwale, livoɓowe! Ɓorwa hahoju ungiye moni na Utawalizi wa Mungu na dzitso moja, rahana ukana matso maili, ne uvutswe moni na umoro wa Djahanama.

⁴⁸ V̄ahali ‹nyengwe yawo kaifu, na umoro kauzimiha.›

⁴⁹ Mana kula shiumbe mwanadamu atsotrilwa shingo ha moro.

⁵⁰ Shingo, iyo shitru ndjema. Ɓadi neka shingo ilawa ladha, ha trini ɗe mutru atsoshindrao airegeze? Namuke na shingo moni hanyu, tsena muke na amani wanyu na wanyu.»