MARKUSI 7 - Ha`bari Ndjema ya I Maore

Misomo ya Insa yahusu watru waɗungao zimila, ne walisha ãmuri za Mungu

¹ Suku, watru wa ishama ya Mafarisayo na ɓaãdhwi ya Mafundi ya Sharia wala Yerusalemu, wangulidzana mbeli za Insa.

² Ɓas, wafahamu ɓaãdhwi ya maswihaɓa yahe yakoɗya madipe ha mihono yendza nagisi, yaãni, ɓila uyitwaharisha.

³ (Mana Mafarisayo na piya Mayahudi wangina, kawaɗyi kaɓula wao udzitwaharisha ha uzuri yimihono, ha uɗunga zimila za wadzaɗe wawo.

⁴ Na wamolawa ɓazari, kawaɗyi neka kawadzitwaharisha. Wana tsena mila nyengi zangina waziɗungao, mauri ɗe inamuna wahosao zikombe, shiya za sufuria, na nyungu za shaɓa.)

⁵ Ɓas, Mafarisayo na Mafundi ya Sharia yale wamudzisa: «Manatrini maswihaɓa yaho kayasuɗunga zimila za wadzaɗe, ɓadi wao uɗya shahula ha mihono yendza nagisi?»

⁶ Insa awadjiɓu: «Wanyu wanafiki! Mutrume Izaya akana haki wakati akojudza marongozi ashukidziwawo ju lanyu, mauri ɗe iheli yaangihwa: ‹Umati unu unihishimu ha malomo, ɓadi roho yawo ya mbali na wami.

⁷ Uniãɓudu yawo kaina faida, yimisomo wayitoao, ãmuri za shiuɓinadamu.› »

⁸ Insa aengedza tsena: «Wanyu ulisha ziãmuri za Mungu, muɗungu mila za wanadamu.»

⁹ Awaambia raha: «Wanyu ulatsa ha uzuri iãmuri ya Mungu, ile musike mila yanyu!

¹⁰ Mana Musa arongoa: ‹Muhishimu ɓaɓaho na mayaho.› Tsena: ‹Mutru atsomuruhanao ɓaɓahe au mayahe atsolazimu aulawe.›

¹¹ Ɓadi wanyu musurongoa amba neka mutru asumuambia ɓaɓahe au mayahe: ‹iMali nitsoshindrao nihusaidiye nayo, iyo Korɓan› (mana ya v̄av̄o, shitru yatamaniwa Mungu),

¹² v̄av̄o musumukuɓalia asumusaidi mayahe au ɓaɓahe na itsokao yotsi.

¹³ Ha izo, musupua sheo urongozi wa Mungu ha zimila zanyu mwazihetsi. Amwesa musufanya nyengi zangina zifanao na zile.»

Misomo ya izo zinagisio mwanadamu

¹⁴ Wakati wangina Insa ahiri raha idunia imujiliye, awaambia: «Namunivulishiye piyanyu, tsena muelewe:

¹⁵ Kav̄usi yotsi ilio v̄ondze ha mutru ishindrao imunagisi yamongia moni hahe. Ɓadi izo zilawao moni ha mutru, ɗe zimunagisio.

¹⁶ [Kula aliona makio ya ukia, nakiye.]»

¹⁷ Wakati alisha idunia ile, angia moni na nyumba, maswihaɓa yahe yamudzisa imana ya mufano ule.

¹⁸ Ɓas, awaambia: «Wanyu ne kamusushindra mwaelewa? Kamusuelewa amba kav̄usi yotsi ilio v̄ondze ha mutru ishindrao imunagisi yamongia moni hahe?

¹⁹ Mana iyo kaingia rohoni hahe, ɓadi mimbani hahe, amwesa ulawa mwilini hahe.» Ha izo, ajudza amba piya zahula halali.

²⁰ Arongoa tsena: «Zilawao moni ha mutru, ɗe zimunagisio.

²¹ Mana ɗe rangu moni, rangu rohoni ha uwanadamu, ɗe v̄ulawao fikira mbovu, uzindzi, shahawa za peu, uangamifu,

²² uwidzi, uv̄endza upara, zitrendro mbovu, udangamanyifu, maendreleo mboya, uona uwivu, ukufuru, udziona, na ujinga.

²³ Piya trongo mbovu zizo ulawa moni ha mwanadamu, na izo ɗe zimunagisio.»

Uaminifu wa mutrumama tsi Muyahudi

²⁴ Ulawa yahe v̄ale, Insa andre hari mwa liɓavu la Tiro na Sidoni. Angia moni na nyumba amba kakotsaha ata mutru ajua, ɓadi kashindra adzama.

²⁵ Mana v̄uka mutrumama v̄ale akana mwana mutrumushe mwendza djini la peu; ukia yahe mahadisi yamuhusu Insa, aja adzivutsu mindruni hahe.

²⁶ Mutrumama uwo aka Mugiriki, hari mwa iãswila ya Fonikiya ya Siriya. Aja amumia Insa aindziye ishetwani yaka ha mwana wahe.

²⁷ Insa amuambia: «Lisha raɓuzi wanatsa wakure, mana tsi haki mutru urenga shahula ya wanatsa, avutsiyeyo mbwa.»

²⁸ Amudjiɓu: «Izo kweli Mutukufu, ɓadi mbwa zikao utsini mwa meza, izo uɗya kenye wanatsa wazipulisao.»

²⁹ Ɓas, amudjiɓu: «Ha siɓaɓu ya urongozi uwo, utsojua wendre, ishetwani ilawia mwana waho.»

³⁰ Ata uregea yahe ɗagoni, apara amba mwana wahe alala shitrandrani, na ishetwani imulawia.

Insa asuzihira mufa-makio kakolagua ha uzuri

³¹ Ɓaanda ya v̄ale Insa alawia mukaɓala wa Tiro, av̄iria iSidoni, ata arudi hari mwa iƁahari ya Galilaya|Ɓahari ya Galilaya ha uv̄iria liɓavu la Dekapoli.

³² Ɓas, watru wamuv̄ingia mufa-makio akana udziro wa ulagua. Wamumia amukadze yimihono pare av̄one.

³³ V̄ale Insa amurenge, amuv̄ingi mbali na idunia, atria za zahe makioni ha mutru ule, atri mare, amwesa ayarenge, ayatria ulimiju ha mutru ule.

³⁴ Ulawa v̄ale adzua yamatso mbinguni, atri pumu, na urongoa: «Efata!» (mana yahe: «Ɓuha!»)

³⁵ Sa ile kamwe makio yahe yaɓuha, ulimi wahe uv̄ambuha, na waye alagua ha uzuri.

³⁶ Insa awafahamisha wasuambiye mutru atsokao yotsi. Ɓadi ha ikiyasi akowafahamisha, wakozidi uzijudza.

³⁷ Ɓas, waka hari mwa ushangavu muɓole halisi, tsena wakorongoa: «Asufanya piya ha uzuri. Asufanya ata wafa-makio wakiye, na maɓuɓu yalaguwe!»