MARKUSI 5 - Ha`bari Ndjema ya I Maore

Insa asuzihira mutru akotreswa na madjini ya peu

¹ Ɓaanda ya v̄ale, Insa na maswihaɓa yahe wawaswili nyambo ya lidzia la maji, hari mwa liɓavu la Magerasi.

² Insa ushuka yahe djahazini v̄ale, v̄umujilia mutru akana djini la peu, alawa mahaɓurini.

³ Mutru uwo akoẽshi mahaɓurini, amwesa kav̄waka ata mutru akoshindra umufunga tsena, ata ha silisili.

⁴ Mara nyengi akofungwa yimindru ha mauzi ya shuma, amwesa akotratriwa na silisili, ɓadi akorumbua zisilisili, na ukutrua mauzi ya shuma yale; tsena kav̄waka ata mutru akana zinguvu za umuzia.

⁵ Ha daima akoka mahaɓurini na milimani mauku na mitsana, ha ulatsa keme na udzikatra-katra ha mawe.

⁶ Umuona yahe Insa rangu mbali, areme mbio, aja amuendrelea mindru tsini,

⁷ amwesa ashelemedza ha ji lendza nguvu: «Usunitsaha na trini Insa, Mwana wa Mungu Monyewe Uju rahana Uju? Nilav̄iye na Mungu amba kutsonitresa!»

⁸ Mana Insa aka amuambia: «Wawe djini la peu, mulawiye mutru uwo!»

⁹ Ɓas, v̄ale Insa amudzisa: «Dzina laho mbani?» Ule amudjiɓu: «Dzina langu Malijio, mana ra wengi.»

¹⁰ Tsena amumia ha kusudi asuĩdziye madjini yale tsiju v̄ale.

¹¹ Shilimani hule, v̄uka ɓangwe ɓole la mav̄uruku lakorundria.

¹² Sa ile madjini ya peu yale yamumia Insa: «Riv̄elehe hari mwa mav̄uruku yale, riyangiliye.»

¹³ Ayakuɓalia. Ɓas, madjini ya peu yale yalawia mutru ule, yaangilia mav̄uruku yale. Ɓangwe lile lireme mbio ushuka shilimaju v̄ale, lipuliha moni na lidzia la maji, lino ata liangamia; na yao yaka indadi ya alifu mbili.

¹⁴ Watru wakorundrisa mav̄uruku yale watrala, watrangaza haɓari ile rangu mujini ata liju. Ɓas, watru wakwendra waone trongo zahidjiri.

¹⁵ Wamujilia Insa, waono mutru ule akana mazetwani mengi amba aketsi, apindri, tsena akana ãkili zahe. Ɓas, watru wale waremwa na faza.

¹⁶ Wao waona zile zav̄ira wawajudza trongo zahidjiria ule akana yamazetwani, na yahusu mav̄uruku yale.

¹⁷ Ɓas, waandrisa umumia Insa alawe hari mwa ɓavu lawo lile.

¹⁸ V̄ale kamwe akopashia lidjahazi, ule akana yamazetwani amia amuɗunge.

¹⁹ Na Insa kamukuɓalia, ɓadi amuambia: «Endra dzaho ha udjama waho, wawatoleye hadisi piya izo Mola ahufanyia, na inamuna ahushukidzia urehema.»

²⁰ Ɓas, andre dzahe, aandrisa ujudza hari mwa umukaɓala wa Dekapoli piya izo Insa amufanyia, ata watru piya wakoshanga.

uMwana mutrumushe wa Yairus, na mutrumama aɓamba inguo ya Insa

²¹ V̄ale moni na lidjahazi lile, Insa andre ata ashia tsena nyambo ya lidzia; na hule dunia nyengi ingulidzana kariɓu na waye tsandzaleni mwa maji.

²² Ɓas, v̄uja mutru akohiriwa Yairus, moja mengoni mwa yamadhwamana ya iNyumba ya Uswali. Wakati amuona Insa, adzivutsu mindruni hahe,

²³ amumia ha kusudi zini: «Mwana mutrumushe wangu a kariɓu na ufa. Nisuhutafadali, uje umukadziye yimihono, ile av̄one, aẽshi!»

²⁴ Ɓas, Insa andre na waye. Dunia nyengi ya watru yakomuɗunga, tsena yakomusera.

²⁵ Na moni v̄ale v̄uka mutrumushe akovuja damu, madza ikana maha kumi na mili.

²⁶ Aondeha halisi mihononi ha matwaɓiɓu mengi, aka arumia piya mali aka nazo, wala kaka av̄ona, ɓadi ihali yahe yakozidi uka mbi.

²⁷ Ɓaanda akia haɓari yahusuana na Insa, aja moni na idunia ile rangu mengoni, aɓamba inguo yahe.

²⁸ Mana akodziambia: «Neka amba tsishindri tsiɓamba wala ukana tu ɗe inguo yahe, natsov̄ona.»

²⁹ Sa na isa ile mushukio damu wahe ule uzia, tsena akia mwilini hahe amba av̄onesewa na maradhi yahe yale.

³⁰ Sa ile kamwe Insa adzimayizi amba v̄umulawia nguvu. Azingia idunia ile, adzisa: «Mbani ɗe aɓamba nguo yangu?»

³¹ Maswihaɓa yahe yamuambia: «Usuona idunia heli yahusera, ɗe usudzisa: ‹Mbani ɗe aniɓamba?› »

³² Ɓadi Insa aangalia wale wamuzingidzia, ile aone mutru afanya trongo ile.

³³ Sa ile mutrumama ule angiliwa na faza ata akodridrima, mana ajua izo zamuhidjiria; aja adzivutsu mindruni hahe, amwesa amuambia piya zikweli.

³⁴ Ɓas, Insa amuambia: «Mama, uaminifu waho uhuv̄onesa. Endra dzaho ha salama, amba uv̄onesewa na maradhi yaho.»

³⁵ V̄ale raha akolagua, v̄uja watru wala ha dhwamana wa iNyumba ya Uswali, warongoa: «Mwana mutrumushe waho afu. Manatrini umutaãɓishao tsena Fundi?»

³⁶ Ɓadi Insa ukia yahe urongozi ule, amuambia dhwamana ule: «Usuriye, amini tu.»

³⁷ Amwesa kalisha ata mutru aɗungana na waye neka tsi ɗe Monye, Yakoɓu na Yuhani, mwananyahe wa Yakoɓu.

³⁸ Wakati wawaswili nyumbani ha dhwamana wa iNyumba ya Uswali, Insa aono fidjo la watru wakolila na ulatsa keme ha nguvu.

³⁹ V̄ale angia, awaambia: «Manatrini mulatsao keme na ulila? Mwana uwo kafa, ɓadi asindzia.»

⁴⁰ Ɓadi wamutsehe. Ɓas, ɓaanda atoa piya watru v̄ondze, amurenge ɓaɓahe na mayahe wa umwana, na wale waka wamuɗunga, angia v̄ahali umwana aka.

⁴¹ Amusiki umuhono, amuambia: «Talita kum!» (mana ya v̄av̄o, «Mama, nisuhuambia, hima!»)

⁴² Sa na isa ile mwana mutrumushe ule ahimi, andre; mana akana maha kumi na mili. Ɓas, waremwa na ushangavu muɓole.

⁴³ Insa awaɓalidza ha kusudi amba v̄wasuke ata mutru ajua trongo zahidjiri v̄ale; tsena awaambia wamuv̄e mwana ule shahula aɗye.